Cheeng'ei Solomon Kwanda eng' Gibeon
Laitornatosyegap laitorinigap Judah kobooch Solomon agoi kamutet, ak mi hekaluut eng' kwenutap saboonetap pororyet. Arorut ne chamaat miising' eng' bukuit ko Kwanda ne igeni koiyestoi ak kosoop piik che weektagei.
Ng'alaali Kwandanyo eng' mustarisyek 7, 11–12
1 1Ki igimitkei Solomon weeriitap Daudi eng' laitornatennyi; ki mi Kwandanyo kobooto ineendet, ne yaei ineendet koek ne oo miising'.
2Ki ng'alaalji Solomon piigap Israel komugul—kiptainigap eliphuusyek ak pogolwogik, ak kirwoogik, ak kandoik tugul che po Israel, pounigap ortinwek. 3Ki pa Solomon kobooto poroteet komugul agoi ole parak ne po Gibeon, amu olooto ole kimi Emaitap meet ne po Kwandanyo, ne ki yai Musa, otwogindetap Kwandanyo, eng' timiin. 4Ago ki itogosta Daudi sandukitap Kwandanyo kong'eete Kiriath-Jearim agoi ole ki ichopchi, ak koteech Emait eng' Jerusalem. 5Kimi yooto kaptisisyet ne po sugunwet ne ki yai Bezalel weeriitap Uri weeriitap Hur eng' taitap tabendo ne po Kwandanyo; ki cheeng' anyun Solomon ak poroteet Kwandanyo olooto. 6Ki togosta Solomon agoi kaptisisyet ne po sugunwet eng' taitap Kwandanyo eng' Emaitap meet, ak kogoito kagoochinet che kibeelei eliphuut agenge eng' ineendet.
7Ki komong'ji Kwandanyo Solomon eng' kemeutyonooto, ak koleenji ineendet, “Soom ne agoonin.”
8Ki leenji Solomon Kwandanyo, “Ki iboorchi rireenet ne oo Daudi kwandanyu, ak kainde laitoryat eng' oldanyi. 9Nguno, Kwandanyu, igimiit kayomiseng'ung' ne ki iyachi Daudi kwandanyu, amu kainde laitoryat eng' pororyet ne chaang' ko uu temburyegap ng'wony. 10Goono anyun utaatyet ak naet si amut pichu, amu ng'oo ne imuuchi korwookyi pororyoning'ung'et tagunoot?”
11Ki leenji Kwandanyo Solomon, “Amu kiit ni ne ki mi muguleldang'ung'—ma isoom mogornatosyek, anan kiyagiik, anan teegisto, anan saboonwegap puuniguk, anan saboondo ne koi, ago isoom utaatyet ak naet si irwookyi piikyuk, che ki aindoin laitoryat, 12kigoonin utaatyet ak naet. Agoonin kora mogornatosyek, ak kiyagiik, ak teegisto, ne ma ki tinyei laitoryat age ne ki mi taing'ung', ak ne ma tuun tinyei age ne nyoonei.”
13Ki wendi anyun Solomon kong'eete ole parak ne po Gibeon, kobun taitap Emaitap meet, agoi Jerusalem, ak ki pou Israel.
14Ki iyum Solomon kariisyek ak piik che ketei paraisisyek; ki tinyei kariisyek eliphuut ak pogol ang'wan ak piik che ketei paraisisyek eliphuusyek taman ak aeng', che ki inde nganasoogap kariisyek, ak che ki mi ole mi laitoryat eng' Jerusalem. 15Ki yai laitoryat eng' Jerusalem fedha ak thahabu koek ko uu koik, ak kochaang' taragonik ko uu mogoonik che mi emet ne soi. 16Ki kigetune paraisisyegap Solomon Misiri ak Kue; ak kitaach chemung'arainigap laitoryat Kue eng' alyennyi ne po akwotisyek. a a v16 Ki Kue emet ne mi ra eng' murotap kaataamap Turkey; ki kararan miising' eng' emoni ne po keny amu paraisisyekyik. 17Ki imong'u icheek chepkichutit eng' Misiri eng' alyetap keruutik taman ak mut che po fedha, ak paraisiit ko keruutik ang'wan; ak eng' icheek ko kigetyi laitorinik tugul che po Hitik ak che po Aram.