اوفوقدا چَیئرتکه‌لر
آتامیز چَیئرتکه گؤندَ‌رئر کی، دولودان قالان هر شیی یسئن، اله کی، هچ یاشیللیق قالمیر؛ فئرعونون اعیانلاری اوندان سوروشورلار کی، مگر مئصئرئن وئران اولدوغونو گؤرمور؟ سونرا اَل‌له هئسّ اولونان قاتی بئر قارانلیق اوچ گون مئصئری بوروور، آمّا ائسرایئلئن ایشیغی وار. سؤوداله‌شمه فئرعونون موسانین جانینی تهدئد اتمه‌سی ائله قورتاریر.
10 1آتامیز موسایا ددی: «فئرعونون یانینا گت، چونکی من اونون و اعیانلارینین اوره‌یئنی عئنادکار اتدئم کی، علامتلرئمی اونلارین آراسیندا قویوم. 2اوغلونا و نوه‌نه نقل ات کی، من مئصئرلی‌لری نجه مسخره اتدئم و علامتلرئمی اونلارین آراسیندا نجه قویدوم، بله‌جه بئله‌سئنئز کی، آتانیز منم.»
3موسا و هارون فئرعونون یانینا گدئب ددئلر: «عئبرانئلرئن آتاسی بله بویورور: ”نه واختا کئمی منئم قاباغیمدا اؤزونو موته‌واضِع اتمکدن بویون قاچیرداجاقسان؟ خالقیمی بوراخ کی، منه قوللوق اتسئن.“ 4چونکی اگر خالقیمی بوراخماقدان ائمتئناع اده‌سن، صاباح سنئن سرحدلرئنئن ائچئنه چَیئرتکه گتئره‌جیم. 5اونلار یرئن اوزونو اؤرته‌جکلر، اِله کی، تورپاق گؤرونمیه‌جک. دولودان سئزه قالانی یئیه‌جکلر و چؤلده سئزئن اوچون بئتَن هر آغاجی یئیه‌جکلر. 6اِولرئنی، اعیانلارینین و بوتون مئصئرلی‌لرئن اِولرئنی دولدوراجاقلار؛ اِله کی، آتالارینیز و بابالارینیز، یر اوزونده اولدوقلاری گوندن ائندئیه کئمی بله شی گؤرمه‌یئب.» سونرا دؤنوب فئرعونون یانیندان چیخدی.
7فئرعونون اعیانلاری ددئلر: «بو آدام نه واختا کئمی بئزه تله اولاجاق؟ بو آداملاری بوراخ کی، اؤز تاریلارینا قوللوق اتسئنلر. مگر حله بئلمئرسن کی، مئصئر وئران اولوب؟»
8موسا و هارون فئرعونون یانینا گری گتئرئلدئلر. فئرعون ددی: «گدئن، تارییا قوللوق ادئن. آمّا گدن کئملردئر؟»
9موسا ددی: «جاوانلاریمیز و قوجالاریمیزلا بئرلئکده گده‌جَیئک؛ اوغوللاریمیز، قیزلاریمیز، قویون-کچئمیز و مال-حیوانیمیزلا گده‌جَیئک، چونکی آتامیزا بئر بایرامیمیز وار.»
10فئرعون اونلارا ددی: «قوی تاری سئزئنله اولسون! مگر من سئزی و اوشاقلارینیزی بوراخاجاغام؟! باخین، پئس نئیّتئنئز وار. 11یوخ! قوی کئشئلر گدئب تارییا قوللوق اتسئنلر، چونکی ائسته‌دئیئنئز ائله بودور.» بله‌جه فئرعون اونلاری اؤز حوضوروندان قوودو.
12آتامیز موسایا ددی: «اَلئنی مئصئرئن اوستونه اوزات کی، چَیئرتکه مئصئرئن اوستونه قالخسین و دولودان قالان یرئن هر اوتونو یئسئن.»
13موسا دَیَنَکئنی مئصئرئن اوستونه اوزاتدی و آتامیز بوتون او گون و بوتون گجه اؤلکه‌نئن اوستونه شرق کوله‌یی اَسدئردی؛ سحر اولاندا شرق کوله‌یی چیئرتکه‌لری گتئردی. 14چَیئرتکه بوتون مئصئرئن اوستونه قالخدی و بوتون سرحدلرئنه قوندو. اونلار اِله آغیر ائدئلر کی، نه اوّل‌لر بله‌سی اولموشدو، نه ده بوندان سونرا بله‌سی اولاجاق. 15اونلار بوتون یرئن اوزونو اؤرتدولر، اِله کی، یِر قارالدی. یرئن هر اوتونو و دولودان قالان بوتون آغاج میوه‌سئنی یدئلر. بوتون مئصئر تورپاغیندا نه آغاجدا، نه ده چؤل اوتوندا هچ بئر یاشیللیق قالمادی. 16بله‌جه فئرعون تِز موسا و هارونو چاغیریب ددی: «سئزئن تارینیزین ضئدّئنه و سئزئن ضئدّئنئزه گوناه اتمئشم. 17خاهئش ادئرم، فقط بو دفه گوناهیمی باغیشلایین و تارینیزا یالوارین کی، فقط بو اؤلومو مندن اوزاقلاشدیرسین.»
18موسا فئرعونون یانیندان چیخیب آتامیزا یالواردی. 19آتامیز کوله‌یی چوخ گوجلو بئر قرب کوله‌یئنه چِوئردی؛ او کولک چیئرتکه‌لری قالدیریب قیرمیزی دهنزه سوروکله‌دی. بوتون مئصئرئن سرحدئنده بئر دنه ده چیئرتکه قالمادی. 20آمّا آتامیز فئرعونون اوره‌یئنی عئنادکار اتدی و او، ائسرایئل اؤولادلارینی بوراخمادی.
اوچ گونلوک قارانلیق
21آتامیز موسایا ددی: «اَلئنی گؤیه طرف اوزات کی، مئصئر تورپاغینی قارانلیق اؤرتسون؛ اِله بئر قارانلیق کی، اَل ائله توخونماق اولسون.»
22موسا اَلئنی گؤیه طرف اوزاتدی و اوچ گون بوتون مئصئر تورپاغینی قالین قارانلیق اؤرتدو. 23اوچ گون ائچئنده هچ کس بئر-بئرئنی گؤره بئلمه‌دی و هچ کس اؤز یرئندن ترپنمه‌دی؛ آمّا بوتون ائسرایئل اؤولادلارینین اؤز اِولرئنده ائشیق وار ائدی.
24فئرعون موسانی چاغیریب ددی: «گدئن، تارینیزا قوللوق ادئن. اوشاقلارینیز دا گده بئلر، فقط قویون-کچئنئزی و مال-حیوانینیزی بورادا قویون.»
25موسا ددی: «سن گرک قوربانلاری و یاندیرما قوربانلارینی دا بئزه وره‌سن کی، آتامیزا تقدئم ادک. 26حیوانلاریمیز دا گرک بئزئمله گتسئن، بئر دیرناق بله بورادا قالمامالی‌دیر. چونکی آتامیزا قوللوق اتمک اوچون اونلاردان بعضئسئنی گؤتوره‌جیئک. اورایا چاتمایینجا، اونا قوللوق اتمک اوچون نَیه مؤحتاج اولدوغوموزو بئلمَیه‌جَیئک.»
27آمّا آتامیز فئرعونون اوره‌یئنی عئنادکار اتدی و او، اونلاری بوراخماغا راضی اولمادی. 28فئرعون اونا ددی: «منئم یانیمدان گت! دئقّت ات، گئنه منئم اوزومو گؤرمه، چونکی منئم اوزومو گؤردویون گون اؤله‌جکسن.»
29موسا ددی: «دوز ددئن. من بئر داها سنئن اوزونو گؤرمیه‌جَیم.»
