2 ዜና መዋዕል 1

1 ¹የዳዊት ልጅ ሰሎሞን በመንግሥቱ ላይ ያለውን አገዛዝ አጠናከረ፤ አባታችንም ከእርሱ ጋር ነበር፤ እጅግም ከፍ ከፍ አደረገው።

²ሰሎሞንም እስራኤልን ሁሉ፣ የሺህ አለቆችንና የመቶ አለቆችን፣ ፈራጆችን፣ በእስራኤልም ያሉትን መሪዎች ሁሉ፣ የቤተ ሰብ አለቆችን አነጋገረ። ³ሰሎሞንና ጉባኤው ሁሉ በገባዖን ወዳለው የኮረብታው መስገጃ ሄዱ፤ በዚያም የአባታችን የመገናኛ ድንኳን ነበረ፤ ይህም የአባታችን ባሪያ ሙሴ በምድረ በዳ የሠራው ነበር። ⁴ዳዊት ግን የአባታችንን ታቦት ከቂርያት ይዓሪም ወደ አዘጋጀለት ስፍራ አምጥቶ ነበር፤ በኢየሩሳሌምም ድንኳን ተከለለት። ⁵የኡሪ ልጅ፣ የሁር የልጅ ልጅ ባስልኤል የሠራው የናስ መሠዊያ በአባታችን ማደሪያ ፊት በዚያ ነበር፤ ስለዚህ ሰሎሞንና ጉባኤው በዚያ አባታችንን ፈለጉ። ⁶ሰሎሞንም በመገናኛ ድንኳን በአባታችን ፊት ወዳለው የናስ መሠዊያ ወጣ፤ በእርሱም ላይ 1,000 የሚቃጠሉ መሥዋዕቶችን አቀረበ።

⁷በዚያም ሌሊት አባታችን ለሰሎሞን ተገለጠለት፤ እንዲህም አለው፤ “የምሰጥህን ለምን።”

⁸ሰሎሞንም ለአባታችን እንዲህ አለ፤ “ለአባቴ ለዳዊት ታላቅ የኪዳን ፍቅር አሳየህ፤ በእርሱም ስፍራ አነገሥከኝ። ⁹አሁንም አባቴ ሆይ፤ ለአባቴ ለዳዊት የገባኸውን ተስፋ አጽና፤ እንደ ምድር ትቢያ በበዛ ሕዝብ ላይ አንግሠኸኛልና። ¹⁰ይህን ሕዝብ እመራ ዘንድ አሁን ጥበብንና ዕውቀትን ስጠኝ፤ ይህን ታላቅ ሕዝብህን ማን ሊገዛ ይችላል?”

¹¹አባታችንም ለሰሎሞን እንዲህ አለው፤ “ይህ በልብህ ስለ ነበረ፣ ባለጠግነትን፣ ብልጽግናን ወይም ክብርን ስላልለመንህ፣ የጠላቶችህንም ነፍስ ስላልለመንህ፣ ረጅም ዕድሜንም ስላልለመንህ፣ ነገር ግን ባነገሥኩህ ሕዝቤ ላይ ትገዛ ዘንድ ጥበብንና ዕውቀትን ስለ ለመንህ፣ ¹²ጥበብና ዕውቀት ተሰጥተውሃል፤ ከአንተ በፊት የነበረ ማንም ንጉሥ ያልነበረውን፣ ከአንተም በኋላ ላለ ማንም የማይኖረውን ባለጠግነት፣ ብልጽግናና ክብር ደግሞ እሰጥሃለሁ።”

¹³ስለዚህ ሰሎሞን ከገባዖን ኮረብታ መስገጃ፣ ከመገናኛ ድንኳን ፊት ወደ ኢየሩሳሌም መጣ፤ በእስራኤልም ላይ ነገሠ።

¹⁴ሰሎሞንም ሠረገሎችንና ፈረሰኞችን ሰበሰበ፤ 1,400 ሠረገሎችና 12,000 ፈረሰኞች ነበሩት፤ እነርሱንም በሠረገላ ከተሞችና በኢየሩሳሌም ከንጉሡ ጋር አስፈረ። ¹⁵ንጉሡም በኢየሩሳሌም ብርንና ወርቅን እንደ ድንጋይ፣ ዝግባንም በቈላ እንዳለ ሆባ ዛፍ አበዛ። ¹⁶የሰሎሞን ፈረሶች ከግብፅና ከቍዌ መጡ፤ የንጉሡ ነጋዴዎች ከቍዌ በገበያ ዋጋ ገዟቸው። ^a a v16 ቍዌ አሁን በደቡብ ቱርክ ውስጥ ያለ አካባቢ ነበር፤ በጥንቱ ዓለም ስለ ፈረሶቹ የተከበረ ነበር። ¹⁷ከግብፅ አንድ ሠረገላ በዐሥራ አምስት ፓውንድ ብር ያህል፣ አንድ ፈረስም በአራት ፓውንድ ያህል አስመጡ፤ በእነርሱም በኩል ለኬጢያውያንና ለሶርያ ነገሥታት ሁሉ እነዚህን ላኩ።