Ebe Ịchụ Aja Bronz na Nnukwu Osimiri ahụ

E mere ngwongwo ụlọ Nna anyị: ebe ịchụ aja bronz, nnukwu Osimiri ahụ a wụrụ awụ nke dabere nʼelu ehi iri na abụọ, efere ukwu iri maka ịsacha ihe na ihe ịdọba oriọna iri, tebul, na ngwongwo ọlaedo a na-apụghị ịgụta ọnụ. E ji bronz dị ukwuu rụọ ọrụ nke na ọ dịghị mgbe a matara ịdị arọ ya, ihe ọbụla nʼime ha na-ejekwara ebe ịchụ aja ahụ ozi.

Isi 4.

O wuru ebe ịchụ aja bronz nke ogologo ya dị ụkwụ iri atọ, obosara ya dị ụkwụ iri atọ, nke ịdị elu ya dịkwa ụkwụ iri na ise. O mere Osimiri ahụ nke e ji ọla wụọ, nke dị gburugburu: obosara ya dị ụkwụ iri na ise, ịdị elu ya dị ụkwụ asaa na ọkara, gburugburu ya dị ụkwụ iri anọ na ise. Nʼokpuru ọnụ ya, oyiyi ehi gbara ya gburugburu, ihe dị ka asaa nʼụkwụ ọbụla gburugburu Osimiri ahụ. E ji ha wụọ nʼahịrị abụọ, ha na ya bụkwa otu ihe. Osimiri ahụ guzoro nʼelu ehi iri na abụọ, atọ na-eche ihu nʼugwu, atọ nʼọdịda anyanwụ, atọ na ndịda, atọ nʼọwụwa anyanwụ. Osimiri ahụ dabeere nʼelu ha, azụ ha niile chekwara nʼime. Ọkpụrụkpụ ya dị ihe dị ka inṣị atọ. Ọnụ ya dị ka ọnụ iko, dịka okoko lili. Ọ na-eri ihe dị ka galọn puku iri na asaa.

O mere efere ịsa ihe iri, ise nʼakụkụ ndịda, ise nʼakụkụ ugwu, maka ịsacha ihe e ji achụ aja nsure ọkụ. Ma Osimiri ahụ bụ ebe ndị nchụaja ga-asa ahụ.

O mere ihe ndọkwasị oriọna ọlaedo iri dịka e si nye ya nʼiwu, dọba ise nʼakụkụ ndịda nke ụlọnsọ ukwu ahụ, ise nʼakụkụ ugwu. O mere tebụl iri, dọba ha nʼime ụlọnsọ ukwu ahụ, ise nʼakụkụ ndịda, ise nʼakụkụ ugwu. O mekwara efere ọlaedo narị.

O wuru ogige ndị nchụaja, na nnukwu ogige ahụ, na ọnụ ụzọ ya niile; o jikwa bronz machie ọnụ ụzọ ndị ahụ. O debere Osimiri ahụ nʼakụkụ ndịda, nʼnkuku ndịda ọwụwa anyanwụ.

Hụram mere ite niile, na shọvel, na efere niile. Otu a ka Hụram si rụchaa ọrụ ọ rụụrụ eze Sọlomọn nʼụlọ Nna anyị:

ogidi abụọ ahụ; isi ogidi abụọ ahụ nke yiri efere, nke dị nʼelu ogidi ndị ahụ; na ihe a kpara akpa abụọ ahụ nke kpuchiri isi ogidi abụọ ahụ; mkpụrụ pomegranet narị anọ maka ihe a kpara akpa abụọ ahụ, ahịrị abụọ nʼotu nke ọbụla, nke kpuchiri efere isi ogidi abụọ ahụ dị nʼelu ogidi ndị ahụ; ihe ndọkwasị ndị ahụ na efere ndị dị nʼelu ihe ndọkwasị ndị ahụ; otu Osimiri ahụ na ehi iri na abụọ dị nʼokpuru ya. Ite niile, na shọvel, na ndụdụ anụ, na ngwongwo ha niile — Hụram-abaị ji bronz e hichara nke ọma mee ihe ndị a maka eze Sọlomọn, maka ụlọ Nna anyị. Nʼobosara ala Jọdan, nʼetiti Sukọt na Zereda, ka eze ahụ mere ka e jiri ụrọ wụọ ha. Sọlomọn mere ngwa ndị a niile nʼọtụtụ dị ukwuu nke na enweghị ike ịmata ịdị arọ nke bronz ahụ.

Sọlomọn mekwara ngwongwo niile dị nʼụlọ Nna anyị: ebe ịchụ aja ọlaedo na tebụl ndị ahụ nke achịcha e doro nʼihu dị nʼelu ha. ihe ndọkwasị oriọna ọlaedo a nụchara anụcha, na oriọna ha, nke ga-enwu nʼihu ebe nsọ dị nʼime ahụ dịka e si nye ya nʼiwu; okoko ọlaedo ndị ahụ, na oriọna, na mkpakọ (ihe ndị a bụ ọlaedo kachasị dị ọcha). Ọlaedo a nụchara anụcha: ihe ịkpacha oriọna, na efere ịfesa mmiri, na efere nta, na efere ihe nsure ọkụ na-esi isi ụtọ, na ọnụ ụzọ ụlọnsọ ukwu ahụ — ọnụ ụzọ dị nʼime nke na-aba nʼEbe Kachasị Nsọ, na ọnụ ụzọ nke ọnụụlọ ukwu ahụ.