2 நாளாகமம் 3

3 ¹பின்பு சாலொமோன் எருசலேமில் மோரியா மலையின்மேல் எங்கள் பிதாவின் ஆலயத்தைக் கட்டத் தொடங்கினான்; அங்கே எங்கள் பிதா அவனுடைய தகப்பனாகிய தாவீதுக்குக் காட்சியளித்திருந்தார்; அது எபூசியனாகிய ஒர்னானின் போரடிக்கிற களத்தில் தாவீது ஆயத்தப்படுத்தியிருந்த இடமாயிருந்தது. ²அவன் தன் ஆட்சியின் நான்காம் வருடத்தில், இரண்டாம் மாதம், இரண்டாம் நாளில் கட்டத் தொடங்கினான். ³எங்கள் பிதாவின் ஆலயத்தைக் கட்டுவதற்காகச் சாலொமோன் போட்ட அஸ்திபாரங்கள் இவைகளே: முந்தின அளவின்படி நீளம் ஏறக்குறைய தொண்ணூறு அடி, அகலம் ஏறக்குறைய முப்பது அடி. ⁴ஆலயத்தின் முகப்பில் அதன் அகலத்திற்கு நேராயிருந்த மண்டபம் ஏறக்குறைய முப்பது அடி அகலமாயிருந்தது; அதின் உயரம் நூற்று இருபது அடியாயிருந்தது. அதின் உட்புறத்தைப் பசும்பொன்னினால் மூடினான்.

⁵அந்தப் பெரிய அறையை தேவதாரு மரத்தினால் மேற்பரப்பாக்கி, சுத்தமான பொன்னினால் மூடி, அதின்மேல் பேரீச்சமரங்களையும் சங்கிலிகளையும் அமைத்தான். ⁶அழகுக்காக அந்த ஆலயத்தை விலையேறப்பெற்ற கற்களால் அலங்கரித்தான்; அந்தப் பொன் பர்வாயீமிலிருந்து வந்ததாயிருந்தது. ⁷அவன் ஆலயத்தையும், அதின் உத்திரங்களையும், வாசற்படிகளையும், சுவர்களையும், கதவுகளையும் பொன்னினால் மூடி, சுவர்களில் கேருபீன்களைச் செதுக்கினான்.

⁸அவன் மகா பரிசுத்த ஸ்தலத்தை உண்டாக்கினான்; அதின் நீளம் ஆலயத்தின் அகலத்திற்குச் சரியாய் ஏறக்குறைய முப்பது அடியும், அதின் அகலமும் முப்பது அடியுமாயிருந்தது; அதை ஏறக்குறைய இருபத்துமூன்று டன் சுத்தமான பொன்னினால் மூடினான். ⁹ஆணிகள் ஏறக்குறைய இருபது அவுன்ஸ் நிறையுள்ள பொன்னாயிருந்தது; மேல்வீட்டு அறைகளையும் பொன்னினால் மூடினான்.

¹⁰மகா பரிசுத்த ஸ்தலத்திலே செதுக்கப்பட்ட வேலையாய் இரண்டு கேருபீன்களை உண்டாக்கி, அவைகளைப் பொன்தகட்டால் மூடினான். ¹¹கேருபீன்களின் செட்டைகள் சேர்ந்து ஏறக்குறைய முப்பது அடி விரிந்திருந்தன: முதலாம் கேருபீனின் ஒரு செட்டை ஏறக்குறைய ஏழரை அடியாயிருந்து ஆலயத்தின் சுவரைத் தொட்டது; அதின் மறுசெட்டையும் ஏறக்குறைய ஏழரை அடியாயிருந்து இரண்டாம் கேருபீனின் செட்டையைத் தொட்டது. ¹²இரண்டாம் கேருபீனின் செட்டை ஏறக்குறைய ஏழரை அடியாயிருந்து ஆலயத்தின் சுவரைத் தொட்டது; அதின் மறுசெட்டையும் ஏறக்குறைய ஏழரை அடியாயிருந்து முதலாம் கேருபீனின் செட்டையோடு சேர்ந்தது. ¹³இந்தக் கேருபீன்களின் செட்டைகள் ஏறக்குறைய முப்பது அடி விரிந்திருந்தன; அவைகள் தங்கள் கால்களை ஊன்றி நின்று, பிரதான மண்டபத்திற்கு நேராக முகங்களை வைத்திருந்தன.

¹⁴அவன் இளநீல நூலினாலும், இரத்தாம்பர நூலினாலும், சிவப்பு நூலினாலும், மெல்லிய பட்டினாலும் திரையை உண்டாக்கி, அதிலே கேருபீன்களை நெய்து அமைத்தான்.

¹⁵ஆலயத்தின் முன்பாக இரண்டு தூண்களை உண்டாக்கினான்; ஒவ்வொன்றும் ஏறக்குறைய ஐம்பத்துமூன்று அடி உயரமாயிருந்தது; அவைகளின்மேல் ஏறக்குறைய ஏழரை அடி உயரமான பொது அமைத்தான். ¹⁶மாலைபோலச் சங்கிலிகளை உண்டாக்கி, அவைகளைத் தூண்களின் உச்சியில் வைத்து, நூறு மாதுளம்பழங்களை உண்டாக்கி, அவைகளைச் சங்கிலிகளில் கட்டினான். ¹⁷அந்தத் தூண்களை ஆலயத்தின் முன்பாக ஒன்று வலதுபுறத்திலும் ஒன்று இடதுபுறத்திலும் நிறுத்தி, வலதுபுறத்திலிருந்ததற்கு யாகீன் என்றும் இடதுபுறத்திலிருந்ததற்கு போவாஸ் என்றும் பேரிட்டான்.