2 Thotrinchān 5

5 ¹Solomonna ithumwui Avāwui shimli sākhavai ot saikora sākuphaowa. Chiwui thili awui avā Davidwui dharkat kasā otbing lupā, sinā, kala khorkhong saikora khuirālaga ithumwui Avāwui shimwui lanshimli sanghai.

²Chiwui thili ithumwui Avāwui tuingashitwui oko chi Zion da kahai Davidwui keinungwui eina khuikā khavai, Solomonna Israelwui khararnaobing, shangbing saikorawui akhavābing, kala Israel avāva̱ ngarāwui shimlakwui kathānabing chi Jerusalemli kazipkhui. ³Chithāda Israelwui mi saikorana kashine kachāngwui phanitli awungawui mangāli rākazipa. ^a a v3 Kashine kachāngwui phanit hi Kachonshim Phanitna, chi Israelwui lum katunwui at-khui reikhamatai khamathān phanitna. ⁴Israelwui khararnao saikora rāsamphanglaga, Levinaobingna oko chi khuikā. ⁵Pāngmonbing kala Levinaobingna oko, kazip khavai kachonshim, kala chi alungli khalei kathara khorkhong saikora khuikā. ⁶Awunga Solomon kala awui mangāli rākazipa Israelwui yarui saikora china oko mangāli nganinga, yao kala sei tarākha taithatta; mashing shānkhui shaplakmara. ⁷Pāngmonbingna ithumwui Avāwui tuingashitwui oko chi awui pamli, chi shimwui alung zangkhamayar katharapam, tharmathengmeikap kaje pam chili, cherubimwui angachāng zingli khuizangda haihai. ⁸Kaja cherubim china oko haiwui pam tungli angachāng hārlaga, atungshong eina oko kala chi ngava̱ khavai thingphān chila rānkhammi. ⁹Thingphān china longkazata haida, arāp china oko eina alung katharapamwui mangāli theipai, kha ayārshong eina matheirarmara; aja zimiksho eina tangda chili leichingra. ¹⁰Oko chi alungli Mosesna Horebli sangkahai lungphek khani mataila khiotkha maleimana; Horeb chi Israelnaobing Egyptwui eina thuilaga ithumwui Avāna athumli tuingashit sākahai pamna.

¹¹Chiwui thili pāngmonbing china katharapamwui eina thuihaowa. (Chili leikahai pāngmon saikorana, athumwui tangbing chi mashānhaida, athum khalatta kathara sākhui, ^b b v11 Pāngmonbing china, tangbing da hoi, ngareo-ngayā otram tangbingli otram ngatha̱; akha kachiva̱li khorumshimwui zimikwui athishurda haptā akha ngatamihai. ¹²kala Levinaobing laa kasābing saikora, Asaph, Heman, Jeduthun, athumwui naomayara kala theisābing china tharzā kahai kachon ngavaida hanphutwui zingshoshongli nganinga, kortar, tingteilā, kala lyre singda, pāngmon shākha maga̱na talla̱ khonga.). ¹³Talla̱ kakhongbing kala laa kasābing china ningkha sāda, akhon akha eina ithumwui Avāli sochikatta ningkashi mihai. Talla̱, kortar kala akap-akaibing eina panglāk eina akhon khānglaga, athumna ali sochikatta hānga: "Ana kaphāna; awui makhangachei leikashi katang mavaimana." Chiwui thili muiyāna ithumwui Avāwui shim pemtinghaowa, ¹⁴Chithāda muiyāwui vang pāngmonbing china otram ngatha̱ khavai manganingrarthuwa, kaja ithumwui Avāwui masot china ithumwui Avāwui shim pemtinghaowa.