2ይ ዜና 4 FHB Father's Heart Bible™

4 ¹መሰውኢ ነሃስ ድማ ገበረ፤ ምንዋሑ ዕስራ እመት፥ ምግፋሑ ዕስራ እመት፥ ቁመቱ ድማ ዓሰርተ እመት ነበረ። ²ብዝፈሰሰ ነሃስ ገይሩ ኸዓ ኸቢብ ጋብላ ሰርሐ፤ ሰንጣቒቱ ዓሰርተ እመት፥ ቁመቱ ሓሙሽተ እመት፥ ዙርያኡ ድማ ሰላሳ እመት ነበረ። ³ኣብ ትሕቲ ኸንፈሩ ኸዓ ኣብ ዙርያኡ ምስሊ ኣብዑር ከበቦ፤ ኣብ ሓሓንቲ እመት ዓሰርተ ኾይኖም ንጋብላ ኣብ ዙርያኡ ከበብዎ፤ እቲ ኣብዑር ድማ ብክልተ መስርዕ ኮይኑ ምስ ጋብላ ብሓደ ፈሲሱ ዝተሰርሐ ነበረ። ⁴እቲ ጋብላ ኣብ ልዕሊ ዓሰርተ ኽልተ ኣብዑር ቆይሙ ነበረ፤ ሰለስተ ንሰሜን ገፆም፥ ሰለስተ ንምዕራብ ገፆም፥ ሰለስተ ንደቡብ ገፆም፥ ሰለስተ ድማ ንምብራቕ ገፆም ይጥምቱ ነበሩ፤ እቲ ጋብላ ኣብ ልዕሊኦም ተቐሚጡ፥ ድሕሪቶም ኵሉ ናብ ውሽጢ ገይሮም ነበሩ። ⁵ምርጓዱ ጋት ኣቢሉ ነበረ፤ ከንፈሩ ኸዓ ኸም ከንፈር ፅዋዕ፥ ከም ዝፈኸኸ ዕምበባ ሱፍ ነበረ፤ ስሳ ሽሕ ሊትሮ ድማ ይሕዝ ነበረ።

⁶ዓሰርተ ገበራታት መሕፀቢ ድማ ገበረ፤ ሓሙሽተ ብወገን ደቡብ፥ ሓሙሽተ ድማ ብወገን ሰሜን ኣንበሮም፤ ነቲ ንዝቃፀል መስዋእቲ ዝኸውን ነገር ኣብኡ ይሓፅቡ ነበሩ፤ እቲ ጋብላ ግና ካህናት ዝሕፀቡሉ ነበረ።

⁷ዓሰርተ ቀዋሚ ቐናዲል ወርቂ ድማ ከምቲ ዝተኣዘዘ ገበረ፤ ሓሙሽተ ብወገን ደቡብ ቤተ መቕደስ፥ ሓሙሽተ ድማ ብወገን ሰሜን ኣንበሮም። ⁸ዓሰርተ ጠረጴዛ ድማ ገይሩ ኣብ ቤተ መቕደስ ኣንበሮም፤ ሓሙሽተ ብወገን ደቡብ፥ ሓሙሽተ ድማ ብወገን ሰሜን ኣንበሮም፤ ሚእቲ ጭሐሎ ወርቂውን ገበረ።

⁹ኣፀድ ካህናትን እቲ ዓብዪ ኣፀድን መዓፁ እቲ ኣፀድን ድማ ገበረ፤ ነቲ መዓፁ ኸዓ ብነሃስ ለበጦ። ¹⁰ነቲ ጋብላ ድማ ብወገን ደቡብ፥ ኣብ መኣዝን ደቡብ ምብራቕ ኣንበሮ።

¹¹ሑራም ድማ እቲ ድስትታትን መፅሓሪታትን ጭሐሎታትን ገበረ። ከምኡ ድማ ሑራም ነቲ ንጉስ ሰሎሞን ኣብ ቤት ኣቦና ዝሰርሐሉ ስራሕ ፈፀሞ፦

¹²ክልተ ኣዕማድ፥ ዅዕሶ ዝመስላ ኽልተ ጕልላት ኣብ ርእሲ እቲ ኣዕማድ ዝቕመጣ፥ ኣብ ልዕሊ እዘን ጕልላት ዝግፅ ኽልተ ዓይኒ ርግቢ፥ ¹³ኣርባዕተ ሚእቲ ሮማን ድማ ነተን ክልተ ዓይኒ ርግቢ ገበረ፤ ነንሓደ ዓይኒ ርግቢ ኽልተ መስርዕ ኮይኑ፥ ነተን ዅዕሶ ዝመስላ ጕልላት ኣብ ርእሲ እቲ ኣዕማድ ዝቕመጣ ዝሸፍና ነበራ፤ ¹⁴ነቲ መቐመጢ ኣቑሑን ኣብ ልዕሊ እቲ መቐመጢ ኣቑሑ ዘለዋ ገበራታትን፥ ¹⁵ሓደ ጋብላ፥ ኣብ ትሕቲኡ ዘለዉ ዓሰርተ ኽልተ ኣብዑርን፤ ¹⁶ድስትታትን መፅሓሪታትን መውግእ ስጋን ኵሉ ኣቑሕኦምን፥ ሑራም ኣቢ ነዝ ዅሉ ንንጉስ ሰሎሞን ንቤት ኣቦና ብፅሩይ ነሃስ ገይሩ ሰርሖ። ¹⁷እቲ ንጉስ ኣብቲ ኣብ መንጎ ሱኰትን ፃረዳን ዝርከብ ጐልጐል ዮርዳኖስ፥ ኣብ ድዃ መሬት ኣፍሰሶም። ¹⁸ሰሎሞን ነዝ ዅሉ ኣቑሑ የመና ብዙሕ ገይሩ ሰርሖ፤ ስለዙይ ሚዛን ናይቲ ነሃስ ኣይተፈልጠን።

¹⁹ሰሎሞን ነቲ ኣብ ቤት ኣቦና ዘሎ ዅሉ ኣቑሑ ገበረ፦ ብወርቂ ዝተሰርሐ መሰውእን፥ ሕብስቲ ቝርባን ዝቕመጠሉ ጠረጴዛታትን፤ ²⁰ብፅሩይ ወርቂ ዝተሰርሐ ቀዋሚ ቐናዲል ምስ መብራህቶም፥ ከምቲ ዝተሓገገ ኣብ ቅድሚ ቅድስተ ቅዱሳን ክውልዑ፤ ²¹እቲ ዕምበባታትን መብራህትን መሳወርን ብወርቂ፥ እዙይ ድማ ፍፁም ፅሩይ ወርቂ ነበረ፤ ²²ብፅሩይ ወርቂ ዝተገብረ መሳቐይታትን ጭሐሎታትን ፃሕልታትን ፅንሃሃትን ነበሩ፤ ናይ ቤተ መቕደስ መዓፁ ድማ፥ ማለት ናይ ቅድስተ ቅዱሳን ውሽጣዊ መዓፁን ናይ መቕደስ መዓፁን ብወርቂ ዝተገብረ ነበረ።