Solomonei Gibeona Bou lamda
Solomon ka langsenbü sühko Jihudabü Choba shuongeibü Choba kibü shuong, jenyua mütlieibü langkeia Lembüchem yoa. Ho Laishibaeibü aeibou sanoubü thekubü kho sepeinyu ngaibü mütli to sanoudambo hoba maitila waangbü Bou che ki.
1 1Dawid shou Solomonei haoeibü Sangle thüka hau kingaitikei; hoba seneibü Bou hao yoa kikei, hoba hao aeibou yaangbou kütikei.
2Solomonei Israel pendou — hajar thüka lajamleibou, saongao thüka lajamleibou, matjembü shuong, hoba Israela leiyeibü weko, chempen khuleibü shuong to joyokei. 3Solomon hoba kambü pendou Gibeona shongh khüto haukei; khünei seneibü Bou neichem kikei, kho seneibü Bou khangenbü Mosaei yamlamanga kümbei. 4Lausikei Dawidei seneibü Bou Busen kho Kiriath-jearim ka haoei kho shanga lamlebü kaoen to leian angkei, hoba haoei kho shanga Jerusalema neichem che dangkei. 5Hureibü shi Urieibü shou Bezalelei kümbü chinam lemshang kho seneibü Bou neichem thedanga khünei kikei; kheijinei Solomon hoba kambü haoenei khüka Bou lambei. 6Solomonei neichema seneibü Bou thedanga kibü chinam lemshang to angkei, hoba kho thüka juokbü lembü hajar che lembei.
7Khüyoutham seneibü Bou Solomon jungto longkei, hoba hao to laukei, “Ka la ngei ai kula ong pheshi.”
8Solomonei seneibü Bou to laukei, “Nyi kü bou Dawid to üeisanou yaangbü jungeikei, hoba hao jeila ngo Choba kümbei. 9Tou, kü Bou, kü bou Dawid to kaibü thebülanbü kaangaitiashi, aishanga kaodak thamngu tegü juongbü mütli thüka nyi ngo Choba kümbei. 10Ho mütli lakla shanga tou ngo la songsihon hoba hapbüngebü kubü, aishanga kaibü ho yaangbü mütli ho aoei matjemla thükla?”
11Seneibü Bouei Solomon to laukei, “Nyi maangpona ho kibüei, nyi nyaksinam, soletbü, ayingsi nyensang nyenhang shanga aphe, ayingsi kaibü dangbou langkei shanga aphe, ayingsi langkei salang loubü shanga aphe, lausikei ngei nyi haoen thüka Choba kümbü ngeibü mütli matjemla shanga songsihon hoba hapbüngebü ong phekei, 12nyi la songsihon hoba hapbüngebü kukei. Hoba ngei nyi la nyaksinam, soletbü, hoba nyensang nyenhangkei kulabü, kho nyi thedanga kibü Choba hoba nyi phaia kibü Chobaei tokei ahaplabü.”
13Kheijinei Solomon Gibeona shongh khü ka, neichem thedanga ka, Jerusalem to haukei, hoba Israel thüka songdakkei.
14Solomonei koli kailong hoba koli sepai shuong yoshaikei; haoei koli kailong hajar cheto saongao lei hoba koli sepai hajar anthüknyi kikei, kho haoei koli kailong sangnyu shuonga hoba Jerusalema Choba yoa phokei. 15Chobaei Jerusalema chandinam hoba hon laang hima phokei, hoba cedar bu kho bhuklong hima juong kekei. 16Solomoneibü koli shuong kho Ijep hoba Kue ka longkei; hoba Chobaeibü namseibü shuongei namtet kuan yoa Kue ka khübü jekngaikei. a a v16 Kue kho tat Turkey chaangbou aenei kaonyek che kikei; shangiednyu kaodaka khoeibü koli shuong shanga aeibou nyenhang hapbü kikei. 17Haoenei Ijep ka koli kailong che chandinam pound iknop an bangei sungbakei, hoba koli che pound lei an bangei sungbakei; hobaje hibü shuong kho lulu shanga haoen tegü Hitbü hoba Arambü Choba pendouei sungbakei.
