Shongzā 10

10 ¹Chieina ithumwui Avāna Mosesli hānga, "Pharaohli vālu, kaja iwui machutbing athumwui mangāli sāchithei khavai ina awui wuklung kala awui raobingwui wuklung mararngasakhaira. ²Nawui nao eina nara̱li ina Egyptnaobingli kathāda mana̱shi kahai, kala athumwui mangāli iwui machutbing sāchithei kahai chi hānglu, chieina I nathumwui Avā kaji nathumna theira."

³Moses eina Aaronna Pharaohli vāda hānga, "Hebrewnaobingwui Avāna kahāngna: 'Katharan eina tangda nana iwui mangāli malungnim khavai marāngairakhala? Ili otram ngatha̱mi khavai, iwui mibingli chiholu.' ⁴Kaja nana iwui mibingli machihola haiakha, akhama ina nawui leiretli khaoh khuirāra. ⁵Athumna ngalei katongawui ngaleitung khayinhaida, ngalei matheiki ngasakra, theihna nathumli hormikhami chi shaira, kala luili nathumwui vang kharshok kahai thingrong saikora shaira. ⁶Nawui navā ngarā kala nashāvā ngarāna ngaleili leikaphok kahai atam eina thuida ara eina tangda matheilakhawui thāda, nawui shimli, nawui raobingwui shimli, kala Egyptnaobing saikorawui shimli pemtinghaora." Chieina ana ngareiungda Pharaohwui eina thuihaowa.

⁷Pharaohwui wungnaobingna hānga, "Katharan eina tangda mipā hi ithumwui vang khalen sāra? Athumwui Vareli otram ngatha̱mi khavai, mibingli chiholu. Egypt khikha masāpaihaira kaji nana matheirangsaimala?"

⁸Chieina Moses eina Aaronli Pharaohshong latung ngasaka. Ana hānga, "Vālu, Vareli otram ngatha̱lu. Kha khipā khipā vāra?"

⁹Mosesna hānga, "Ithumwui naoshinao kala kasarnao ngarumda vāra; naomayarabing, naongalāva̱bing, mebing kala yaobing ngarumda vāra, kaja ithum ithumwui Avāli phanit sākhavai lei."

¹⁰Ana athumli hānga, "Ina nathum kala nathumwui naoshinaoli chiho ngasakra kahai thāda, Vare nathumwui mijang leiranu! Yanglu, nathumna makaphā ningmāng phaninga. ¹¹Maningmana! Nathum mibing vāda Vareli otram ngatha̱lu, kaja chi nathumna kaningchāngna." Chieina Pharaohna athumli awui mangāwui eina kashamshokhaowa.

¹²Chieina ithumwui Avāna Mosesli hānga, "Khaoh Egyptwui tungli shokkhavai kala theihna hormikhami ngaleiwui khawo saikora shaimi khavai, Egypt ngaleiwui tungli nawui pāng katingvālu."

¹³Mosesna awui khāmshui Egyptwui tungli katingvai, kala ithumwui Avāna zimiksho katonga kala ngayā katonga ngalei tungli zingshoshongwui masi ung ngasaka; ngathor tharan masi china khaoh khuirāhaira. ¹⁴Khaoh Egypt saikorawui tungli shokrāhaowa, awui leiret katongali pamhaowa. Chi mataikachangkhathaowa; chiwui khare chithāda khangatei maleilala, kala chithili chithāda khangatei maleimara. ¹⁵Athumna ngalei katonga ngaleitung khayinhaida, ngalei tangmanghaowa, kala ngaleiwui khawo saikora shai, theihna hormikhami thingrongwui athei saikorala shai. Egypt ngalei katongawui thingrong kala luili khawoli, kaho khikha maleisāthuwa. ¹⁶Chieina Pharaohna Moses eina Aaronli katotsisi hokhuida hānga, "Ina nathumwui Vareli kala nathumli morei sāhaira. ¹⁷Kapona, ara aja tang iwui khayonkhamāng kapheomilu, kala iwui eina kathi hi tang thahaimimi khavai, nathumwui Vareli po ngasaklu."

¹⁸Kala Mosesna Pharaohwui eina shokta ithumwui Avāli seihā sai. ¹⁹Chiwui thili ithumwui Avāna masi chi zingtunshongwui pangshapa masili ngareivāda, china khaoh chi kaphelaga Red Seali phanngasaka; kala Egypt katongawui leiretli khaoh akhala maleisāmana. ²⁰Kha ithumwui Avāna Pharaohwui wuklung mararmihaida, ana Israelnaobingli machiholuithuwa.

Tangkhamangwui Zimiksho Kathum

²¹Chieina ithumwui Avāna Mosesli hānga, "Napāng kazingramli katingkālu; chieina pāng eina theikhavai tangkhamang kashāna Egypt ngalei khaluiphinhaoranu."

²²Mosesna kazingramli apāng katingkai; kala tangkhamang kashā Egypt ngalei katongali zimiksho kathumthang khaluiphinhaowa. ²³Khipānakha akha eina akhali matheimana, kala zimiksho kathumthang khipānakha awui pam eina mashokmana; kha Israelnaobing saikorawui shimli kahor leiya.

²⁴Pharaohna Mosesli hokhuida hānga, "Vālu, nathumwui Vareli otram ngatha̱lu. Nathumwui naoshinaobingla vāpaira. Kha nathumwui mebing kala yaobingmāng horhaolu."

²⁵Mosesna hānga, "Nanala ithumwui Avāli chigatkhami pha̱kaphayā kala rikkatā kachigat ithumli khamilu. ²⁶Ithumwui sha̱kei ithumla ngasokazata vāphalungra. Asho akhala maleisāmana. Chiwui eina kaikha ithumna khuilaga ithumwui Avāli otram ngatha̱ra; kaja chili mavāshungranglakha eina tangda, ali otram ngatha̱khavai khi vatra kaji ithumna matheimara."

²⁷Kha ithumwui Avāna Pharaohwui wuklung mararmihaida, ana athumli chiho khavai makhuisangthuwa. ²⁸Pharaohna ali hānga, "Iwui eina thuihaolu! Ning ngasharlu. Iwui mai matheiluialu; kaja nana iwui mai theithang na thira."

²⁹Mosesna hānga, "Nana mashunga hānga. Ina nawui mai matheiluilakmara."