Haitila shangabü sanshuong
Jembü Bou ngüh danko Zekharia haitila shangabü sanshuong lombou yeian mangsang kümbei, haoei julo penyi, Onou si Jiyomai, sungkei, hoba chandinam sem an la munamkei, kho chaksiam kümbou to apkei. Kho phaia loubü kho sanshuong to lengan apbü, nam maubü sanlombü ki.
11 1O Lebanon, kaibü koukap shuong ipbushi, wanei kaibü cedar bu shuong suiashi! 2O busim, wailetshi, aishanga cedar bu tuongkei, hemaibü bunyu shuong leilukhümbei! Bashan saopobü bulong shuong, wailetshi, aishanga shangtüngbü yam yankei! 3Ditashi, sanlombü shuongeibü wailetbü, aishanga haoeneibü soneikangbü leilukhümbei! Ditashi, molosaonyu heshou shuongeibü ngüh, aishanga Jordan thushed shuong leilukhümbei!
4Kü Bouei hai lauda: “Haitila shangabü sanshuong pangteiashi.”
5Haoen to jekbü shuongei haoen wapettida hoba ayuktitibü akitei; haoen to yaakbü shuongei lauda, “Mühghaü nyensang kishi, ngo keibou yeia!” hoba haoeneibü sanlombü shuongeikei haoen to onou alen. 6Aishanga ngei tou ka jaüan kaodak kabü mütshuong to onou adamlabü, dogo Bouei lauda. Chühashi, ngei müt pendou mütpem weko haoeibü lepbou si haoeibü Choba ik to khümbo kulabü; haoenei kaodak jangnyinkulabü, hoba haoeneibü ik ka ngei ao to akhümenlabü.
7Hibü ngei haitila shangabü sanshuong, sanshuong yoka aeibou shieikoeko kibü shuong pangteikei. Ngei julo penyi sungan, cheeibü nyen Onou nyenan, chekei nyen Jiyomai nyenan, sanshuong pangteikei. 8Lit chea ngei sanlombü sem to apbei. Ngei haoen to anatenko apbei, hoba haoeneikei ngo to mangsenkei. a a v8 ‘Sanlombü sem’ kho aoyou kia dogo ange; hapbü ngebü shuongeibü dambü che to alokhümkei. 9Kheijinei ngei laukei, “Ngei kan ashepinlabü. Hailabü shuong hailabü, mautilabü shuong mautilabü, hoba ongbü shuongei cheei che phe shaukho.”
10Ngei kü julo Onou sungan, kho leilukei, hibü phang pendou yoa ngei kümbü theyolanyobü leilukhümbei. 11Hibü kho khünyet chalou leilukhümbei, hoba ngo to chühbü sanshuong yoka shalebü shuongei ho kho seneibü Bou ngüh ki dogo ngekei. 12Ngei haoen to laukei, “Tükde maiakei dogo chühenda longa, kü la kü mu kushi; khei ayinglonga, phoshi.” Hibü haoenei kü mu, chandinam khujin tetan chühkei. b b v12 Habü chandinam khujin kho Theyolanyobü Haanbüei Jisu totyola kubü nam dogo nyenbü tükde tegütham ki (Matthew 27:9-10).
13Kheijinei seneibü Bouei ngo to laukei, “Kho thamkümbou to attishi”—haoenei ngo to phokeibü tetbü yaangbü tükde che! Hibü ngei chandinam khujin sungan, seneibü Bou chem to, thamkümbou to attikei.
14Kheijinei ngei kü nyiboubü julo, Jiyomai, leilukhümbei, Jihuda si Israel kanglanga kibü jaisinasi kho apbei.
15Kheijinei seneibü Bouei ngo to laukei, “Tokei songsido akibü sanlombou insiaubu sungashi. 16Aishanga ngei kaodak ka sanlombou che phainei longlabü, haoei maulabü shuong apangteilabü, aalabü shuong alamlabü, leilubü shuong amaitilabü, langkei kibü shuong ahaangngaitilabü—lausikei netbü shuongeibü phe shaulabü hoba haoeneibü haak phenthetkulabü. 17Kü jim akibü sanlombou shanga ügütü, aoei sanshuong nanganapda! In haoeibü phem thüka hoba haoeibü mai nyek thüka tuongshima! Haoeibü phem lemailela ngokan apshima, hoba haoeibü mai nyek lemailela nyekthubü yeishima!”
