Avāna Awui Raithā Kahai Naongarābingli Shimli Kazipkhui
Yaokahomabing kala shimwui meoma̱bingna khikha mamiwui vang mibingna yao thāda ma̱zata. Ithumwui Avāna yaokahomabing chiwuitungli iwui malungvāt kathuia da hānga; ana tākhuisai kahai naongarābingli hokhuira, Egypt eina Assyriawui eina shimli khuiungra, kala athumli ngahānkāra, khikhalajila ava athumwui Avāna.
10 1Mayo kachāng zingrot atamli, sur muiyā sākhame ithumwui Avāli zingrot khangasanlu; ana athumli zingrotra̱ mira, kala mi saikorali luiwukwui matekchim kashon mira.
2Kaja shimkhurwui meoma̱bingna aremawui tui matui, kala khanongbingna kakapik theila; athumna kakapik mang hānga kala aremawui ringpha ngasaka. Chiwui vang mibingna yao thāda zatkhangaihaira; yaokahoma maleiwui vang athum chotchānghaira.
3"Iwui malungkhavāt yaokahomabingtungli chuita, kala yao ashangva̱wui akhokabingli ina tandi mira; kaja kazingramwui raikapingabingwui Avāna awui yao ashangva̱, Judah shimkhurli ngachonmihaira, kala raili awui khayākakā sigui thāda athumli sāra. 4Awui eina achithekwui akhoka lunggui, awui eina kachonshimwui thing shun, awui eina raiwui malā, awui eina khamungabing katonga shokra. a a v4 Achithekwui akhoka lunggui, ot saikora khorkhong hokthang khavai kachonshimwui thing shun, Judahwui eina marā khamunga—Kadhara Katharna ali Jishu da phokmi, awuitungli ithumwui Avāna awui mibingli sakai. 5Katonga athum raili chānreiwui leipā naikazamda, raikapinga pangshap thāda ngasāra. Athum ngararra, kaja ithumwui Avā athumli ngasoda lei, kala sigui katongbingli maishi ngasakra.
6"Judah shimkhurli ina pangngasakra, kala Joseph shimkhurli ina huimira. Ina athumli shimli hokhui ngasakra, kaja athumtungli iwui lukhamashana pemtinghai, kala athum ina mahorkahai thāda ngasāra; kaja ina athumwui Avāna, kala ina athumli ngahānkāmira. 7Chieina Ephraim raikapinga pangshap thāda ngasāra, kala athumwui ning drakhāra̱ mang thāda mathānra. Athumwui naongarābingna chi theida ringphāra; athumwui ning ithumwui Avāli sochikatra. 8'Ina athumwui vang masikhon eina hokhuira, kala athumli rākazipkhuira, kaja ina athumli ngatangmihaira, kala athum atam akhali kachungkha leikahai thāda kachungkha ngasāra. 9Ina athumli yurbing ngachaili chaiyāngmilala, katāva̱ ngaleibingli athumna ili phaningungra; athum athumwui naongarābingla ngasoda ringra, kala athum latungra. 10Ina athumli Egypt ngaleiwui eina hokhui ngasakra kala Assyriawui eina athumli kazipkhuira; Gilead kala Lebanon ngaleili athumwui vang apam maleiraranglakha eina tangda ina athumli khuirāra. 11Athum ningkachotwui ngayi chi ngaruivāra; ana ngayiwui khangaphaotungli sāthata, kala Nilewui kathuka saikora thenghaora. Assyriawui kachui chi ngakhuntaihaora, kala Egyptwui khānthing kānthuihaora.' 12Ina athumli iwui lungli pangngasakra, kala athum iwui ming eina zatra, da ithumwui Avāna hānga."
