2 Thotrinchān 6

6 ¹Chiwui thili Solomonna hānga, "Ithumwui Avāna tangkhamang kashāli okthuira da hānghaisai. ²Kha na mashimānda pamkhavai apam akha, shim kajuiya kahai akha ina nawui vang sākāhaira."

³Chiwui thili awungana ngareiungda, athum saikora nganinglakha eina Israelwui kazip saikorali somi. ⁴Kala ana hānga, "Ishāvā Davidli awui khamorna ngashit kahai chi apāng eina ungshungkhame Israelwui Vare, ithumwui Avā chili soranu; ana hithāda hānghaisai,

⁵'Egyptwui eina iwui mibingli ina khuishokthangwui eina thuida, iwui ming apam chili leikhavai shim akha sākhavai Israel shang saikorawui alungli keinung akhala kapangkhui maleimana, kala iwui mibing Israelli mungkhavai mi akhala kapangkhui maleimana. ⁶Kha iwui ming apam chili leikhavai Jerusalemli ina kapangkhui, kala iwui mibing Israelli thānkhavai Davidli ina kapangkhui.'

⁷Ishāvā Davidna Israelwui Vare ithumwui Avāwui mingwui vang shim akha sākhui da awui ningli phaninga.

⁸Kha ithumwui Avāna iwui avā Davidli hānga, 'Iwui mingwui vang shim sākhui khavai da nawui wuklungli leihaiwui vang, chi kaphaningli na phālaka sāhai. ⁹Kha nana shim chi masākāmara; nawui phasā eina kharā nanao mayarana iwui mingwui vang shim chi sākāra.'

¹⁰Ara ithumwui Avāna awui ngashit kahai chi ungshungmihaira; kaja ana ngashit kahai thāda ina ishāvā Davidwui mahut khuida Israelwui wungpamkhongli pamda lei, kala Israelwui Vare ithumwui Avāwui mingwui vang ina shim chi sākāhaira. ¹¹Ithumwui Avāna Israelnaobingli sākahai tuingashit chi khalei oko chi ina apam chili haihai."

Solomonna Seihā Sāda Avāwui Shim Dharchikat

¹²Chiwui thili Israelwui kazip saikora khalei ithumwui Avāwui hanphut mangāli Solomonna nganinga, kala awui pāng khāngkai. ¹³Solomonna pithrai eina tārong akha sākhui, asān khuining phangāripa, aret khuining phangāripa, kala kachuina khuining kathumna; kala chi yāngkhupwui alungli haihai. Chiwui tungli ana nganinglaga, Israelwui kazip saikorawui mangāli khuktizangda, awui pāng kazingramshong khāngkai. ¹⁴Ana hānga, O iwui Avā, Israelwui Vare, kazingramli lah okathuili na kathā Avā katei maleimana; nawui mangāli ningtonglak eina zata naraobingli tuingashit kala makhangachei leikashi tāshungmi. ¹⁵Nawui rao David ishāvāli nana ngashit kahai chi makailakmana; nakhamorna hāngkahai chi aja napāng eina ungshungmi.

¹⁶Chiwui vang eina ara, O iwui Avā, Israelwui Vare, nawui rao ishāvā Davidli nana ngashit kahai chi mangacheimihaialu: "Nanao mayarana na iwui mangāli zata thāda athumwui shongfa nganāda iwui ain alungli zatchingakha, Israelwui wungpamkhongli iwui mangāli mi mavatmilakmara." ¹⁷Kala ara, O iwui Avā, Israelwui Vare, nawui rao Davidli nana hāngkahai tui chi shāptitmiranu.

¹⁸Kha khamashung eina ithumwui Avāna okathuili mibingli ngasoda pamra? Yanglu, kazingram kala juimeikap kaja kazingrambingnala nali makhuisangrarmara; chithākha ina sākahai shim hina nali kathāda khuishaprakhala! ^a a v18 Solomonna ithumwui Avāna okathuili mibingli ngasoda awui pamkhavai sāra da matakhak thāhaowa—hi ningchānga chi Anaomayarana ithumwui ngachaili pamkhavai rā tharan tharzā eina ngahānkā khangasakhaira, kala eina tangda ithumwui Avāna awui naongarābingli ngasoda katang mavaila pampai tharan. ¹⁹Chithālala, O iwui Avā, narao seihā kasā kala awui kapo hi khanganāmilu, kala narao nawui mangāli seihā sāki khangakao kala seihā kasā chi khashāmilu. ²⁰Narao apam hili seihā sāki seihā kasā chi khashā khavai, nana nawui ming chi thara da hāngkahai apam hili, shim hili ngashun ngayā namik kachigatda leiranu. ²¹Narao kala nawui mi Israel apam hili seihā sāki tharan athumwui kapobing chi khanganāmilu. Nawui pamkhavai kazingram eina khashāmilu; kala nana khashā tharan, kapheomilu.

²²Mi akhana awui khongnainaoli morei saakha, kala khangashit sā khavai ningmi tharan, kala ana rāda shim hili nawui hanphut mangāli khangashit saakha, ²³chithākha nana kazingram eina khashāmilu, sāmilu. Naraobingli bichar sālu: khayonali athumwui otsak athishurda tandi khamila, kala khamashungali khamashungana da sāda, athumwui khamashung khangarong athishurda sāman milu.

²⁴Nawui mi Israel nali morei sāhaiwui vang yangkashebingna yuihaida, kala nawui mingli sochikat khavai latunghaida, shim hili seihā sāda nali poakha, ²⁵chithākha nana kazingram eina khashāmilu, nawui mi Israelwui morei chi kapheomilu, kala nana athum kala athumwui avā ngarāli khami ngaleili athumli latung ngasakmilu.

²⁶Athumna nali morei sāhaiwui vang khamasai shunghaida kazing maromara tharan, athumna apam hili seihā sāda nawui mingli sochikatta, kala nana athumli chotchāng ngasak tharan athumwui morei eina pākhaiakha, ²⁷chithākha nana kazingram eina khashāmilu, nawui rao nawui mi Israelwui morei kapheomilu, athumna zat khavai kaphā shongfa chi tamchitheida, kala nawui mili shimluina khami nawui ngaleili kazing rot ngasakmilu.

²⁸Ramli zāt kasakla, sākazātla, kumshātla, majing katākla, khaohsom lah kalomna atam sākhaiakha; yangkashebingna athumwui keinungli kuinam kahaiakha; kazāt lah kakazā khangatatei atamlila rāakha, ²⁹mi akhana nilala nawui mi Israel katongana nilala khangatatei seihā kasā lah kapo saakha, mi kachiva̱na kachichāwui kakhanang kala kachot chi theida, awui pāng shim hili katingda, ³⁰chithākha nawui pamkhavai kazingram eina khashāmilu, kapheomilu, kala mi kachiva̱li awui shongfa saikora athishurda tandi khamilu, kaja nana awui wuklung chi thei; kaja na amāngna mi saikorawui wuklung chi thei, ³¹chieina nana ithumwui avā ngarāli khami ngaleili athum ringlakha eina tangda, athumna nali ngacheeda nawui shongfali zatra.

³²Chi tākam eina, nawui mi Israel makhaning kha̱mi akhana, nawui ming reikhamataiwui vang, pāngthei kharei kala pāngthei katingkhamiwui vang, ram katāva̱wui eina rāda shim hili seihā saakha, ³³chithākha nana pamkhavai kazingram eina khashāmilu, kha̱mina kapopo saikora chi sāmilu, chieina okathuiwui miyur saikorana, nawui mi Israel thada, nawui ming chi theida nali ngacheera, kala ina sākahai shim hi nawui ming eina hokakhuina da theira.

³⁴Nawui mibingna, nana athumli kachihona apam kachida, athumwui yangkashebingli rai ngararda vāakha, kala nana kapangkhui keinung hili kala nawui mingwui vang ina sākahai shim hili nali seihā saakha, ³⁵athumwui seihā kasā kala kapo chi kazingramli nana shākāmida apong chiwui vang khangachonmilu.

³⁶Athumna nali morei sāhaiakha—kaja morei makasā mi khipākha maleimana—nana malungvāthaida yangkashewui pāngli horsangda, athumli ram tālala nailala tukvāakha,

³⁷chithālala athumna narkahaipamli ning ngateida, ngareiungluishitta apam chili nali poda, "Ithumna morei sāhaira, khangui ot sāhaira, makhayāwui ot sāhaira," jiakha; ³⁸chithālala tukvā kahai narkahaipamli athumna ningyāng tongtingda nali ngareiungakha, kala athumwui avāva̱ ngarāli nana mikahai ram, nana kapangkhui kahai keinung, kala ina namingwui vang sakā kahai shim hili ngareirāda seihā saakha; ³⁹Kazingram nawui pamkhavaili athumwui seihā kala kapo khanganāmilu, athumwui apongwui vang khanganingmilu, nali morei kasā nawui mibingli kapheomilu.

⁴⁰Ara, O iwui Avā, apam hiwui seihā kasāli namik kachigatda leiranu, kala nawui khanāla nganāsangda shāmiranu.

⁴¹Ara ngakarthuilu, O iwui Avā, kala nawui ngasāmkhuiwui pamli rālu, na kala nawui pangshapawui oko ngasoda. Nawui pāngmonbingna, O iwui Avā, huikhami eina chonvai sāranu, kala nawui katharabingna nawui kaphā chiwui vang ringphāranu. ⁴²O iwui Avā, nawui thao neomi kahaili mahormihaialu. Nawui rao Davidwui vang nawui makhangachei leikashi chi phaningungmilu.