2 Thotrinchān 2

2 ¹Solomonna ithumwui Avāwui namei vang shim akha, kala awui vang konung akha sākhavai nganingtithaowa. ²Solomonna otphun kaphungabing thing hangshini, kaphungli ngalung kashaobing thing hangchishat, kala athumwuitungli yangkhamebing thing kathum shātharuk sāngasaka.

³Solomonna Tyrewui awunga Huramli pao chihovāda hānga, "Nana iwui avā David eina, awui sompam khavai shim sākhavai cedarthing chihovāmida sāsā thāda, ili sālu. ⁴Awui mangāli nganamkaphā thao riktā khavai, ngasokhamiwui khamui thangkachida thāda, ngathor kala ngazinshong, sabbaththang, changwokthang, kala ithumwui Avāwui phanitthangli rikkatā kachigat chigat khavai, ina iwui Avāwui namei vang shim akha sāda lei, kala chi awui vang tharchigatra. Hili Israelna katang mavaila sāphalungra. ^a a v4 Ngasokhamiwui khamui: alungkayāng kathara shimli Varewui mangāli katang mavaila thāchingda thākahai kathara khamuibingna.

⁵Ina sāda leikahai shim chi reikhamataira, kaja ithumwui Avā hi varebing saikorawuitungli reikhamataina. ⁶Kha kazingram eina juikhamataiya kazingramnala ali mapamphayo tharan, khipāna ali shim akha sāshapkhala? Kala awui mangāli rikkatā kachigat chigat khavai maningla, ina ali shim sākhavai khipā akhala?

⁷Iwui avā Davidna ngarān kahai, Judah eina Jerusalemli khalei iwui them kathem ot kasābing zangda ot sāmi khavai, ara sinā, lupā, pithrai, mari, hungrisi, hungshi kahai, kala khamayinga chonsā, kala rukkasang otli sākathei them kathema akha ili chihovāmilu.

⁸Chili lāngda Lebanonwui eina cedarthing, cypressthing, kala algumthing hunga ili chihovāmilu, kaja nawui raobingna Lebanonwui thing themlāk eina kaphā kaji ina thei; kala iwui raobingna nawui raobing zangda ngasozatra. ⁹Iwui vang thing kachungkha ngarānmilu, kaja ina sāda leikahai shim chi reikhamatai kala matakhak kahaira. ¹⁰Thing kaphā nawui raobingwui vang, ina kacha̱ kahai kehu bushels lakh akha thing hangkhanida phangā, napai bushels lakh akha thing hangkhanida phangā, drakhāra̱ gallons lakh akha thing hangkhada phangā, kala thao gallons lakh akha thing hangkhada phangā mira."

¹¹Tyrewui awunga Huramna Solomonli chithi kapisangda hānga, "PROHO Varena awui mibingli leishiwui vang, ana nali athumwui awunga sāngasaka." ¹²Huramna hānga, "Kazing eina ngalei kasaa, Israelwui Vare, PROHO Vareli soranu! PROHO Vare vang shim akha kala awui vang konung akha sākhavai, ana awunga Davidli ningthei kala theishingkakhui zangda naomayara thangkhamana akha mi.

¹³Ara ina nali sākathei them kathema, theishingkakhui zangda Huramabi akha chihovāra, ¹⁴Danshiwui naongalāva̱ akhawui naomayara, awui avā Tyrewui mi akhana. Ana sinā, lupā, pithrai, mari, ngalung, thing, hungrisi, khamayinga, kala hungshi kahai chonsā, kala khamanaka tharzā eina sākatheiya. Ana rukkasang khangatatei sāshapa, kala ali kapangkhui khangarān khangatatei ungshung sāshapa, nawui them kathembing eina nawui avā, iwui awunga Davidwui them kathembing zangda ot sāra.

¹⁵Chiwui vang iwui awungana ana ngashit kahai kehu, napai, thao, kala drakhāra̱ chi awui raobingli chihovāmiranu; ¹⁶kala ithumna Lebanonwui eina nawui ningkachāng thing saikora phāda, chili pong sālaga ngayi eina Joppali huitāmira, kala nana chi Jerusalemli khuivāshapa."

¹⁷Solomonna awui avā Davidna sāmi athishurda, Israel ngaleili sompam khavai kha̱mibing saikorali mashinga; athumwui mashing lakh akha thing hangphangāda kathum shātharukna. ¹⁸Ana thing hangshinili kharita ngava̱kazatbing, thing hangchishatli kaphungli ngalung kashaobing, kala mibingli ot sākhame khavai thing kathum shātharukli yangkhamebing sāngasaka.