Solomonna Gibeonli Avāli Phā
Solomon eina Babylonli kharem kasakhavai kha Judahwui ningthouwui khamsa, kala shimthot hina ramwui kharingwui kakaili pamhaira. Lairik hiwui kasāthang tuingashit hina, ali ngakakhui mili mayarana ngalumkhavai kala kasangkhavai da khuiphalungda Avā.
1 1Davidwui nao Solomonna awui wungramtungli pangkasang shokhaowa; kala ithumwui Avāna ali ngasoda leida, ali kaje khare ngasaka.
2Kala Solomonna thingthingwui kala shāshāwui raithānabing, bichar kasābing, Israelwui kathāna kachiva̱ kala shimkhur kathānabing, Israel saikorali hānga. 3Solomonna kala kazip saikorana Gibeonwui kajui apamli vai, kaja ithumwui Avāwui rao Mosesna lamhāngli sākakhui, ithumwui Avāwui kazip khavai kachonshim chi chili nganinga. 4Kha Davidna ithumwui Avāwui oko chi Kiriath-jearimwui eina ana chiwui vang ngarān kahai apamli khuiungda, Jerusalemli chiwui vang kachonshim rānvai. 5Kala Uriwui naomayara, Hurwui ara̱ Bezalelna sākakhui pithraiwui hanphut chi ithumwui Avāwui tabernaclewui mangāli leichingsai; chiwui vang Solomonna kala kazip china chili ithumwui Avāli phai. 6Solomonna kazip khavai kachonshimli ithumwui Avāwui mangāli khalei pithraiwui hanphut chili kāda, chiwuitungli rikkatā kachigat thingkha chigata.
7Chithang ngayā ithumwui Avāna Solomonli rāchitheida ali hānga, "Ina nali khi mira da khangahānlu."
8Solomonna ithumwui Avāli hānga, "Nana ishāvā Davidli makhangachei leikashi khare chitheimihaira, kala awui mahut ili awunga sāngasaka. 9Ara, iwui Avā, ishāvā Davidli nawui tuingashit ungshungmilu, kaja nana ili okathuiwui chifa thāda mashing kachungkha mibingtungli awunga sāngasaka. 10Ara ili mibing hili thanung khavai thangkhamei kala awor khamilu, kaja nawui mibing kaje khare hili khipāna khayā samphangpaira?"
11Ithumwui Avāna Solomonli hānga, "Hi nawui ningli leikahaiwui vang, nana kashāng, lan, lah khayākakā manganāla, lah nawui yangkashibingwui mirin, lah mirin okpei manganāla, kha ina nali awunga sāngasak kahai iwui mibing khayā khavai thangkhamei kala awor phaihaira, 12thangkhamei kala awor nali mihaira. Kala ina nali kashāng, lan, kala khayākakāla mira; nawui mangāli awunga khipālikha hithāda maleiranga, kala nawui thilila khipālikha maleimara."
13Chithāda Solomonna kazip khavai kachonshimwui mangāli khalei Gibeonwui kajui apamwui eina Jerusalemli latunga, kala Israelwuitungli munga.
14Solomonna siguigari thingkha shāmati kala sigui raimi thing tharāda khani kazipkhui, kala siguigari keinungbingli kala Jerusalemli awunga ngasoda haihaowa. 15Awungana Jerusalemli lupāsā kala sinā lunggui thāda singngasaka, kala cedarthingla Shephelahwui sycamore thāda sorngasaida singngasaka. 16Solomonwui sigui Egypt kala Kuewui eina alokhuisera; kala awungawui leihkhalonbingna Kuewui eina aman milaga athum akakhuina. a a v16 Kue chi arui Turkey azingshongli leilakha ngalei akhana, achālakhawui okathuili awui siguiwui vang khayāshi samphanga. 17Athumna Egyptwui eina siguigari akhali ava̱va̱li lupāsā pound tharāda phangā shakha, kala sigui akhali pound mati mida shakha; hi awungawui leihkhalonbingna Hitwui awungabing kala Aramwui awungabing saikorali leihda sāmarona.
