2 Thotrinchān 4

4 ¹Ana pithrai eina hanphut akha sākhui, asān khuining maga̱, aret khuining maga̱ kala kajui khuining tharā jiya. ²Ana ra̱khong akha heikhui, ngumrik kahai: ngatar eina akhamong khuining tharā, kajui phangā khuining, kuikhamareina khuining thumrā jiya. ³Akhamongwui azingli, ra̱khong kuimareida faror khavai mukkāwui ama̱ ruksanga, khuining ava̱va̱li tharā tharāna; ama̱ chi ngaher khani eina ruksangsera, ra̱khong eina asā akha ngasakta heikhui. ⁴Ra̱khong chi mukkā tharāda khaniwuitungli nganinga: kathum atungshong ngarei, kathum zingtunshong, kathum azingshong, kathum zingshoshong ngareilaga, ra̱khong chi athumwuitungli parhai, kala athumwui khanuk saikora alungshong ngasunripta. ⁵Chiwui kashā pāngmayā parkhaya; chiwui akhamong chi tengkot thāda, timrāwonwui khangatām thādana sākhui; kala tara̱ gallon thing tharāda shini hi zangshapa.

⁶Ana pheokhavai khongsai tharā sākhui, kala phangā azingshong, phangā atungshong haihai; chili rikkatā kachigatwui otbing rinsitta; kha ra̱khong chi pāngmonbingna pheokhavaina.

⁷Ana khangachā athishurda sinā thaomeishong tharā sākhui, phangā khorumshim chiwui azingshong, phangāna atungshong haihai. ⁸Ana table tharā sāda khorumshimli phangā azingshong kala phangā atungshong haihai; kala sinā khongsai shākha sākhui.

⁹Ana pāngmonbingwui yāngkhup kala yāngkhup kahaka sāda, chiwui khāmongbing sākhui, kala khāmongbing chi pithrai eina rommithai. ¹⁰Ana ra̱khong chi azingshong, azingshongwui zingsho achithekli haihai.

¹¹Huramna ham, belcha kala khongsai sākhui. Kala ithumwui Avāwui shimli haikhavai ot saikora Awunga Solomonwui vang Huramna sāmisera:

¹²Pākra̱ khani; pākra̱ chiwui atung khaoli shongkhavai agui khani; agui khani chi fakham khavai khānkatarān khani; ¹³kala khānkatarān khani chiwui kabothei shāmati, ngaher khani khani kachiva̱ni, pākra̱ atung khaowui agui akhong khani fakham khavaina; ¹⁴aphei kala aphei chiwuitungli khalei khongsaibing; ¹⁵ra̱khong akha, kala chiwui azingli mukkā tharāda khani. ¹⁶Ham, belcha, sāwui marik-kapei kala chiwui khorkhong saikora Huramabina Awunga Solomonwui vang, ithumwui Avāwui shimwui vang, kahinga pithrai eina sākhuisera. ¹⁷Awungana hibing Jordanwui tampākli, Succoth eina Zeredahwui ngachaili, leikhon eina heikhui ngasaka. ¹⁸Solomonna thongthāngbing hi saikora kachungkhana sākhui, chieina pithraiwui kharit chi matheithuwa.

¹⁹Ithumwui Avāwui shimli haikahai khorkhongbing saikora Solomonna sākhui: sināwui hanphut, kala Ngasokhamiwui khamui haikhavai tablebing; ²⁰khangachā athishurda alung zangkhamayar katharapam mangāli shār khavai sinā kachanga eina kasā thaomeishongbing kala chiwui thaomeibing; ²¹sināwui awon, thaomei, kala changjeebing (hibing sinā kachanga eina kasāna); ²²samchichap, khongsai, khongphei, kala thaokhong, kala khorumshimwui khāmongbing, tharmathengmeikap kaje pamli zangkhavai alung khāmong kala shimreiwui khāmong chila, sinā kachanga eina kasāna.