Tebui pei prokshiba chirtem kidangi senteptsü
Nisungtem san ama nemzür, kechiaser pei sannükertem aser pei kibong süngyanglutemi parnok dang kecha mayok. Asen Tebui kü ain iba sannükertem anema adoker ta shir; pai pa chirtem rara nung aliba dang washia kongzüa, Ijip aser Asiria nungi anir aruta, aser parnok langzütsü, kechiaser pai parnok Tebu lir.
10 1Tebu dangi tesüben tzünglu mapang nung tzünglu asüngdangang— tsüngrem mopung mepet maketba Tebu dangi; pai parnok dang tzünglu tsükdaktsür, nisung shia dang alu nung rem lanu agütsü.
2Kechiaser kibong süngyanglu tsüngremi amajok jembir, aser arasentsürtemi tiyazü angur; parnoki tiyazü pungmang jembir aser amajok tesünep agütsür. Anungji nisungtem san ama nemzür; sannüker mali kechiaser parnok timtema lir.
3“Kü ain sannükertem anema adoker, aser nai san telok lenirtem merenshitsü; kechiaser Temeranger Telok Tebui pei san telok, Yihuda kidong, semdangogo, aser pai parnok rara nung pei kor majemtsü ama kümdaktsütsü. 4Pa nungi kinük lung tongtiba adoktsü, pa nungi süki asongba süng, pa nungi rara lijakjang, pa nungi yimsüsür ajak külemi adoktsü. a a v4 Kinük lung tongtiba, jenjang ajak tongtetba süki asongba süng, Yihuda nungi aruba yimsüsür — O Tasen nung pa Yisu ta ajar, pa kübok Tebui pei nübur yanglur. 5Parnok külemi tashi tulu temeranger ama alitsü, rara nung yimdong lishi prokshitsü. Parnok raratsü, kechiaser Tebu parnok den lir, aser kor asangertem maksüa yutsü.
6“Nai Yihuda kidong tashi itdaktsü, aser nai Yosef kidong kümzüktsü. Ni parnok kidangi anir arutsü, kechiaser kü mulung parnok dang aochir, aser nai parnok kodanga magizük manung ama alitsü; kechiaser ni parnok Tebu lir, aser nai parnok langzütsü. 7Anungji Efraim tashi tulu temeranger ama alitsü, aser parnok mulung yi agi ama pelatsü. Parnok chirtem iba angua pelatsü; parnok mulung Tebu nung washilokja alitsü. 8‘Ni parnok moapu senteptsü, kechiaser nai parnok alangzükogo, aser parnok tamasa ama teperi alitsü. 9Nai parnok nüburtem rongnung prokshidaktsüaka, anasa linük nung parnoki ni remtsü; parnok pei chirtem den külemi taküm alitsü, aser parnok meyipa arutsü. 10Ni parnok Ijip lima nungi anir arutsü, aser nai Asiria nungi parnok senteptsü; ni parnok Gilead aser Lebanon lima nung anir arutsü, oda parnok asoshi taktang mali tashi. 11Parnok timtem tzüyim ajanga arutsü; pai tzüyim tzüsem akoktsü, aser Nile ayong tarok ajak kongdaktsü. Asiria asüküm ajemaludaktsü, aser Ijip chuba mechi pilatsü.’ 12Ni nung nai parnok tashi itdaktsü, aser kü tenüng nung parnok jajatsü, ta Tebui ashir.”