Shongzā 11

11 ¹Ithumwui Avāna Mosesli hānga, "Kazātkashi khangatei akha ina Pharaohtungli kala Egypttungli khuirāra. Chiwui thili ana nathumli hiwui eina chihora; ana sāhai tharan, nathumli katonga kashamshokserra. ²Mibingli hānglu: mayarnao kachiva̱na awui khongnainaoli, sha̱nao kachiva̱na awui khongnainaoli, lupāsā kala sināwui otbing poranu."

³Kala ithumwui Avāna mibingli Egyptnaobingwui mangāli ngahānkhangai ngasakmi. Chili lāngda, Moses khalatta Egypt ngaleili Pharaohwui raobingwui kala mibingwui miktāli sakchangda khare mi sai.

⁴Mosesna hānga, "Ithumwui Avāna hithāda hānga: Ngayā sailung khamakhei eina ina Egypt ngalei makānda,

⁵"kala Egypt ngaleili khalei pharākhare saikora, awui wungpamkhongli kapama Pharaohwui pharākhare eina thuilaga shingkhurwui khanukli khalei raonao preiva̱wui pharākhare eina tangda, kala sha̱kei pharākhare saikorala thira. ⁶Kala Egypt ngalei saikorali khavao panglāk hamla; hithakha khavao china achālakhawui eina mashokthei, riwui thilila mashokluimara. ⁷Kha Israelnaobing khipākhali, mila sha̱keila, fa akhalala manirmana; chieina ithumwui Avāna Egyptnaobing eina Israelnaobingli ngatei ngasak kaji nathumna theira. ⁸Nawui raobing hibing saikora iwuili tungda, iwui mangāli khumsangda, hāngra, 'Na kala nawui thi kashur mibing saikora, zatserulu.' Chiwui thili ina shokra." Chieina Mosesna malungkhavāt kasā eina Pharaohwui eina thuihaowa.

⁹Ithumwui Avāna Mosesli hānga, "Pharaohna nali makhuikasang tharan, chieina iwui matakhak kahai khudam Egypt ngaleili mataisangra."

¹⁰Moses eina Aaronna matakhak kahai khudam hibing saikora Pharaohwui mangāli sai, kha ithumwui Avāna Pharaohwui wuklung mararmihaida, Israelnaobingli awui ngaleiwui eina machiholuithuwa.