Mi eng' bukuit

2 Ateptap Peetuusyek 6 FHB Father's Heart Bible™

Kiistoi 15% eng' kiy ne iale korook →
Bukuit

Kalasunji Solomon Kwanda eng' taitap Israel tugul

Ki beruur Solomon piik, ak kogutuny eng' tononet ne po sugunwet, ak kosaaei. Ingen keele ma muuchi komenye Kwandanyi agot kipsengwet, ara kosoome kiit age kogeny ak kogeny: koteiye koonyek ak itik koyaaten koba komosinooto—eng' pooryeet, eng' melelda, eng' rubeet, ak eng' keenet.

Ng'alaali Kwandanyo eng' mustarisyek 5–6, 8–9

Sura 6.

Yeityo kong'alaal Solomon kole, “Kimwa Kwandanyo kole, menyei eng' mesundeito ne oo. Ago kaateegun koot ne toroor, komostang'ung' ne imenye koigeny.”

Kiwelelgei anyun laitoryat ak koberuur tuiyetap Israel tugul, ye tononie tugul. Kole, “Kong'oi Kwandanyo, Kamuktaindetap Israel, ne kagosulda eunnyi ne ki kayomisyi kutinnyi kwandanyu Daudi, koleenji,

‘Kobooch peetuut ne ki amut piikyuk komong' eng' Misiri, ma ki alewen nganaseet age eng' ortinwegap Israel tugul koteekyi koot kainennyu komi olooto, anan chiito age ne ki aleen kobou piikyuk Israel. Ago ki alewen Jerusalem si komi kainennyu olooto, ak ki alewen Daudi kobou piikyuk Israel.’

Ki mi muguleldap Daudi kwandanyu koteekyi koot kainetap Kwandanyo, Kamuktaindetap Israel.

Ago ki leenji Kwandanyo Daudi kwandanyu, ‘Amu ki imache muguleldang'ung' iteek koot ne po kainennyu, ko ki iyai ne myee amu ki ibwaat niito eng' muguleldang'ung'. Ago ma iteep koot inyee; weeriing'ung' ne manda eng' boortang'ung'—ineendet tuun teekyi koot kainennyu.’

Nguno kagosulda Kwandanyo ng'olyoot ne ki mwa: kaek anee eng' oldap Daudi kwandanyu, ak atebee ng'echereetap laitornatet ne po Israel, ko uu ye kigayomisyi, ak kaateegun koot kainetap Kwandanyo, Kamuktaindetap Israel. Ki ande olooto emait, ne tinyei arorutyet ne ki yai Kwandanyo kobooto piigap Israel.”

Kotabaan Solomon kootap Kwanda eng' saaet

Ki tonon anyun Solomon eng' taitap kaptisisyetap Kwandanyo, eng' taitap tuiyetap Israel tugul, ak kochuul eunekyik. Ki kayai Solomon ng'echereet ne po shaba, ne tinyei fut tisap ak nus eng' koiyet, fut tisap ak nus eng' pelelet, ak fut ang'wan ak nus eng' lelaet, ak konde eng' kwenutap seremut. Ki tonon ineendet parak, ak kigutuny eng' taitap tuiyetap Israel tugul, ak kochuul eunekyik kotokyi kipsengwet. Kole, Ee Kwandanyu, Kamuktaindetap Israel, ma mi Kwanda age ne uu inyee, eng' kipsengwet, anan eng' ng'wony; ne riibei arorutyet ak iboorchini rireenet otwogiguk, che pendi taing'ung' eng' mugulelwekwak komugul. Ki iriip kayomisennyi eng' otwogindeng'ung' Daudi kwandanyu; ne ki imwa eng' kuting'ung' kagosulda eng' eung'ung' rani.

Ara anyun, Kwandanyu, Kamuktaindetap Israel, iriipchi otwogindeng'ung' Daudi kwandanyu ne ki iyomis ileenji, “Ma petenen chiito ne tebee tainnyu ng'echereetap laitornatet ne po Israel, ngot koririiptos weeriiguk ooreekwak si kosup ng'atuutyennyu, ko uu ye ki isupchin taing'ung'.” Ara anyun, Kwandanyu, Kamuktaindetap Israel, ingogimiit ng'olyoot ne ki imwachi otwogindeng'ung' Daudi.

Ago tos meny Kwandanyo kobooto piik eng' ng'wony iman? Keero, ma yamin kipsengwet, anan kipsengwet ne po parak miising', kot koteerin; ko ming'in ne tya anyun kooni ne kaateegun! a a v18 Kouowo Solomon kole meny Kwandanyo kobooto piik eng' ng'wony—mageet ne ki kaanyooru ye ki nyo Weeriit komeny kwenunnyo, ak let ye meny Kwandanyo kobooto lagokyik koigeny. Ago konyit saaetap otwogindeng'ung' ak soomennyi, Ee Kwandanyu, igas riirennyi ak saaet ne isaaei otwogindeng'ung' eng' taing'ung'. Ingotoretos konyeguk kotokyi kooni, peetuut ak keemeet, kotokyi olooto ne ki imwa ile inde kaineng'ung', si igas saaet ne saaei otwogindeng'ung' kotokyi oli. Igas soomennyi otwogindeng'ung' ak che po piiguk Israel ye saaei kotokyi oli. Igas eng' kipsengwet, oldang'ung' ole imenye; ak ye igas, inyochi.

Ngot kotengek chiito eng' chietuyennyi ak koyasyo yasyoet, ak konyo koyasyo yasyoennyi eng' taitap kaptisisyeng'ung' eng' kooni, igas anyun eng' kipsengwet, ak iyai kiy, irwoogchini otwogiguk, irepchi ne kalel ortinwekyik, ak igikyi ne po iman, igoochi ko uu imandanyi.

Ngot kebar puunik piiguk Israel amu kagotengekchin, ak koweek kolasunji kaineng'ung', ak kosa, ak kosoom eng' kooni, igas anyun eng' kipsengwet, inyochi tengekto ne po piiguk Israel, ak iweekyi icheek emet ne ki igoochi icheek ak kwanisyekwak.

Ye kager kipsengwet kot koma ropta amu kagotengekchin, ngot kosaaei kotokyi oli, ak kolasunji kaineng'ung', ak koweeksei eng' tengekwekwak ye inyalili, igas anyun eng' kipsengwet, inyochi tengekwegap otwogiguk, piiguk Israel, ye ineet icheek ooreet ne myee ne kopendi, ak iutyini ropta eng' emeng'ung', emet ne ki igoochini piiguk koek nenywa.

Ngot kobiit rubeet eng' emet, anan koroito, anan chelalityet, anan mildogei, anan chereng'endet, anan kutyet; ngot koyiem puunik icheek eng' nganasookwak; koroito age tugul anan myando age tugul ne piitu, saaet age tugul anan soomet age tugul ne kayai chii age tugul, anan piiguk tugul che po Israel, ne naei chii age tugul myandap ak nyalildap muguleldanyi, ak kochuul eunekyik kotokyi kooni, igas anyun eng' kipsengwet, oldang'ung' ole imenye, ak inyochi, ak irepchi chii age tugul ko uu ortinwekyik tugul, amu ingen muguleldanyi—amu inyee kityo ne ingen muguleldap chii age tugul, si koiywein ak kopendi ooreeguk, agoi peetuusyek tugul che sabei eng' emet ne ki igoochi kwanisyekwok.

Ko uu nooto, ye nyoonu toondet ne ma po piiguk Israel, kobunu emet ne loo amu kaineng'ung' ne oo, ak eung'ung' ne kiim, ak eung'ung' ne chuulaat—ye nyoonu ak kosaai kotokyi kooni, igas anyun eng' kipsengwet oldang'ung' ole imenye, ak iyai tugul che soomin chiichooto ne po pororyosyek, si konai pororyosyek tugul che po ng'wony kaineng'ung' ak koiywein, ko uu piiguk Israel, ak konai kole kooni ne kaateegun kotinyei kaineng'ung'.

Ngot koba piiguk lugeet kobargei ak puunikwak eng' olooto age tugul ne iyookto icheek, ak kosaain kotokyi nganaseet ne ki ilewen ak koot ne kaateegun kaineng'ung', Igas eng' kipsengwet saaennywa ak soomennywa, ak itoretchini icheek eng' ng'aleekwak.

Ngot kotengekchin, amu ma mi chii age ne ma yaei tengek, ak inereech, ak igoochi puunik icheek, che imut icheek koluul koba emet ne loo anan ne neegit,

ago ngot eng' emet ne kiga koluul icheek ko koip eng' mugulelwekwak, ak koweeksei ak kosoom olooto, koleen, “Kigetengek, ki keyai ne ya, ki keyai yaityet,” ngot koweeksei inyee eng' mugulelwekwak tugul ak saboonwekwak tugul, eng' emet ne po luuleet ne ki kiluule, ak kosaa kotokyi emetap icheek ne ki igoochi kwanisyekwak, ak nganaseet ne ki ilewen, ak koot ne kaateegun agobo kaineng'ung', igas anyun eng' kipsengwet, oldang'ung' ole imenye, saaennywa ak soomennywa, ak itoretchini icheek eng' ng'aleekwak, ak inyochi piiguk che ki yachin.

Nguno, Kwandanyu, ingong'aat konyeguk, ak ingogas itiik saaet ne po oli.

Ak nguno ng'eet, Kwandanyu, ak inyo oldang'ung' ole imuung'e, inyee ak sandukutap kimnateng'ung'. Ingolaakyin tisiik, Kwandanyu, yetunet, ak ingoboiboitu piiguk che iman eng' myeeindong'ung'. Kwandanyu, matiwech ne ki iil inyee. Ibwaat rireeneng'ung' ne agobo Daudi otwogindeng'ung'.