ዘፀአት 11

11 ¹አባታችን ሙሴን እንዲህ አለው፤ “በፈርዖንና በግብፅ ላይ አንድ ተጨማሪ መቅሠፍት አመጣለሁ። ከዚያ በኋላ ከዚህ ያወጣችኋል፤ ይህን ሲያደርግም ፈጽሞ ያባርራችኋል። ²ለሕዝቡ ንገራቸው፤ እያንዳንዱ ሰው ከጎረቤቱ፣ እያንዳንዷ ሴት ከጎረቤቷ የብርና የወርቅ ዕቃዎች ይጠይቁ።”

³አባታችንም ሕዝቡን በግብፃውያን ዘንድ ሞገስ አሰጣቸው። ከዚህም በላይ ሙሴ ራሱ በግብፅ ምድር፣ በፈርዖን ሹማምትና በሕዝቡ ዓይን እጅግ ታላቅ ነበር።

⁴ሙሴም እንዲህ አለ፤ “አባታችን እንዲህ ይላል፤ እኩለ ሌሊት ገደማ በግብፅ መካከል አልፋለሁ፤

⁵በግብፅ ምድር ያለ በኵር ሁሉ ይሞታል፤ በዙፋኑ ላይ ከሚቀመጠው ከፈርዖን በኵር ጀምሮ ከወፍጮ ጀርባ እስካለችው የባሪያ ሴት በኵር ድረስ፣ የእንስሳውም በኵር ሁሉ ይሞታል። ⁶በግብፅ ምድር ሁሉ ታላቅ ጩኸት ይሞላል፤ እንደ እርሱ ያለ ቀድሞ ኾኖ አያውቅም፣ ዳግመኛም አይኖርም። ⁷ነገር ግን በእስራኤል ሕዝብ ላይ፣ በሰው ኾነ በእንስሳ ላይ ውሻ እንኳ አይጮኽም፤ ይህም አባታችን በግብፅና በእስራኤል መካከል እንደሚለይ ታውቁ ዘንድ ነው። ⁸እነዚህ ሹማምትህ ሁሉ ወደ እኔ ወርደው በፊቴ ተደፍተው፣ ‘አንተና የሚከተሉህ ሕዝብ ሁሉ ውጡ’ ይሉኛል። ከዚያ በኋላ እወጣለሁ።” ከዚያም ሙሴ በጽኑ ቍጣ ተቃጥሎ ከፈርዖን ዘንድ ወጣ።

⁹አባታችን ሙሴን እንዲህ አለው፤ “ፈርዖን አይሰማህም፤ ይህም ተአምራቴ በግብፅ ምድር እንዲበዛ ነው።”

¹⁰ሙሴና አሮን እነዚህን ተአምራት ሁሉ በፈርዖን ፊት አደረጉ፤ ነገር ግን አባታችን የፈርዖንን ልብ አደነደነ፤ እርሱም እስራኤላውያንን ከምድሩ ለመልቀቅ እምቢ አለ።