2ይ ዜና 2 FHB Father's Heart Bible™

2 ¹ሰሎሞን ንስም ኣቦና ቤት፥ ንርእሱ ኸዓ ቤተ መንግስቲ ክሰርሕ መደበ። ²ሰሎሞን ድማ ሰብዓ ሽሕ ተሸከምቲ፥ ኣብ እምባታት ድማ ሰማንያ ሽሕ ወቐርቲ እምኒ፥ ኣብ ልዕሊኦም ከዓ ሰለስተ ሽሕን ሽዱሽተ ሚእትን ሹመኛታት ሰርዐ።

³ሰሎሞን ድማ ናብ ሑራም ንጉስ ጢሮስ ልኢኹ ከምዙይ በሎ፦ “ኣብኡ ዝነብረላ ቤቱ ክሰርሕ ኦም ዝግባ እናሰደድካሉ፥ ከምቲ ንኣቦይ ዳዊት ዝገበርካዮ፥ ንኣይ ድማ ግበረለይ። ⁴እንሆ ኣነ ንስም ኣቦይ ቤት ክሰርሕ እየ፥ ንእኡ ድማ ክቅድሳ፤ ኣብ ቅድሚኡ ምዑዝ ዕጣን ከዕጥን፥ ሕብስቲ ቝርባን ኵልሻዕ ከዳሉ፥ ንግሆን ምሸትን፥ ብሰናብትን ብሰርቀ ወርሕን በቲ ምዱብ በዓላት ኣቦናን ድማ ዝቃፀል መስዋእቲ ከቕርብ እየ። እዙይ ኸዓ እስራኤል ንዘለኣለም ክገብሮ እዩ። ^a a v4 ሕብስቲ ቝርባን፦ ኣብ ውሽጣዊ መቕደስ ኣብ ቅድሚ እግዚኣብሄር ኵልሻዕ ዝቐርብ ስርዓታዊ ሕብስቲ እዩ።

⁵እታ ኣነ ዝሰርሓ ቤት ዓባይ ክትከውን እያ፥ ኣቦና ኻብ ኵሎም ኣማልኽቲ ይዓቢ እዩ እሞ። ⁶ግናኸ ሰማይን ሰማየ ሰማያትን ክፆርዎ ኣይኽእሉን እዮም እሞ፥ ቤት ክሰርሓሉ ዝኽእል መን እዩ? ኣነኸ ኣብ ቅድሚኡ መስዋእቲ ኸቕርብ እንተ ዘይኮይኑ፥ ቤት ክሰርሓሉ መን እየ?

⁷ሕዚ ድማ ብወርቅን ብብሩርን ብነሃስን ብሓፂንን፥ ብሓምራውን ውፁእ ቀይሕን ሰማያውን ፈትልን፥ ብምቕራፅን ዝኸኣለ ጥበበኛ ስደደለይ፤ ምስቶም ኣቦይ ዳዊት ዘዳለወለይ፥ ኣብ ይሁዳን ኣብ ኢየሩሳሌምን ዘለዉ ጥበበኛታተይ ኮይኑ ኽሰርሕ።

⁸ኦም ዝግባን ኦም ፅሕድን ካብ ሊባኖስ ድማ ቀይሕ ኦም ሳንዳልን ስደደለይ፤ ኣገልገልትኻ ኦም ሊባኖስ ብብልሓት ከም ዝቘርፁ እፈልጥ እየ እሞ፤ ኣገልገልተይ ድማ ምስ ኣገልገልትኻ ኽኾኑ እዮም። ⁹እታ ኣነ ዝሰርሓ ቤት ዓባይን ዘደንቕን ክትከውን እያ እሞ፥ ብዙሕ ኦም ኣዳሉለይ። ¹⁰ነቶም ኦም ዝቘርፁ ኣገልገልትኻ ድማ፥ ኣስታት ሚእትን ዕስራን ሓሙሽተን ሽሕ መስፈሪ ዝተወቕዐ ስርናይ፥ ሚእትን ዕስራን ሓሙሽተን ሽሕ መስፈሪ ስገም፥ ሚእትን ዓሰርተ ሓሙሽተን ሽሕ ሊትሮ ወይንን ሚእትን ዓሰርተ ሓሙሽተን ሽሕ ሊትሮ ዘይትን ክህብ እየ።”

¹¹ሑራም ንጉስ ጢሮስ ድማ ናብ ሰሎሞን ከምዙይ ኢሉ ፀሓፈ፦ “እግዚኣብሄር ንህዝቡ የፍቅሮ እዩ እሞ፥ ንጉሶም ገይሩ ሸመካ።” ¹²ሑራም ድማ ከምዙይ በለ፦ “ሰማይን ምድርን ዝፈጠረ፥ እግዚኣብሄር ኣምላኽ እስራኤል ይባረኽ! ንሱ ንንጉስ ዳዊት ለባም ወዲ፥ ልቦናን ምስትውዓልን ዘለዎ ሃቦ፥ ንእግዚኣብሄር ቤት፥ ንርእሱ ኸዓ ቤተ መንግስቲ ዝሰርሕ።

¹³ሕዚ ድማ ጥበበኛ፥ ምስትውዓል ዝተዓደለ ብልሓተኛ፥ ሑራም-ኣቢ ናባኻ እሰድድ ኣለኹ፥ ¹⁴ንሱ ኻብ ደቂ ዳን ዝኾነት ሰበይቲ ዝተወልደ፥ ኣቦኡ ኸዓ በዓል ጢሮስ እዩ፤ ብወርቅን ብብሩርን ብነሃስን ብሓፂንን ብእምንን ብዕንፀይትን፥ ብሓምራውን ሰማያውን ውፁእ ቀይሕን ፈትልን ብፅቡቕ ሃርን ዝኸኣለ እዩ። ኵሉ ዓይነት ምቕራፅ ክገብር፥ ዝተመደበሉ ዝኾነ ስራሕ ከዓ ክሰርሕ ይኽእል፤ ምስ ጥበበኛታትካን ምስ ጥበበኛታት ጐይታይ ኣቦኻ ዳዊትን ኮይኑ ድማ ይሰርሕ።

¹⁵ስለዙይ ጐይታይ ነቲ ዝተመባፅዖ ስርናይን ስገምን ዘይትን ወይንን ናብ ኣገልገልቱ ይስደዶ፥ ¹⁶ንሕና ኸዓ ዘድልየካ ዅሉ ኦም ካብ ሊባኖስ ክንቆርፅ፥ ብባሕሪ ብታንኳ ገይርና ናብ ኢዮጴ ኸነንሳፍፈልካ ኢና፤ ንስኻ ድማ ናብ ኢየሩሳሌም ተደይቦ።”

¹⁷ሰሎሞን ከምቲ ኣቦኡ ዳዊት ዝገበሮ፥ ነቶም ኣብ ምድሪ እስራኤል ዝነብሩ ዅሎም ስደተኛታት ቘፀሮም፤ ሚእትን ሓምሳን ሰለስተን ሽሕን ሽዱሽተ ሚእትን ድማ ኮኑ። ¹⁸ካብኣቶም ድማ ሰብዓ ሽሕ ተሸከምቲ፥ ኣብ እምባታት ድማ ሰማንያ ሽሕ ወቐርቲ እምኒ፥ ነቲ ህዝቢ ዘስርሑ ኸዓ ሰለስተ ሽሕን ሽዱሽተ ሚእትን ሹመኛታት ገበረ።