Bouei Phangshuong to Matjemda
Seneibü Bou matjem kho Israel koman kaodak shuong khulimbo koukei, lausikei kaijembo kho Zion to loubü Choba ki—saopobü, wapyobü, hoba eaaoabü, gadua setbü, haitibü shongh suian apbü hoba phang shuong to sangmai lenbü. Ngeyangbü thüngbü shuong to haoen thüka hoei sepeian kulabü dogo lenkei.
9 1Ngühphatbü che: seneibü Bou ngüh Hadrach kaonyek khulimbo ki, hoba Damaska khoeibü chaangbou ki— aishanga müteibü nyek hoba Israelbü chung pendou seneibü Bou thedang ki, 2hoba Hamat khulimbo joyoko, kho khoeibü leilang kibü, hoba Tair si Sidon khulimbo, haoen aeibou songsido kisikei. 3Tairei jem shanga lapheishon che dangkei, hoba thamngu tegü peisi shaangkei, hoba khong kabü thime tegü hon maibü shaangkei. 4Lausikei chühashi—Thükenbou Bouei hao shian aplabü hoba yungnyua haoeibü hau thüklabü, hoba hao inei suian aplabü. 5Ashkelonei kho hapan hatko kitelabü; Gazakei joyoko hangshong khonkulabü, hoba Ekronkei, aishanga khoeibü maanglem setda. Gaza ka Choba maulabü, hoba Ashkelon to müt akilabü.
6“Mongan kibü mütshuong Ashdoda settilabü, hoba ngei Filistiabü lilibü sungngailabü. 7Ngei khoeibü sembung ka sii hoba hauh kanglang ka khoeibü mangsenlabü sungngailabü; khokei seneibü Bou shanga joubü kilabü, hoba kho Jihuda yoa chung che tegü kilabü, hoba Ekron Jebusbü tegü kilabü. 8Kheijinei ngei kü chem to lombou tegü shaian kilabü, aoeikei kümbo ahaulabü hoba aloulabü; touje yaman songdakboueikei haoen to aloulabü, aishanga tou ngei kü lolo nyekei chühko kia.”
Kaibü Choba Louda
9Zion nouyangshou, aeibou olinyoashi! Jerusalem nouyangshou, ngüh angko ngekashi! Chühashi—kaibü Choba ka jungto louda; hao saopobü hoba thükbou ki, eaaoabü hoba gadua setan, gadu shoushou, gadueibü shoushou thüka setan. a a v9 Gadua setan loubü thuibü Choba kho Jisu ki, aoei habü tegütham ong Jerusalem to atkei — Matthew 21:5; John 12:15. 10Ngei Efraim ka kailong sungngailabü, hoba Jerusalem ka lason koli sungngailabü, hoba lason lau sungngaian kilabü; hoba haoei phangshuong to hakso joyolabü. Haoeibü songdakbü yungnyu ka yungnyu sühko, hoba shumang ka kaonyudak thonbü sühko kilabü. b b v10 ‘Shumang’ kho Eufrates shumang to lauda, shangiedbü chaloua Near East kaodakbü leilang yaangbü shumang kikei.
11“No shangakei joyoko, ngo ka yoa theyolanyobü sii shanga, ngei kaibü thüngbü shuong dei akibü püngkhün ka litilabü. 12Kaibü lapheishon to sepeiashi, kan maanglembü thüngbü shuong; tat ka ngei thekolanko lauda, ngei ka la phejan penyi longeitilabü. 13Aishanga ngei Jihuda to kü lau tegü bühenkei, hoba Efraim to laujin tegü kho thüka phokei. O Zion, ngei kaibü shousi shuong to pitilabü, O Grik, kaibü shousi shuong khulimbo, hoba ka to lakjaibou in tegü yeitilabü.”
14Kheijinei seneibü Bou haoen thüka tang khitlabü, hoba haoeibü laujin langpon tegü meimeijung haulabü; Thükenbou Bouei teklaang metlabü hoba yungkük aekabü hak kaangbü yoa meimeijung haulabü. 15Thükenbou Bouei haoen to shieikoelabü, hoba haoenei phekhon laang shauan aplabü hoba lintilabü; haoen ih yungbü tegü yungan ngühkulabü, hoba shem tegü jakalabü, lembü kushang chemnyek tegü siiei jakalabü. 16Khübü chaloua haoeneibü Bouei haoen hao mütli sanlon tegü khümenlabü; aishanga khun namseklaang tegü haoen haoeibü kaonyek thüka ngesaklabü. 17Haoeibü maibü aeibou yaangbou, hoba haoeibü hemaibü aeibou yaangbou! Youshouei bousu younak pungtilabü, hoba ih haanbüei yaksa younak pungtilabü.
