2 ዜና መዋዕል 3

3 ¹ከዚያም ሰሎሞን በኢየሩሳሌም፣ አባታችን ለአባቱ ለዳዊት በተገለጠለት በሞሪያ ተራራ ላይ፣ ዳዊትም በኢያቡሳዊው በኦርናን አውድማ ባዘጋጀው ስፍራ የአባታችንን ቤት መሥራት ጀመረ። ²በነገሠ በአራተኛው ዓመት፣ በሁለተኛው ወር በሁለተኛው ቀን መሥራት ጀመረ። ³ሰሎሞን የአባታችንን ቤት ለመሥራት የጣላቸው መሠረቶች እነዚህ ናቸው፤ በቀድሞው መለኪያ ርዝመቱ ዘጠና ጫማ ያህል፣ ስፋቱም ሠላሳ ጫማ ያህል ነበር። ⁴በቤቱ ፊት ለፊት በቤቱ ስፋት ልክ የነበረው መመላለሻ ስፋቱ ሠላሳ ጫማ ያህል ነበር፤ ቁመቱም መቶ ሃያ ጫማ ነበር። ውስጡንም በጥሩ ወርቅ ለበጠው።

⁵ትልቁንም ክፍል በጥድ እንጨት ለበጠው፤ በጥሩ ወርቅም ከደነው፤ የዘንባባ ዛፎችንና ሰንሰለቶችንም ጨመረበት። ⁶ቤቱንም ለውበት በከበሩ ዕንቍዎች አስጌጠው፤ ወርቁም ከጳርዋይም የመጣ ነበር። ⁷ቤቱንም—ማገሮቹን፣ መድረኮቹን፣ ግድግዳዎቹንና በሮቹን—በወርቅ ለበጠው፤ በግድግዳዎቹም ላይ ኪሩቤልን ቀረጸ።

⁸እጅግ ቅዱሱንም ስፍራ ሠራ፤ ርዝመቱ ከቤቱ ስፋት ጋር እኩል ሠላሳ ጫማ ያህል ነበር፤ ስፋቱም ሠላሳ ጫማ ነበር። ሃያ ሦስት ቶን ያህል በጥሩ ወርቅም ለበጠው። ⁹ችንካሮቹም ሃያ አውንስ ያህል ወርቅ ይመዝኑ ነበር፤ የላይኞቹንም ክፍሎች በወርቅ ለበጠ።

¹⁰በእጅግ ቅዱሱ ስፍራ ውስጥ ሁለት የተቀረጹ ኪሩቤልን ሠራ፤ በወርቅም ለበጣቸው። ¹¹የኪሩቤሉ ክንፎች በአንድነት ሠላሳ ጫማ ያህል ይረዝሙ ነበር፤ የመጀመሪያው ኪሩብ አንዱ ክንፍ ሰባት ጫማ ተኩል ያህል ሆኖ የቤቱን ግድግዳ ይነካ ነበር፤ ሌላውም ክንፉ እንዲሁ ሰባት ጫማ ተኩል ሆኖ የሁለተኛውን ኪሩብ ክንፍ ይነካ ነበር። ¹²የሁለተኛውም ኪሩብ ክንፍ ሰባት ጫማ ተኩል ያህል ሆኖ የቤቱን ግድግዳ ይነካ ነበር፤ ሌላውም ክንፉ እንዲሁ ሰባት ጫማ ተኩል ሆኖ ከመጀመሪያው ኪሩብ ክንፍ ጋር ተገናኘ። ¹³የእነዚህ ኪሩቤል ክንፎች ሠላሳ ጫማ ያህል ተዘርግተው ነበር፤ በእግሮቻቸውም ቆመው ፊታቸውን ወደ ዋናው አዳራሽ አዙረው ነበር።

¹⁴መጋረጃውንም ከሰማያዊ፣ ከሐምራዊና ከቀይ ክር እንዲሁም ከጥሩ በፍታ ሠራ፤ ኪሩቤልም ተጠልፈውበት ነበር።

¹⁵በቤቱ ፊት ለፊት ሁለት ዐምዶች ሠራ፤ እያንዳንዳቸው አምሳ ሦስት ጫማ ያህል ይረዝሙ ነበር፤ በላያቸውም ላይ ሰባት ጫማ ተኩል ያህል ቁመት ያለው ጉልላት ነበረ። ¹⁶እንደ ዐንገት ጌጥ ሰንሰለቶችን ሠራ፤ በዐምዶቹም ላይ አደረጋቸው፤ መቶ ሮማኖችንም ሠራ፤ በሰንሰለቶቹም ላይ አሰራቸው። ¹⁷ዐምዶቹንም በቤተ መቅደሱ ፊት ለፊት አቆማቸው፤ አንዱን በቀኝ፣ አንዱን በግራ አቆመ፤ የቀኙንም ኢያኪን፣ የግራውንም ቦዔዝ ብሎ ሰየማቸው።