እቲ ንምሕራድ ዝተመደበ መጓሰ

ብቓል ኣቦኡ ዘካርያስ፥ ንሕርድ ኣብ ዝተመደበ መጓሰ ኸም ጓሳ ኾይኑ ይዋሳእ፥ ነተን ክልተ ኣብትሩ፥ ፀጋን ሕብረትን ይሰብር፥ ብሰላሳ ሰቕሊ ብሩር ድማ ዓስቡ ተዋሂቡ ናብ ሰራሒ መሬት ይድርበ። ዝስዕብ ከዓ ነቲ መጓሰ ዝበልዕ ከንቱ ጓሳ እዩ።

ምዕራፍ 11።

ኦ ሊባኖስ፥ መዓፁ ናትካ ክፈት፤ ሓዊ ነኣእዋም ዝግባ ናትካ ይብላዕ! ኣልቅስ ኣታ ፅሕዲ፥ ዝግባ ወዲቑ እዩ እሞ፤ እቶም ክቡራት ኣእዋም ጠፊኦም እዮም! ኣልቅሱ ኣቱም ዓበይቲ ኣእዋም ባሳን፥ እቲ ጥቑቕ ዱር ወዲቑ እዩ እሞ! ስምዑ፥ ዋይ ዋይታ እቶም ጓሶት፥ ክብሮም ጠፊኡ እዩ እሞ! ስምዑ፥ ጓዝማ ሽደን ኣናብስ፥ ዱር ዮርዳኖስ ጠፊኡ እዩ እሞ!

ኣቦይ ከምዙይ ይብል ኣሎ፦ “ነቲ ንምሕራድ ዝተመደበ መጓሰ ጓሰዮ።”

ዓደግቶም ብዘይ ቅፅዓት ይሓርድዎም፤ ሸየጥቶም ድማ “እግዚኣብሄር ይመስገን፥ ሃብታም ኮይነ ኣለኹ!” ይብሉ፤ ጓሶቶም ድማ ኣይራህርሁሎምን። ድሕሪ ሕዚ ነቶም ህዝቢ እታ ምድሪ ኣይራህርሀሎምን እየ እሞ፥ ይብል ኣቦና። ንዅሉ ሰብ ኣሕሊፈ ኽህብ እየ፤ ንነፍሲ ወከፍ ኣብ ኢድ ብፃዩን ኣብ ኢድ ንጉሱን። ንምድሪ ድማ ክቐጥቅጥዋ እዮም፤ ኣነ ኸዓ ካብ ኢዶም ሓደኳ ኣየድሕንን እየ።

ስለዙይ ነቲ ንምሕራድ ዝተመደበ መጓሰ ጓሰኹ፥ እቶም ኣብ መጓሰ ኣዝዮም ዝተጨቈኑ ድማ። ክልተ ኣብትሪ ወሰድኩ፤ ንሓደ “ፀጋ”፥ ነቲ ኻልእ ድማ “ሕብረት” ኢለ ሰመኽዎም፤ ነቲ መጓሰ ድማ ጓሰኹ። ኣብ ሓደ ወርሒ ነቶም ሰለስተ ጓሶት ኣወገድኩ። ነፍሰይ ብእኣቶም ደኸመት፤ ንሳቶም ድማ ፀልኡኒ። ^a ሽዑ ኸምዙይ በልኩ፦ “ኣይጓስየኩምን እየ። እቲ ዝመውት ይሙት፤ እቲ ክጠፍእ ዘለዎ ይጥፋእ፤ እቶም ዝተረፉ ድማ ነንሕድሕዶም ስጋ ይበላልዑ።”

ነታ “ፀጋ” ዝተብሃለት በትረይ ወሲደ ሰበርክዋ፤ በዙይ ድማ ነቲ ምስ ኵሎም ህዝብታት ዝአተኽዎ ኪዳን ሰበርኩ። በታ መዓልቲ እቲኣ ኸዓ ተሰበረ፤ እቶም ዝጥምቱኒ ዝነበሩ ድኻታት መጓሰ ድማ እዙይ ቃል ኣቦና ምዃኑ ፈለጡ። በልክዎም ከዓ፦ “ፅቡቕ መሲሉ እንተ ተራእዩኩም፥ ዓስበይ ሃቡኒ፤ እንተ ዘይኮነ ድማ ሓድግዎ።” ንሳቶም ድማ ዓስበይ፥ ሰላሳ ሰቕሊ ብሩር መዘኑ። ^b

ሽዑ ኣቦና ኸምዙይ በለኒ፦ “ናብቲ ሰራሒ መሬት ደርብዮ”— እቲ ብእኡ ዝገመቱኒ ኽቡር ዋጋ! ኣነ ድማ ነቲ ሰላሳ ሰቕሊ ብሩር ወሲደ ኣብ ቤት ኣቦና ናብቲ ሰራሒ መሬት ደርበኽዎ።

ሽዑ ነታ “ሕብረት” ዝተብሃለት ካልአይቲ በትረይ ሰበርክዋ፤ በዙይ ድማ ነቲ ኣብ መንጎ ይሁዳን እስራኤልን ዝነበረ ሕውነት ኣፍረስኩ።

ሽዑ ኣቦና ኸምዙይ በለኒ፦ “ኣቕሓ ናይ ዓሻ ጓሳ መሊስካ ውሰድ። እንሆ፥ ኣብታ ምድሪ ሓደ ጓሳ ከተስእ እየ፤ ንሱ ነቲ ዝጠፍእ ኣይሓልን፥ ነቲ ዝተበተነ ኣይደልን፥ ነቲ ዝተሰብረ ኣይፍውስን፥ ነቲ ጥዑይ ኣይምግብን፤ ደኣ ስጋ እቶም ስቡሓት ይበልዕ፥ ሽኰናኦም ድማ ይምንጥል እምበር። ነቲ መጓሰ ዝሓድግ ከንቱ ጓሳየይ ወይለኡ! ሰይፊ ኣብ ቅልፅሙ፥ ኣብ የማናይ ዓይኑ ድማ ይውረድ! ቅልፅሙ ፈፂሙ ይነቅፅ፥ የማናይ ዓይኑ ድማ ፈፂማ ትዕወር!”