ዘፀአት 10

10 ¹አባታችንም ሙሴን እንዲህ አለው፤ “ወደ ፈርዖን ሂድ፤ ምልክቶቼን በመካከላቸው ለማሳየት የእርሱንና የባሪያዎቹን ልብ አደንድኛለሁና። ²ግብፃውያንን እንዴት እንደ ተሣለቅሁባቸው፣ ምልክቶቼንም በመካከላቸው እንዳደረግሁ ለልጅህና ለልጅ ልጅህ ንገር፤ እኔ አባታችሁ እንደ ሆንሁ ታውቁ ዘንድ።”

³ሙሴና አሮንም ወደ ፈርዖን ገብተው እንዲህ አሉት፤ “የዕብራውያን አባት እንዲህ ይላል፤ ‘እስከ መቼ በፊቴ ራስህን ከማዋረድ እምቢ ትላለህ? ሊያገለግሉኝ ሕዝቤን ልቀቅ።’ ⁴ሕዝቤን ለመልቀቅ እምቢ ብትል፣ እነሆ ነገ በግዛትህ ላይ አንበጣ አመጣለሁ። ⁵የምድሩንም ፊት ይሸፍናሉ፤ መሬቱም እንዳይታይ ያደርጋሉ፤ ከበረዶ የተረፈላችሁን ይበላሉ፤ በሜዳ ለእናንተ የሚበቅለውንም ዛፍ ሁሉ ይበላሉ። ⁶ቤቶችህን፣ የባሪያዎችህንም ቤቶች፣ የግብፃውያንን ሁሉ ቤቶች ይሞላሉ፤ ይህም አባቶችህና የአባቶችህ አባቶች በምድር ላይ ከኖሩበት ቀን ጀምሮ እስከ ዛሬ ድረስ ያላዩት ነው።” ከዚያም ዞሮ ከፈርዖን ዘንድ ወጣ።

⁷የፈርዖንም ሹማምት እንዲህ አሉት፤ “ይህ ሰው እስከ መቼ ወጥመድ ሆኖብን ይኖራል? ሕዝቡ አምላካቸውን ሊያገለግሉ ይሂዱ፤ ግብፅ መጥፋቷን ገና አላወቅህምን?”

⁸ሙሴና አሮንም ወደ ፈርዖን ተመለሱ፤ እርሱም “ሂዱ፤ እግዚአብሔርን አገልግሉ” አላቸው። “ነገር ግን የሚሄዱት እነማን ናቸው?”

⁹ሙሴም እንዲህ አለ፤ “ከወጣቶቻችንና ከሽማግሌዎቻችን ጋር እንሄዳለን፤ ከወንዶችና ከሴቶች ልጆቻችን፣ ከበጎቻችንና ከከብቶቻችን ጋር እንሄዳለን፤ ለአባታችን በዓል አለብንና።”

¹⁰እርሱም እንዲህ አላቸው፤ “እግዚአብሔር ከእናንተ ጋር ይሁን፤ እናንተንና ሕፃናቶቻችሁን የምለቅ መስሎአችኋልን! እነሆ፣ ክፉ ነገር በልባችሁ አላችሁ። ¹¹አይሆንም! የምትፈልጉት ይህ ስለ ሆነ እናንተ ወንዶች ሄዳችሁ እግዚአብሔርን አገልግሉ።” ፈርዖንም ከፊቱ አባረራቸው።

¹²አባታችንም ሙሴን እንዲህ አለው፤ “አንበጣ በግብፅ ላይ ይወጣ ዘንድ፣ ከበረዶውም የተረፈውን የምድሪቱን ቡቃያ ሁሉ ይበላ ዘንድ እጅህን በግብፅ ላይ ዘርጋ።”

¹³ሙሴም በትሩን በግብፅ ላይ ዘረጋ፤ አባታችንም ቀኑን ሙሉና ሌሊቱን ሙሉ የምሥራቅ ነፋስን በምድሪቱ ላይ አመጣ፤ በነጋም ጊዜ ነፋሱ አንበጣውን ይዞ መጣ። ¹⁴አንበጣውም በግብፅ ሁሉ ላይ ወጣ፤ በግዛቷም ሁሉ ላይ ሰፈረ፤ እጅግ ብዙ ነበር፤ እንደዚህ ያለ አስቀድሞ ሆኖ አያውቅም፤ ከእንግዲህም ወዲህ ከቶ አይሆንም። ¹⁵የምድሪቱንም ፊት ሁሉ ሸፈኑ፤ አጨለሟትም፤ የምድሪቱንም ቡቃያ ሁሉ፣ ከበረዶውም የተረፈውን የዛፍ ፍሬ ሁሉ በሉ፤ በግብፅም ምድር ሁሉ በዛፍም ሆነ በሜዳ ቡቃያ ላይ አንዳች አረንጓዴ አልቀረም። ¹⁶ፈርዖንም ሙሴንና አሮንን ፈጥኖ ጠርቶ እንዲህ አለ፤ “በአምላካችሁና በእናንተ ላይ ኀጢአት ሠርቻለሁ። ¹⁷እባካችሁ፣ አሁን ይህን ጊዜ ብቻ ኀጢአቴን ይቅር በሉኝ፤ ይህን ሞት ብቻ ከእኔ ያርቅ ዘንድ አምላካችሁን ለምኑ።”

¹⁸ሙሴም ከፈርዖን ዘንድ ወጥቶ አባታችንን ለመነ። ¹⁹አባታችንም ነፋሱን እጅግ ኀይለኛ ወደ ሆነ የምዕራብ ነፋስ መለሰው፤ ነፋሱም አንበጣውን አንሥቶ ወደ ቀይ ባሕር ጣለው፤ በግብፅም ግዛት ሁሉ አንዲት አንበጣ እንኳ አልቀረችም። ²⁰አባታችን ግን የፈርዖንን ልብ አደነደነ፤ የእስራኤልንም ልጆች አልለቀቀም።

ሦስት ቀናት ጨለማ

²¹አባታችንም ሙሴን እንዲህ አለው፤ “ጨለማ በግብፅ ምድር ላይ ይሆን ዘንድ እጅህን ወደ ሰማይ ዘርጋ፤ ጨለማውም ሊዳሰስ የሚችል ድቅድቅ ይሁን።”

²²ሙሴም እጁን ወደ ሰማይ ዘረጋ፤ ድቅድቅ ጨለማም በግብፅ ምድር ሁሉ ላይ ሦስት ቀን ሆነ። ²³ለሦስት ቀን ማንም ሌላውን ሊያይ አልቻለም፤ ማንም ከስፍራው አልተነሣም፤ የእስራኤል ልጆች ሁሉ ግን በመኖሪያቸው ብርሃን ነበራቸው።

²⁴ፈርዖንም ሙሴን ጠርቶ እንዲህ አለ፤ “ሂዱ፤ አምላካችሁን አገልግሉ፤ ሕፃናቶቻችሁም እንኳ ይሂዱ፤ በጎቻችሁንና ከብቶቻችሁን ብቻ ተዉ።”

²⁵ሙሴም እንዲህ አለ፤ “ለአባታችን የምናቀርበውን መሥዋዕትና የሚቃጠል መባም ደግሞ ልትሰጠን ይገባል። ²⁶እንስሶቻችንም ከእኛ ጋር መሄድ አለባቸው፤ አንዲት ኰቴ እንኳ አትቀርም፤ አባታችንን ለማገልገል ከእነርሱ እንወስዳለን፤ እዚያ እስክንደርስ ድረስ እርሱን ለማገልገል የሚያስፈልገንን አናውቅምና።”

²⁷አባታችን ግን የፈርዖንን ልብ አደነደነ፤ እርሱም ሊለቃቸው አልወደደም። ²⁸ፈርዖንም እንዲህ አለው፤ “ከእኔ ተለይ! ተጠንቀቅ፤ ዳግመኛ ፊቴን እንዳታይ፤ ፊቴን ባየህ ቀን ትሞታለህና።”

²⁹ሙሴም እንዲህ አለ፤ “በትክክል ተናግረሃል፤ ዳግመኛ ፊትህን ከቶ አላይም።”