ವಿಮೋಚನಕಾಂಡ 11 FHB Father's Heart Bible™

11 ¹ನಮ್ಮ ತಂದೆ ಮೋಶೆಗೆ, “ಫರೋಹನ ಮೇಲೆಯೂ ಈಜಿಪ್ಟಿನ ಮೇಲೆಯೂ ಇನ್ನೊಂದು ಉಪದ್ರವವನ್ನು ಬರಮಾಡುತ್ತೇನೆ. ಅನಂತರ ಅವನು ನಿಮ್ಮನ್ನು ಇಲ್ಲಿಂದ ಕಳುಹಿಸುತ್ತಾನೆ; ಕಳುಹಿಸುವಾಗ ನಿಮ್ಮನ್ನು ಸಂಪೂರ್ಣವಾಗಿ ಹೊರಗಟ್ಟುತ್ತಾನೆ. ²ಪ್ರತಿಯೊಬ್ಬ ಪುರುಷನು ತನ್ನ ನೆರೆಯವನಿಂದ, ಪ್ರತಿಯೊಬ್ಬ ಸ್ತ್ರೀಯು ತನ್ನ ನೆರೆಯವಳಿಂದ ಬೆಳ್ಳಿಬಂಗಾರದ ವಸ್ತುಗಳನ್ನು ಕೇಳಿಕೊಳ್ಳಲಿ ಎಂದು ಜನರಿಗೆ ಹೇಳು,” ಎಂದರು.

³ನಮ್ಮ ತಂದೆ ಈಜಿಪ್ಟಿನವರ ಮುಂದೆ ಆ ಜನರಿಗೆ ದಯೆ ದೊರಕುವಂತೆ ಮಾಡಿದರು. ಇದಲ್ಲದೆ ಮೋಶೆಯು ಫರೋಹನ ಸೇವಕರ ದೃಷ್ಟಿಯಲ್ಲಿಯೂ ಜನರ ದೃಷ್ಟಿಯಲ್ಲಿಯೂ ಈಜಿಪ್ಟ್ ದೇಶದಲ್ಲಿ ಬಹು ಶ್ರೇಷ್ಠನಾಗಿದ್ದನು.

⁴ಮೋಶೆಯು, “ನಮ್ಮ ತಂದೆ ಹೀಗೆ ಹೇಳುತ್ತಾರೆ: ಮಧ್ಯರಾತ್ರಿಯ ಸುಮಾರಿಗೆ ನಾನು ಈಜಿಪ್ಟಿನ ಮೂಲಕ ಹಾದುಹೋಗುತ್ತೇನೆ,

⁵ಆಗ ಸಿಂಹಾಸನದ ಮೇಲೆ ಕುಳಿತಿರುವ ಫರೋಹನ ಚೊಚ್ಚಲ ಮಗನಿಂದ ಹಿಡಿದು ಬೀಸುವ ಕಲ್ಲಿನ ಹಿಂದಿರುವ ದಾಸಿಯ ಚೊಚ್ಚಲ ಮಗನ ತನಕ ಈಜಿಪ್ಟ್ ದೇಶದ ಪ್ರತಿಯೊಂದು ಚೊಚ್ಚಲ ಮಗುವೂ, ಪ್ರತಿಯೊಂದು ಚೊಚ್ಚಲ ಪ್ರಾಣಿಯೂ ಸಾಯುವುದು. ⁶ಈಜಿಪ್ಟ್ ದೇಶದಲ್ಲೆಲ್ಲಾ ಹಿಂದೆಂದೂ ಆಗದ, ಮುಂದೆಂದೂ ಆಗದ ಮಹಾ ಗೋಳಾಟವು ತುಂಬಿಕೊಳ್ಳುವುದು. ⁷ಆದರೆ ಇಸ್ರಾಯೇಲ್ಯರ ಜನರ ಮೇಲಾಗಲಿ, ಮನುಷ್ಯರ ಮೇಲಾಗಲಿ, ಪ್ರಾಣಿಗಳ ಮೇಲಾಗಲಿ ಒಂದು ನಾಯಿ ಕೂಡ ಗುರುಗುಟ್ಟುವುದಿಲ್ಲ; ಹೀಗೆ ನಮ್ಮ ತಂದೆ ಈಜಿಪ್ಟನ್ನು ಇಸ್ರಾಯೇಲಿನಿಂದ ಬೇರ್ಪಡಿಸುತ್ತಾರೆಂಬುದು ನಿಮಗೆ ತಿಳಿಯುವುದು. ⁸ನಿನ್ನ ಈ ಸೇವಕರೆಲ್ಲರೂ ನನ್ನ ಬಳಿಗೆ ಬಂದು, ನನಗೆ ಅಡ್ಡಬಿದ್ದು, ‘ನೀನೂ ನಿನ್ನನ್ನು ಹಿಂಬಾಲಿಸುವ ಜನರೆಲ್ಲರೂ ಹೊರಟುಹೋಗಿರಿ’ ಎಂದು ಹೇಳುವರು. ಅನಂತರ ನಾನು ಹೊರಟುಹೋಗುತ್ತೇನೆ,” ಎಂದರು. ಬಳಿಕ ಮೋಶೆಯು ಕೋಪದಿಂದ ಉರಿಯುತ್ತಾ ಫರೋಹನ ಬಳಿಯಿಂದ ಹೊರಟುಹೋದನು.

⁹ನಮ್ಮ ತಂದೆ ಮೋಶೆಗೆ, “ಫರೋಹನು ನಿಮ್ಮ ಮಾತನ್ನು ಕೇಳುವುದಿಲ್ಲ; ಆದ್ದರಿಂದ ಈಜಿಪ್ಟ್ ದೇಶದಲ್ಲಿ ನನ್ನ ಅದ್ಭುತಗಳು ಹೆಚ್ಚುವುವು,” ಎಂದರು.

¹⁰ಮೋಶೆ ಮತ್ತು ಆರೋನರು ಈ ಅದ್ಭುತಗಳನ್ನೆಲ್ಲಾ ಫರೋಹನ ಮುಂದೆ ಮಾಡಿದರು; ಆದರೆ ನಮ್ಮ ತಂದೆ ಫರೋಹನ ಹೃದಯವನ್ನು ಕಠಿಣಗೊಳಿಸಿದರು; ಹೀಗಾಗಿ ಅವನು ಇಸ್ರಾಯೇಲ್ಯರನ್ನು ತನ್ನ ದೇಶದಿಂದ ಕಳುಹಿಸಲು ನಿರಾಕರಿಸಿದನು.