Solumoni Wabánza Kutunga Nzu ya Tata
Solumoni wákutikisa batu balawu ba kisalu, amana wálomba kwena Hulami wa Tidi miti mya sedeli yi mutu wa kisalu wa nduka. Wázimbula wengele mana kázodi kutunga: nzu kikuma kya khumbu ya Tata wandi — wuna zilu yi mazilu ma kisoka malendaku kummbaka, amana nzu yina yakála kaka mu kumuzitisila kuna, kaasi kabakama mu nzu ku.
2 1Solumoni wábonga lukanu mu kutunga nzu kikuma kya khumbu ya Tata wetu, yi nganda ya kinga kikuma kya yandi meni. 2Solumoni wápheka banati 70.000, yi batu ba kuzenga matadi 80.000 muna myongu, yi batwadisi 3.600 ha thandu ya bawu.
3Solumoni wáthuma kwena Hulami, kinga wa Tidi: «Sadila yi meni bwosu buna wásadila yi tata wama Tavidi, buna wámutuma miti mya sedeli ndangu katunga nzu yandi ya kuzingila. 4Meni, yisi tunga nzu kikuma kya khumbu ya Tata wama, ndangu yinengina yawu kwena yandi—mu kuyoka pfwabidi ya mvumba ya kitoku ku thwala yandi, yi kutula mapha ma thwala kosu tangwa, yi kutambika bimenga bya kuyoka mu suka yi mu masikidika, mu masabata, mu ngonda za pha, yi mu mafeti ma Tata wetu mana máyukana. Kiseledi kafweti hanga bwabu mu mvula yi mvula. a a v4 Mapha ma thwala: mapha ma kinzu mana masi sweka kosu tangwa ku thwala ya Nzambi muna kikumbu kya nzaza ya nzu ya Nzambi.
5Nzu yina yisi tunga yakála yanene, mukuma Tata wetu kaluti banzambi boosu. 6Kaasi nani walenda kumutungila nzu, bu zilu yi mazilu ma kisoka malendaku kummbaka? Amana meni, nani yenina ndangu yimutungila yimosi, kaka mu kuyoka bimenga ku thwala yandi?
7Buthwena bwabu, nthumina mutu wa kisalu wa nduka mu kuyidika wolu, phalata, ndisu, kisengu, yi mu kuyidika nledi wa kabengi, wa mbwaki, yi wa buluu, yi mu kuzenga bidimbu, ndangu kasala kisalu kumosi yi basadi bama ba nduka kuna Yuta yi ku Yelusalemi, bana kápheka tata wama Tavidi.
8Nthumina phi miti mya sedeli, miti mya sipulesi, yi sanda ya mbwaki tuka ku Libani, mukuma yizayi ni basadi baku bisi zenga miti mya Libani mu nduka; basadi bama bakála kumosi yi baku. 9Yidikila meni miti ya lawu, mukuma nzu yina yisi tunga yakála yanene yi ya kuyituka. 10Kwena basadi baku bana bisi zenga miti, yihána tuma 125.000 bya tswala ya fula, tuma 125.000 bya odizi, milangi 115.000 ya vinu, yi milangi 115.000 ya masi.»
11Hulami, kinga wa Tidi, wásonika kwena Solumoni: «Mukuma Pfumu kisi zola batu bandi, yandi wákukitula kinga wa bawu.» 12Hulami wuzimbudi: «Wásakumuka Pfumu, Nzambi wa Kiseledi, muyidiki wa zilu yi tsi! Wápheka kinga Tavidi mwana wa nduka, wenina yi ngangu yi mbakisilu, ndangu katunga nzu kikuma kya Pfumu yi nganda ya kinga kikuma kya yandi meni.
13Buthwena bwabu, yikutumini mutu wa kisalu wa nduka, wenina yi mbakisilu, Hulami-abi, 14mwana wa mukhetu wa bana ba bakhetu ba Dani, tata wandi mutu wa Tidi—wenina yi nduka mu kuyidika wolu, phalata, ndisu, kisengu, matadi, miti, nledi wa kabengi, wa buluu, yi wa mbwaki, yi miledi mya kitoku. Walenda kuzenga bidimbu byosu amana kulungisa mambu moosu mana kámuheka, mu kusala kisalu kumosi yi basadi baku yi bana ba pfumu wama Tavidi, tata waku.
15Buna, pfumu wama katuma kwena basadi bandi tswala, odizi, masi, yi vinu mana kázonza, 16amana betu twázenga miti myosu mina wenina mupfunu tuka ku Libani, twamithwadisa kwena ngeyi mu yanga hanga masuwa yikuna Zophe, amana ngeyi walenda kumithuta yi kuna Yelusalemi.»
17Solumoni wátanga banzenza boosu bana bakala zingila mu tsi ya Kiseledi, bwosu buna kátanga tata wama Tavidi; bawu bátangama 153.600. 18Wápheka banati 70.000, yi batu ba kuzenga matadi 80.000 muna myongu, yi batwadisi 3.600 ndangu bakengila batu basadila.
