Baba Asagumanya Ana Ace Akubalalika Toera Abwerere Kunyumba
Mbumba isadzungaira ninga mabira thangwi abusa awo na nkhuni za m'nyumba nkhabe kuapasa cinthu. Baba wathu asalonga kuti ukali wace usapsa kuna abusa anewo; iye anadzaimbira muluzi ana ace akumwazika, mbaabweza kubulukira ku Edjipitu na Asiriya, mbaatawira, thangwi iye ndi Baba wawo.
10 1Phembani madzi kuna Baba wathu mu n'dzidzi wa mabvumbi a masika—Baba wathu ule asacita makole a mphepo; Iye asaapasa mabvumbi a madzi, kuna munthu onsene asapasa uswa wauwisi wa m'munda.
2Thangwi milungu ya m'nyumba isalonga pyapezi, na anyakuwombeza asaona pyauthambi; iwo asalonga ndoto zauthambi mbapereka cibalangazo capezi. Na tenepo mbumba isayendayenda ninga mabira; iwo asathabuka thangwi nkhabe m'kumbizi.
3“Ukali wanga usapfula akumbizi, ndinatcunyusa atsogoleri a nkumbi; thangwi Baba wa mankhondo a kudzulu anyang'anira nkumbi wace, panyumba ya Yuda, mbaacita iwo ninga kavalo wace waukulu wa mbiri pa nkhondo. 4Kubuluka kwa iye kunabwera mwala wa nkhombo, kubuluka kwa iye cikhomo ca tenda, kubuluka kwa iye uta wa nkhondo, kubuluka kwa iye atongi onsene pabodzi. a a v4 Mwala wa nkhombo, cikhomo ca tenda cakuti pyonsene pisakhomeka pa ico, ntongi ule anabuluka mu Yuda — Pangano Lipsa lisan'cemera Iye kuti ndi Yezu, ule Baba wathu asamangira mbumba yace pa Iye. 5Pabodzi anadzakhala ninga anyankhondo amphambvu, mbapwanya matope a m'miseu pa nkhondo. Iwo anamenya nkhondo, thangwi Baba wathu ali pabodzi na iwo, na akwereri a makavalo anadzapaswa manyadzo.
6“Ndinawangisa panyumba ya Yuda, ndinapulumusa panyumba ya Zuze. Ndinaabweza kunyumba, thangwi ndisaabvera ntsisi, iwo anadzakhala ninga Ine nee ndidaaramba iwo; thangwi Ine ndine Baba wawo, mbandiatawira. 7Penepo Efraimu anadzakhala ninga nyankhondo wamphambvu, mitima yawo inadzatsandzaya ninga munthu adamwa vinyu. Ana awo anadzapiona mbatsandzaya; mitima yawo inadzakomerwa kakamwe mwa Baba wathu. 8‘Ndinaalizira muluzi mbandiagumanya iwo, thangwi ndaawombola iwo, anadzakhala azinji ninga mukhaliri iwo kale. 9Maseze ndaabalalisa pakati pa madzindza, ku mataka a kutali iwo anadzandikumbuka; anadzakhala na umaso, pabodzi na ana awo, mbabwerera kunyumba. 10Ndinaabweza kunyumba kubuluka ku dziko ya Edjipitu mbandiagumanya kubuluka ku Asiriya; ndinaafikisa ku dziko ya Gileyadi na Libanu, mpaka kusoweka mbuto toera iwo onsene akwane. 11Anadzapita mu bara ya nyatwa; Iye anadzamenya mafunde a bara, na madzi onsene akuzika a Nilu anadzauma. Kudzikuza kwa Asiriya kunadzacepeswa, na ndodo yaumambo ya Edjipitu inadzamala.’ 12Ndinaawangisa mwa Ine, mbafamba mu dzina yanga, asalonga Baba wathu.”
