Zacarias 10

10 ¹Pangayo ug ulan gikan sa atong Amahan sa panahon sa tingpamulak nga mga ulan—ang atong Amahan nga naghimo sa mga dag-om; siya naghatag kanila ug mga bunok sa ulan, ngadto sa matag usa ang lunhaw nga tanom sa uma.

²Kay ang mga dios-dios sa panimalay nagsulti ug kakawangan, ug ang mga mananagna nakakita ug bakak; nagsugilon sila ug mga bakak nga damgo ug naghatag ug walay pulos nga paglipay. Busa ang katawhan naglatagaw sama sa mga karnero; sila gisakit kay walay magbalantay.

³“Ang akong kasuko misilaob batok sa mga magbalantay, ug silotan ko ang mga pangulo sa panon; kay ang Amahan sa kasundalohan sa langit midu-aw sa iyang panon, ang balay ni Juda, ug iyang himuon sila nga sama sa iyang mahimayaong kabayo sa gubat. ⁴Gikan kaniya moabot ang batong pamag-ang, gikan kaniya ang ugsok sa tolda, gikan kaniya ang pana sa gubat, gikan kaniya ang matag magmamando nga magkahiusa. ^a a v4 Ang batong pamag-ang, ang ugsok sa tolda nga gibitayan sa tanang gibug-aton, ang magmamando nga naggikan kang Juda—ginganlan siya sa Bag-ong Tugon nga si Jesus, nga pinaagi kaniya gitukod sa atong Amahan ang iyang katawhan. ⁵Mag-usa silang mahisama sa gamhanang mga manggugubat, nga magtunob-tunob sa lapok sa kadalanan sa gubat. Makig-away sila, kay ang atong Amahan nagauban kanila, ug maulawan ang mga nagkabayo.

⁶“Lig-onon ko ang balay ni Juda, ug luwason ko ang balay ni Jose. Dad-on ko sila pauli, kay naluoy ang akong kasingkasing kanila, ug mahisama sila nga daw wala ko gayod isalikway sila; kay ako ang ilang Amahan, ug tubagon ko sila. ⁷Unya si Efraim mahisama sa usa ka gamhanang manggugubat, ug ang ilang mga kasingkasing magmalipayon nga daw sa bino. Ang ilang mga anak makakita niini ug maglipay; ang ilang mga kasingkasing magmaya diha sa atong Amahan. ⁸‘Taghoyan ko sila ug tigomon ko sila, kay gitubos ko sila, ug modaghan sila sama kaniadto. ⁹Bisan tuod ikatag ko sila taliwala sa mga katawhan, sa halayong mga yuta mahinumdom sila kanako; mabuhi sila, uban sa ilang mga anak, ug mobalik sila. ¹⁰Dad-on ko sila pauli gikan sa yuta sa Ehipto ug tigomon ko sila gikan sa Asiria; dad-on ko sila ngadto sa yuta sa Galaad ug Lebanon, hangtod nga wala nay luna alang kanila. ¹¹Molabang sila sa dagat sa kasakit; pukanon niya ang mga balod sa dagat, ug mamala ang tanang kahiladman sa Nilo. Ipaubos ang garbo sa Asiria, ug mawala ang setro sa Ehipto.’ ¹²Lig-onon ko sila diha kanako, ug sa akong ngalan magalakaw sila, nag-ingon ang atong Amahan.”