Sulemanu Ya Yabi Uba a Gaban Dukan Isra'ila

Sulemanu ya albarkaci jama'a, ya durƙusa a kan dakalin tagulla, ya yi addu'a. Ya sani sama kanta ba za ta iya ɗaukar Ubansa ba, don haka ya roƙi abu ɗaya sau da sau: idanunsa da kunnuwansa su kasance a buɗe ga wannan wuri — sa'ad da aka ci su da yaƙi, cikin fari, yunwa, da zaman talala.

Babi na 6.

Sai Sulemanu ya ce, “Ubanmu ya ce zai zauna cikin bakin duhu. Amma na gina maka gida mai ɗaukaka, wuri da za ka zauna a ciki har abada.”

Sai sarki ya juya ya sa wa dukan taron Isra'ila albarka, suna kuwa tsaye duka. Ya ce, “Ku yabi Ubanmu, Allah na Isra'ila, wanda hannunsa ya cika abin da bakinsa ya yi alkawari ga mahaifina Dawuda, cewa,

‘Tun ranar da na fitar da mutanena daga Masar, ban zaɓi wani birni daga cikin dukan kabilan Isra'ila da za a gina gida don sunana yă kasance a can ba, ba kuwa wani mutum da zai yi mulkin mutanena Isra'ila ba. Amma na zaɓi Urushalima don sunana yă kasance a can, na kuma zaɓi Dawuda yă shugabanci mutanena Isra'ila.’

Dawuda mahaifina ya yi niyya a zuciyarsa yă gina gida saboda sunan Ubanmu, Allah na Isra'ila.

Amma Ubanmu ya ce wa Dawuda mahaifina, ‘Da yake ka yi niyya a zuciyarka ka gina gida saboda sunana, ka yi kyau da ka yi wannan niyya. Amma ba kai za ka gina gidan ba; ɗanka, wanda zai fito daga jikinka—shi ne zai gina gida saboda sunana.’

Yanzu kuwa Ubanmu ya cika maganar da ya faɗa: na gāji Dawuda mahaifina na kuma zauna a kan gadon sarautar Isra'ila, yadda ya yi alkawari, na kuma gina gida saboda sunan Ubanmu, Allah na Isra'ila. A can kuwa na ajiye akwatin alkawari, wanda yake ɗauke da alkawarin da Ubanmu ya yi da mutanen Isra'ila.”

Sulemanu Ya Keɓe Gidan Uba da Addu'a

Sai Sulemanu ya tsaya a gaban bagaden Ubanmu a gaban dukan taron Isra'ila, ya kuma shimfiɗa hannuwansa. Sulemanu ya riga ya yi dakalin tagulla, tsawonsa wajen ƙafa bakwai da rabi, fāɗinsa ƙafa bakwai da rabi, tsayinsa ƙafa huɗu da rabi, ya kuma ajiye shi a tsakiyar filin. Ya hau kansa, ya durƙusa a gaban dukan taron Isra'ila, ya kuma shimfiɗa hannuwansa wajen Sama. Ya ce, Ya Ubana, Allah na Isra'ila, babu wani Uba kamarka a Sama ko a duniya, kana kiyaye alkawari kana kuma nuna madawwamiyar ƙauna ga bayinka waɗanda suke tafiya a gabanka da dukan zuciyarsu. Ka kiyaye alkawarinka ga bawanka Dawuda mahaifina; abin da ka faɗa da bakinka ka cika da hannunka a yau.

To yanzu, Ya Ubana, Allah na Isra'ila, ka kiyaye wa bawanka Dawuda mahaifina abin da ka yi alkawari, cewa, “Ba za ka taɓa rasa mutum a gabana a kan gadon sarautar Isra'ila ba, muddin 'ya'yanka suka lura da tafiyarsu su yi tafiya cikin shari'ata, yadda ka yi tafiya a gabana.” Yanzu kuwa, Ya Ubana, Allah na Isra'ila, bari maganar da ka faɗa wa bawanka Dawuda tă tabbata.

Amma Ubanmu zai zauna da mutane a duniya da gaske? Sammai da sammai mafi tsayi ba su iya ƙunsarka—balle fa wannan gidan da na gina. ^a Duk da haka ka saurari addu'ar bawanka da roƙonsa, Ya Ubana, ka kuma ji kuka da addu'ar da bawanka yake yi a gabanka. Bari idanunka su kasance a buɗe wajen wannan gidan dare da rana, wajen wurin da ka ce za ka sa sunanka, domin ka ji addu'ar da bawanka yake yi wajen wannan wurin. Ka saurari roƙon bawanka da na mutanenka Isra'ila sa'ad da suke addu'a wajen wannan wurin. Ka ji daga Sama, mazauninka; sa'ad da kuwa ka ji, ka gafarta.

Idan mutum ya yi wa maƙwabcinsa zunubi aka kuma bukaci yă rantse, ya kuwa zo ya rantse rantsuwarsa a gaban bagadenka a cikin wannan gidan, to, ka ji daga Sama ka kuma yi aiki. Ka hukunta bayinka, ka sāka wa mai laifi bisa ga ayyukansa, ka kuma kuɓutar da mai adalci, kana sāka masa bisa ga adalcinsa.

Idan maƙiya suka ci mutanenka Isra'ila saboda sun yi maka zunubi, suka kuwa komo wurinka suka yabi sunanka, suka yi addu'a suka kuma yi maka roƙo a cikin wannan gidan, to, ka ji daga Sama, ka gafarta zunubin mutanenka Isra'ila, ka kuma komar da su ƙasar da ka ba su da kakanninsu.

Sa'ad da sararin sama ya rufe babu ruwan sama saboda sun yi maka zunubi, idan suka yi addu'a wajen wannan wurin, suka yabi sunanka, suka kuma juya daga zunubinsu sa'ad da ka sa su shan wahala, to, ka ji daga Sama, ka gafarta zunubin bayinka, mutanenka Isra'ila, sa'ad da ka koya musu hanya mai kyau da za su bi, ka kuma saukar da ruwan sama a kan ƙasarka, wadda ka ba wa mutanenka gādo.

Idan yunwa, ko annoba, ko bushewar hatsi, ko fumfuna, ko fāra, ko dango suka auko wa ƙasar; idan maƙiya suka kewaye su a cikin garuruwansu—ko wace annoba ko cuta ta zo, ko wace addu'a ko roƙo da wani mutum ko dukan mutanenka Isra'ila suka yi, kowanne yana sane da wahalarsa da zafinsa, yana kuma shimfiɗa hannuwansa wajen wannan gidan, to, ka ji daga Sama, mazauninka, ka gafarta, ka kuma sāka wa kowanne bisa ga dukan hanyoyinsa, da yake ka san zuciyarsa—gama kai kaɗai ka san zuciyar kowane mutum, domin su ji tsoronka su kuma yi tafiya a hanyoyinka muddin suna da rai a ƙasar da ka ba wa kakanninmu.

Haka kuma, sa'ad da baƙo wanda ba na mutanenka Isra'ila ba ya zo daga ƙasa mai nisa saboda sunanka mai girma, da hannunka mai iko, da hannunka mai miƙe—sa'ad da suka zo suka yi addu'a wajen wannan gidan, to, ka ji daga Sama inda kake zaune, ka kuma yi dukan abin da baƙon ya roƙa, domin dukan mutanen duniya su san sunanka su kuma ji tsoronka, kamar yadda mutanenka Isra'ila suke yi, su kuma san cewa wannan gidan da na gina yana ɗauke da sunanka.

Idan mutanenka suka tafi yaƙi da maƙiyansu duk inda ka aike su, suka kuma yi maka addu'a wajen wannan birnin da ka zaɓa da kuma gidan da na gina saboda sunanka, to, ka ji daga Sama addu'arsu da roƙonsu, ka kuma kāre hakkinsu.

Idan suka yi maka zunubi—gama babu wani wanda ba ya yin zunubi—ka kuma yi fushi da su, ka ba da su ga maƙiyi wanda ya kwashe su bayi zuwa ƙasa mai nisa ko kusa,

duk da haka idan a ƙasar bautarsu suka kula da wannan a zuci, suka komo suka yi maka roƙo a can, suna cewa, “Mun yi zunubi, mun yi laifi, mun aikata mugunta,” idan suka komo wurinka da dukan zuciyarsu da ransu a ƙasar bautarsu inda aka kwashe su, suka kuma yi addu'a wajen ƙasarsu da ka ba wa kakanninsu, da birnin da ka zaɓa, da gidan da na gina saboda sunanka, to, ka ji daga Sama, mazauninka, addu'arsu da roƙonsu, ka kāre hakkinsu, ka kuma gafarta wa mutanenka waɗanda suka yi maka zunubi.

Yanzu, Ya Ubana, bari idanunka su kasance a buɗe kunnuwanka kuma su saurari addu'ar da ake yi a wannan wurin.

Yanzu kuwa ka tashi, Ya Ubana, ka zo wurin hutunka, kai da akwatin ikonka. Bari firistocinka, Ya Ubana, su sanya ceto kamar riga, bari kuma amintattunka su yi farin ciki da alherinka. Ya Ubana, kada ka ƙi shafaffenka. Ka tuna da madawwamiyar ƙaunarka ga Dawuda bawanka.