പുറപ്പാട് 11 FHB Father's Heart Bible™

11 ¹നമ്മുടെ പിതാവ് മോശയോട് അരുളിച്ചെയ്തു: “ഒരു ബാധകൂടി ഞാൻ ഫറവോന്റെമേലും ഈജിപ്തിന്മേലും വരുത്തും. അതിനുശേഷം അദ്ദേഹം നിങ്ങളെ ഇവിടെനിന്ന് വിട്ടയയ്ക്കും; വിട്ടയയ്ക്കുമ്പോൾ നിങ്ങളെ മുഴുവനായി ഓടിച്ചുകളയും. ²ഓരോ പുരുഷനും തന്റെ അയൽക്കാരനോടും ഓരോ സ്ത്രീയും തന്റെ അയൽക്കാരിയോടും വെള്ളിയുടെയും സ്വർണത്തിന്റെയും വസ്തുക്കൾ ചോദിക്കട്ടെ എന്ന് ജനത്തോട് പറയുക.”

³നമ്മുടെ പിതാവ് ഈജിപ്തുകാരുടെ മുമ്പിൽ ജനത്തിന് കൃപ നല്കി. അതുമാത്രമല്ല, മോശ ഈജിപ്തുദേശത്ത് ഫറവോന്റെ ഭൃത്യന്മാരുടെയും ജനത്തിന്റെയും ദൃഷ്ടിയിൽ ഏറ്റവും മഹാനായിരുന്നു.

⁴മോശ പറഞ്ഞു: “നമ്മുടെ പിതാവ് ഇപ്രകാരം അരുളിച്ചെയ്യുന്നു: അർധരാത്രിയോടടുത്ത് ഞാൻ ഈജിപ്തിലൂടെ കടന്നുപോകും,

⁵“അപ്പോൾ സിംഹാസനത്തിൽ ഇരിക്കുന്ന ഫറവോന്റെ ആദ്യജാതൻമുതൽ തിരികല്ലിനു പിന്നിലുള്ള ദാസിയുടെ ആദ്യജാതൻവരെ ഈജിപ്തുദേശത്തെ എല്ലാ ആദ്യജാതരും മൃഗങ്ങളുടെ എല്ലാ കടിഞ്ഞൂലുകളും മരിക്കും. ⁶മുമ്പൊരിക്കലും ഉണ്ടായിട്ടില്ലാത്തതും ഇനി ഒരിക്കലും ഉണ്ടാകാത്തതുമായ മഹാനിലവിളി ഈജിപ്തുദേശമെങ്ങും നിറയും. ⁷എന്നാൽ ഇസ്രായേൽജനത്തിൽ ആരുടെനേരേയും, മനുഷ്യന്റെയോ മൃഗത്തിന്റെയോ നേരേ, ഒരു നായപോലും മുരളുകയില്ല; നമ്മുടെ പിതാവ് ഈജിപ്തിനെ ഇസ്രായേലിൽനിന്ന് വേർതിരിക്കുന്നു എന്ന് ഇതിനാൽ നിങ്ങൾ അറിയും. ⁸അങ്ങയുടെ ഈ ഭൃത്യന്മാരെല്ലാം എന്റെ അടുക്കൽ ഇറങ്ങിവന്ന് എന്റെ മുമ്പിൽ കുമ്പിട്ട്, ‘നീയും നിന്നെ അനുഗമിക്കുന്ന സകലജനവും പോകുവിൻ’ എന്ന് പറയും. അതിനുശേഷം ഞാൻ പുറപ്പെട്ടുപോകും.” ഇതു പറഞ്ഞിട്ട് മോശ ജ്വലിക്കുന്ന കോപത്തോടെ ഫറവോനെ വിട്ടുപോയി.

⁹നമ്മുടെ പിതാവ് മോശയോട് അരുളിച്ചെയ്തു: “ഫറവോൻ നിങ്ങളെ ശ്രദ്ധിക്കുകയില്ല; അതിനാൽ എന്റെ അദ്ഭുതങ്ങൾ ഈജിപ്തുദേശത്ത് പെരുകും.”

¹⁰മോശയും അഹരോനും ഈ അദ്ഭുതങ്ങളെല്ലാം ഫറവോന്റെ മുമ്പിൽ പ്രവർത്തിച്ചു; എന്നാൽ നമ്മുടെ പിതാവ് ഫറവോന്റെ ഹൃദയം കഠിനമാക്കി, അവൻ ഇസ്രായേൽമക്കളെ തന്റെ ദേശത്തുനിന്ന് വിട്ടയച്ചില്ല.