ዘካርያስ 9

9 ¹ንግር፦ የአባታችን ቃል በሐድራክ ምድር ላይ ነው፤ ደማስቆም ማረፊያው ናት፤ የሰው ልጆችና የእስራኤል ነገዶች ሁሉ ዐይን ወደ አባታችን ነውና፤ ²ድንበሩ በሆነችው በሐማትም ላይ፣ እንዲሁም እጅግ ጠቢባን ቢሆኑም በጢሮስና በሲዶና ላይ ነው። ³ጢሮስ ለራሷ ምሽግ ሠራች፤ ብርን እንደ ትቢያ፣ ጥሩ ወርቅንም እንደ አደባባይ ጭቃ አከማቸች። ⁴እነሆ ግን፣ ጌታ አባታችን ያሳጣታል፤ በባሕር ላይ ያላትን ኀይል ይመታል፤ እርሷም በእሳት ትበላለች። ⁵አስቀሎና ይህን አይታ ትፈራለች፤ ጋዛም እጅግ በጭንቅ ትወራጫለች፤ አቃሮንም እንዲሁ፣ ተስፋዋ ጠውልጓልና። ንጉሥ ከጋዛ ይጠፋል፤ አስቀሎናም ሰው አይኖርባትም።

⁶“ዲቃላ ሕዝብ በአስዶድ ይሰፍራል፤ የፍልስጥኤማውያንንም ትዕቢት እቈርጣለሁ። ⁷ደሙን ከአፉ፣ ርኩሰቱንም ከጥርሶቹ መካከል አስወግዳለሁ፤ እርሱም ደግሞ ለአባታችን ቅሬታ ይሆናል፤ በይሁዳም እንዳለ ጎሣ፣ አቃሮንም እንደ ኢያቡሳውያን ይሆናል። ⁸በዚያን ጊዜ ማንም ወዲያና ወዲህ እንዳያልፍ፣ በቤቴ ዙሪያ እንደ ጠባቂ ሰፍሬ እጠብቃለሁ፤ ከእንግዲህ ወዲህ ጨቋኝ አይወርራቸውም፤ አሁን በገዛ ዐይኔ እጠብቃለሁና።”

ንጉሥሽ ይመጣል

⁹የጽዮን ልጅ ሆይ፣ እጅግ ደስ ይበልሽ! የኢየሩሳሌም ልጅ ሆይ፣ እልል በዪ! እነሆ፣ ንጉሥሽ ወደ አንቺ ይመጣል፤ እርሱ ጻድቅና ድል አድራጊ፣ ትሑትም ሆኖ በአህያ ላይ፣ በውርንጫ፣ በአህያ ግልገል ላይ ተቀምጦ ይመጣል። ^a a v9 በአህያ ላይ ተቀምጦ የሚመጣው ገር ንጉሥ ኢየሱስ ነው፤ እርሱም ልክ በዚሁ ሁኔታ ወደ ኢየሩሳሌም ገብቷል — ማቴዎስ 21፥5፤ ዮሐንስ 12፥15። ¹⁰ሠረገላን ከኤፍሬም፣ የጦር ፈረስንም ከኢየሩሳሌም እቈርጣለሁ፤ የጦር ቀስትም ይቈረጣል፤ እርሱም ለአሕዛብ ሰላምን ይናገራል። ግዛቱም ከባሕር እስከ ባሕር፣ ከወንዙም እስከ ምድር ዳርቻ ይደርሳል። ^b b v10 “ወንዙ” የሚባለው ኤፍራጥስን ያመለክታል፤ እርሱም በጥንታዊው የቅርብ ምሥራቅ ታላቅ የድንበር ወንዝ ነበር።

¹¹“አንቺም ብትሆኚ፣ ከአንቺ ጋራ ስላለው የኪዳኔ ደም፣ እስረኞችሽን ውሃ ከሌለው ጒድጓድ ነጻ አወጣለሁ። ¹²ወደ አምባችሁ ተመለሱ፤ እናንተ የተስፋ እስረኞች ሆይ፤ ዛሬ የማውጀው ይህ ነው፦ እጥፍ እመልስላችኋለሁ። ¹³ይሁዳን እንደ ቀስቴ ገትሬአለሁና፤ ኤፍሬምንም እንደ ፍላጻ አድርጌአለሁ። ጽዮን ሆይ፣ ልጆችሽን በግሪክ ልጆችሽ ላይ አስነሣለሁ፤ እንደ ተዋጊም ሰይፍ አደርግሻለሁ።”

¹⁴በዚያን ጊዜ አባታችን በላያቸው ይገለጣል፤ ፍላጻውም እንደ መብረቅ ይወጣል፤ ጌታ አባታችን መለከትን ይነፋል፤ በደቡብም ዐውሎ ነፋስ ይዘምታል። ¹⁵የሰማይ ሠራዊት አባታችን ይጋርዳቸዋል፤ የወንጭፍ ድንጋዮችንም በልተው ይረግጣሉ፤ ጠጥተውም እንደ ወይን ይጮኻሉ፤ እንደ ጽዋም ይሞላሉ፤ እንደ መሠዊያው ማዕዘኖችም ይረጠባሉ። ¹⁶በዚያ ቀን አባታቸው እንደ ሕዝቡ መንጋ ያድናቸዋል፤ እንደ ዘውድ ዕንቍዎች በምድሩ ላይ ያበራሉና። ¹⁷ቸርነቱ እንዴት ታላቅ ነው! ውበቱስ እንዴት ያማረ ነው! እህል ጐበዛዝቱን ያለመልማል፤ አዲስ ወይንም ቈነጃጅትን ያለመልማል።