2ይ ዜና 3 FHB Father's Heart Bible™

3 ¹ሽዑ ሰሎሞን ቤት ኣቦና ኣብ ኢየሩሳሌም፥ ኣብ ከረን ሞርያ፥ ኣብታ ኣቦና ንኣቦኡ ዳዊት ዝተገልፀላ፥ ኣብቲ ዳዊት ኣብ ዓውዲ ኦርና ይቡሳዊ ዘዳለዎ ቦታ ክሰርሕ ጀመረ። ²ኣብ ራብዓይ ዓመት ንግስናኡ፥ ኣብ ካልኣይ ወርሒ፥ ኣብ ካልኣይ መዓልቲ ክሰርሕ ጀመረ። ³እዚኣቶም እቶም ሰሎሞን ንምስራሕ ቤት ኣቦና ዘንበሮም መሰረት እዮም፦ ብናይ ቀደም ስፍሪ፥ ንውሓቱ ዕስራን ሸውዓተን ሜትር፥ ግፍሓቱ ኸዓ ትሽዓተ ሜትር ነበረ። ⁴እቲ ኣብ ቅድሚት እታ ቤት፥ ከም ምግፋሑ እታ ቤት ዝነበረ ገበላ፥ ትሽዓተ ሜትር ዝምግፋሑ ነበረ፤ ቁመቱ ኸዓ ሰላሳን ሸውዓተን ሜትር ነበረ። ንውሽጡ ድማ ብፅሩይ ወርቂ ለበጦ።

⁵ነቲ ዓብዪ ቤት ብዕንፀይቲ ፅሕዲ ኸደኖ፤ ብፅሩይ ወርቂውን ለበጦ፤ ተምር ድማ ሰንሰለታት ወሰኸሉ። ⁶ነታ ቤት ድማ ምእንቲ ፅባቐ ብኽቡር ዕንቊ ኣመልከዐ፤ እቲ ወርቂ ኸዓ ካብ ፓርዋይም ነበረ። ⁷ነታ ቤት፥ ገመላታን ድርኵዂታን መናድቓን መዓፅኣን ብወርቂ ለበጦ፤ ኣብ መናድቕ ድማ ኪሩቤል ቀረፀ።

⁸ነቲ ቅድስተ ቅዱሳን ገበረ፤ ንውሓቱ ኸም ምግፋሑ እታ ቤት ትሽዓተ ሜትር ነበረ፤ ምግፋሑ ኸዓ ትሽዓተ ሜትር ነበረ። ዕስራን ሰለስተን ሽሕ ኪሎ ግራም ፅሩይ ወርቂ ድማ ለበጦ። ⁹ሚዛን እቲ ሽንካር ኸዓ ሓሙሽተ ሚእትን ሓምሳን ግራም ወርቂ ነበረ፤ ነቲ ላዕለዋይ ክፍልታት ድማ ብወርቂ ለበጦ።

¹⁰ኣብቲ ቅድስተ ቅዱሳን ድማ ክልተ ዝተቐርፁ ኪሩቤል ገበረ፤ ብወርቂውን ለበጦም። ¹¹ኣኽናፍ እቶም ኪሩቤል ብሓባር ትሽዓተ ሜትር ዝዝርግሑ ነበሩ፦ ሓንቲ ኽንፊ እቲ ቐዳማይ ኪሩቤል፥ ሓሙሽተ እመት ኮይና፥ ነቲ መንደቕ እታ ቤት ትነክእ ነበረት፤ እታ ኻልአይቲ ኽንፊ ኸዓ፥ ንሳውን ሓሙሽተ እመት ኮይና፥ ነታ ኽንፊ እቲ ኻልኣይ ኪሩቤል ትነክእ ነበረት። ¹²ክንፊ እቲ ኻልኣይ ኪሩቤል ድማ፥ ሓሙሽተ እመት ኮይና፥ ነቲ መንደቕ እታ ቤት ትነክእ ነበረት፤ እታ ኻልአይቲ ኽንፊ ኸዓ፥ ንሳውን ሓሙሽተ እመት ኮይና፥ ምስ ክንፊ እቲ ቐዳማይ ኪሩቤል ተራኸበ። ¹³ኣኽናፍ እዞም ኪሩቤል ትሽዓተ ሜትር ተዘርጊሐን ነበራ፤ ብእግሮም ደው ኢሎም ከዓ ናብቲ መቕደስ ይጥምቱ ነበሩ።

¹⁴ነቲ መጋረጃ ድማ ብሰማያውን ሓምራውን ውፁእ ቀይሕን ዝኾነ ፈትሊ፥ ብቐጭን ሃርን ገበሮ፤ ኣብኡውን ኪሩቤል ኣለመሉ።

¹⁵ኣብ ቅድሚ እታ ቤት ድማ፥ ነንሓደ ዓሰርተ ሽዱሽተ ሜትር ዝቑመቱ ክልተ ኣዕማድ ገበረ፤ እቲ ኣብ ርእሲ ነንሓደ ዓምዲ ዝነበረ ጕልላት ከዓ ሓሙሽተ እመት ነበረ። ¹⁶ከም ጓንፅል ዝኾነ ሰንሰለታት ገበረ፤ ኣብ ርእሲ እቲ ኣዕማድ ድማ ገበሮ፤ ሚእቲ ሮማን ገይሩ ኸዓ ምስቲ ሰንሰለታት ኣላገቦ። ¹⁷ነቲ ኣዕማድ ድማ ኣብ ቅድሚ እቲ መቕደስ ኣቖሞ፤ ሓደ ብየማን፥ ሓደ ኸዓ ብፀጋም ኣቐመጦ፤ ነቲ የማናይ ያኪን፥ ነቲ ፀጋማይ ከዓ ቦኤዝ ኢሉ ሰመዮም።