Sulemanu Ya Shirya Ginin Gidan Uba

Sulemanu ya shirya ma'aikata masu yawan gaske, ya kuma roƙi Huram na Taya katakon al'ul da gwanin sana'a. Ya faɗa a sarari abin da yake ginawa: gida domin sunan Ubansa — wanda sammai ba za su iya ɗaukarsa ba, za a iya girmama shi a can kawai, ba a zaunar da shi a ciki ba.

Babi na 2.

Sulemanu ya ɗauki niyyar yă gina gida don sunan Ubanmu, da kuma fada mai daraja domin kansa. Sulemanu ya naɗa mutum dubu saba'in masu ɗaukar kaya, da dubu tamanin masu farfasa duwatsu a cikin duwatsu, da dubu uku da ɗari shida masu kula da su.

Sulemanu ya aika da saƙo wurin Huram sarkin Taya, ya ce, “Ka yi da ni yadda ka yi da mahaifina Dawuda, sa'ad da ka aika masa da itacen al'ul don yă gina gidansa da zai zauna a ciki. Ina gina gida don sunan Ubana, in keɓe shi gare shi—don a ƙona turare mai ƙanshi a gabansa, a shirya gurasar Kasancewa kullayaumin, a miƙa hadayun ƙonawa da safe da yamma, a ranakun Asabar, da sababbin watanni, da ƙayyadaddun bukukkuwan Ubanmu. Dole Isra'ila ta yi haka har abada. ^a

Gidan da nake ginawa zai zama mai girma, gama Ubanmu ya fi dukan alloli girma. Amma wa ya isa yă gina masa gida, tun da yake sama da sammai mafiya ɗaukaka ba su iya ɗaukarsa? Ni kuma wane ne da zan gina masa gida, sai dai don in ƙona hadayu a gabansa?

Yanzu ka aiko mini da gwani ƙwararre a aikin zinariya, da azurfa, da tagulla, da ƙarfe, da zare mai ruwan shunayya, da jan zare, da zare mai ruwan shuɗi, da kuma sassaƙa, don yă yi aiki tare da gwanaye masu fasaha da suke tare da ni a Yahuda da Urushalima, waɗanda mahaifina Dawuda ya tanada.

Ka kuma aiko mini da itacen al'ul, da na saifiresa, da jan sandal daga Labanon, gama na san bayinka gwanaye ne a saran itacen Labanon. Bayina kuwa za su haɗa kai da bayinka. Ka tanada mini itace mai yawa, gama gidan da nake ginawa zai zama mai girma da banmamaki. Ga bayinka da suke saran itace kuwa, zan ba da wajen mudun alkama niƙaƙƙe dubu ɗari da ashirin da biyar, da sha'ir dubu ɗari da ashirin da biyar, da garwar ruwan inabi dubu ɗari da sha biyar, da mai dubu ɗari da sha biyar.”

Huram sarkin Taya ya rubuta wa Sulemanu ya ce, “Domin Ubangiji yana ƙaunar mutanensa, ya naɗa ka sarkinsu.” Huram ya kuma ce, “Yabo yă tabbata ga Ubangiji, Allah na Isra'ila, Mahaliccin sama da ƙasa! Ya ba Sarki Dawuda ɗa mai hikima, mai basira da fahimi, don yă gina gida don Ubangiji da kuma fada mai daraja domin kansa.

Yanzu ina aiko maka da wani gwani ƙwararre, mai baiwar fahimi, wato Huram-abi, ɗan wata mace daga cikin 'ya'ya mata na Dan, mahaifinsa kuwa mutumin Taya ne—gwani a aikin zinariya, da azurfa, da tagulla, da ƙarfe, da dutse, da itace, da zare mai ruwan shunayya, da shuɗi, da jan zare, da lilin mai kyau. Yana iya yin kowane irin sassaƙa, yă kuma aiwatar da kowane irin zane da aka ba shi, yana aiki tare da gwanayenka da na ubangijina Dawuda, mahaifinka.

Saboda haka bari ubangijina yă aika wa bayinsa alkama, da sha'ir, da mai, da ruwan inabin da ya yi alkawari, mu kuwa za mu sare duk itacen da kake bukata daga Labanon, mu kai maka shi a bisa teku a haɗe kamar tudawa har zuwa Yafa, kai kuwa za ka ɗauko shi zuwa Urushalima.”

Sulemanu ya ƙidaya dukan baƙin da suke zama a ƙasar Isra'ila, kamar yadda mahaifinsa Dawuda ya yi. Yawansu ya kai dubu ɗari da hamsin da uku da ɗari shida. Ya naɗa dubu saba'in su zama masu ɗaukar kaya, da dubu tamanin su zama masu farfasa duwatsu a cikin duwatsu, da dubu uku da ɗari shida su zama masu kula da su don su sa mutane su yi ta aiki.