ዘካርያስ 10

10 ¹በጸደይ ዝናብ ወቅት የማዕበልን ደመና ከሚሠራው ከአባታችን ዝናብን ለምኑ፤ እርሱ የዝናብ ዶፍ ይሰጣቸዋል፤ ለሁሉም የዕርሻውን ለምለም ቡቃያ ይሰጣል።

²የቤት ጣዖታት ከንቱን ይናገራሉና፤ ሟርተኞችም ውሸትን ያያሉ፤ የሐሰት ሕልሞችን ይናገራሉ፤ ከንቱንም መጽናናት ይሰጣሉ። ስለዚህ ሕዝቡ እንደ በጎች ይቅበዘበዛሉ፤ እረኛ ስለሌለ ይጨነቃሉ።

³“ቍጣዬ በእረኞች ላይ ነዷል፤ የመንጋውንም መሪዎች እቀጣለሁ፤ የሰማይ ሠራዊት አባት መንጋውን የይሁዳን ቤት ጐብኝቷልና፤ እነርሱንም በጦርነት እንደ ክቡር ፈረሱ ያደርጋቸዋል። ⁴ከእርሱ የማዕዘን ድንጋይ ይወጣል፤ ከእርሱ የድንኳን ችካል፤ ከእርሱ የጦርነት ቀስት፤ ከእርሱ ገዥ ሁሉ በአንድነት ይወጣል። ^a a v4 የማዕዘን ድንጋዩ፣ ሁሉም ሸክም የሚንጠለጠልበት የድንኳን ችካሉ፣ ከይሁዳ የሚመጣው ገዥ— አዲስ ኪዳን ይህን ኢየሱስ ብሎ ይጠራዋል፤ አባታችንም ሕዝቡን በእርሱ ላይ ይሠራል። ⁵በአንድነት በጦርነት የመንገድን ጭቃ የሚረግጡ እንደ ኀያላን ተዋጊዎች ይሆናሉ። አባታችን ከእነርሱ ጋር ስለሆነ ይዋጋሉ፤ በፈረስ የሚቀመጡ ፈረሰኞችም ይዋረዳሉ።

⁶“የይሁዳን ቤት አበረታለሁ፤ የዮሴፍንም ቤት አድናለሁ። ልቤ ይራራላቸዋልና ወደ ቤታቸው እመልሳቸዋለሁ፤ ከቶ እንዳልጣልኋቸው ይሆናሉ፤ እኔ አባታቸው ነኝና፤ እመልስላቸዋለሁም። ⁷ያን ጊዜ ኤፍሬም እንደ ኀያል ተዋጊ ይሆናል፤ ልባቸውም እንደ ወይን ጠጅ ደስ ይለዋል። ልጆቻቸው አይተው ደስ ይላቸዋል፤ ልባቸውም በአባታችን ሐሤት ያደርጋል። ⁸‘ለእነርሱ አፏጫለሁ፤ እሰበስባቸዋለሁም፤ ተቤዥቻቸዋለሁና፤ እንደ ቀድሞ ዘመናቸውም ብዙ ይሆናሉ። ⁹በሕዝቦች መካከል ብበትናቸውም፤ በሩቅ አገሮች ያስታውሱኛል፤ ከልጆቻቸው ጋር ይኖራሉ፤ ይመለሳሉም። ¹⁰ከግብፅ ምድር ወደ ቤታቸው እመልሳቸዋለሁ፤ ከአሦርም እሰበስባቸዋለሁ፤ ወደ ገለዓድና ወደ ሊባኖስ ምድር አመጣቸዋለሁ፤ ለእነርሱም ስፍራ እስኪያጥር ድረስ። ¹¹በመከራ ባሕር ውስጥ ያልፋሉ፤ የባሕሩን ማዕበል ይመታል፤ የናይል ጥልቅ ውሃ ሁሉ ይደርቃል። የአሦር ትዕቢት ዝቅ ይደረጋል፤ የግብፅም በትረ መንግሥት ያልፋል።’ ¹²በእኔ አበረታቸዋለሁ፤ በስሜም ይመላለሳሉ፤ ይላል አባታችን።”