Bouei Hao Aabü Shousi Shuong Chem to Leishailabü
Mütshuong sanshuong tegü shoongaida, aishanga haoeneibü sanlombü hoba chemdang mühghaü shuongei haoen la ai akuda. Seneibü Bouei kü ange kho sanlombü shuong khulimbo khauangda dogo lauda; haoei jembü chanep shousi shuong uihinlabü, Ijep si Assiria ka chem to leian loulabü hoba haoen to jongailabü, aishanga haoei haoeneibü Bou ki.
10 1Khei phaibü lang jiha seneibü Bou jungto lang ngekashi— sangmei kümbü seneibü Bou; haoei haoen to lang tapnin kuda, müt pendou to seka nyem alibü kuda.
2Aishanga chemdang heangsho shuongei jim aki joyoda, hoba manghtakbü shuongei amlangbü hapda; haoenei amlangbü mangh lenda hoba jim akibü hakso kuda. Khoei mütshuong sanshuong tegü shoongaida; sanlombü akibüei haoen khonkuda.
3“Kü aeibou sanlombü shuong khulimbo khauangda, hoba ngei sanshuong leiyeibü shuong to kayang kulabü; aishanga lakjaibü dan Bouei haoeibü sanshuong, Jihuda phang pean chühkei, hoba haoen to lason to jembü soneikangbü koli tegü kümlabü. 4Hao ka chemnyek laang longlabü, hao ka neichem bu, hao ka lason lau, hao ka leiyeibü pendou chela longlabü. a a v4 Chemnyek laang, lühbak pendou ngetbü neichem bu, Jihuda ka longbü leiyeibou—Theyolanyo Haanbü Laishibaei hao to Jisu dogo nyenda, hao thüka seneibü Bouei hao mütli huongda. 5Haoen liko hau yaangbü lakjaibü tegü kilabü, lasona pühlam thime lintitilabü. Haoen wapyolabü, aishanga seneibü Bou haoen yoa kia, hoba koli khonei setbü shuong himouko kilabü.
6“Ngei Jihuda phang hau kitilabü, hoba Josef phang khümenlabü. Ngei haoen chem to leian loulabü, aishanga kü maang haoen to onouda, hoba ngei haoen ladangkei asungletbü tegü kilabü; aishanga ngo haoeneibü Bou ki, hoba ngei haoen to jongailabü. 7Kheijinei Efraim hau yaangbü lakjaibou tegü kilabü, hoba haoeneibü maang ih yungbü tegü olinlabü. Haoeneibü shousi kho chühko olinyolabü; haoeneibü maangpon seneibü Bou yoa olinyolabü. 8‘Ngei haoen shanga ngalabü hoba haoen yoshaitilabü, aishanga ngei haoen püetkei, hoba haoen shaangla juongbü tegü juonglabü. 9Mütli yoto ngei haoen lintisikei, saabü kaonyeka haoenei ngo damenlabü; haoen jembü shousi yoa langlabü, hoba haoen sepeinyu longeilabü. 10Ngei haoen Ijep kaodak ka leian loulabü hoba Assiria ka haoen yoshaitilabü; Gilead si Lebanon kaodak to haoen loulabü, haoen shanga sühshang akitilabü shongko. 11Haoen khonsak yungnyu danko loulabü; haoei yungnyu deishou shuong ngümlabü, hoba Nail haübü pendou ulangtham aplabü. Assiriabü lili yantitilabü, hoba Ijep songdak julo satetlangtilabü.’ 12Ngei haoen ngo yoa hau kitilabü, hoba kü nyena haoen pailabü, dogo seneibü Bouei lauda.”
