Chinamei Lemshang hoba Sidang Yaangbü
Seneibü Bou chem shanga chempen shuong kümbei: chinamei lemshang che, namei jonbü sidang yaangbü, masu noksa thüka lobü, sakla shanga phauyaang saoan hoba wanthung denshang saoan, popchem shuong, hoba hon popchem jamde ongkei. Chinam yaangbü kujinei, khoeibü atbü atakei athükkei, hoba popchem pendou lemshang shanga ki.
4 1Haoei chinamei lemshang che kümbei; kho süng iknop saoche, khaang iknop saoche, hoba suokla iknop an kikei. 2Hobaje haoei namei jonan sidang che kümbei, tongtongbü; jithon ka jithon sühko iknop an, suokla iknop ngao, hoba kho kaijembo iknop khujin kikei. 3Jithon phanga, masu noksa shuongei sidang kaijembo kailepbei, iknop che weko nyet bang, sidang kaijembo; lin penyia jonan, kho to jetei ong kikei. 4Sidang kho masu pongsu anthüknyi thüka lokei; masu pongsu sem yungkük thüka, sem chanep thüka, sem yungthang thüka, hoba sem chaang thüka maangaenei yeian kümbei, hoba sidang kho khübü thüka lokei, hoba haoeneibü meichung ae pendou maangaenei kikei. 5Khübü shangbü kho ikmaang tetche kikei; sidang ko kho thung phatko yaübü, leilang chipen noksa pinan yaübü lokei; sidang khonei gallon hajar annyet dei atkei.
6Hobaje haoei sakla shanga phauyaang an kümbei, ngao yungthang ae hoba ngao yungkük ae phokei; juokbü lembü shanga jungeibü peisilei khünei saklabü; lausikei sidang kho ungshedbou shuong sakla shanga kikei.
7Haoei ngühkhüm tegü honei wanthung denshang an kümbei, ngao chemeibü yungthang ae hoba ngao yungkük ae phokei. 8Hoba haoei khümsok an kümbei, chema phokei—ngao yungthang ae, ngao yungkük ae—hoba honei phau saongao kümbei.
9Haoei ungshedbou shuong shemjang hoba maangkabü shemjang kümbei, hoba khübü koukap shuong kümbei, hoba koukap shuong kho chinamei naanglepbei. 10Hobaje sidang kho yungthang aenei, yungthang chaang napheinei chemnyeka haoei phokukei.
11Huramei chak, suokjin, hoba phauyaang kümbei. Hibü Huramei Solomon Choba shanga seneibü Bou chema kümbü kümsilei pendou yeikei:
12thaonyu penyi; thaonyu thükaenei kibü phau phatko thaonyu sembung noksa penyi; thaonyu sembung noksa khoto küplepbü namlüh penyi; 13namlüh penyi shanga chilang pon 400, lin penyi weko, thaonyu thükaenei kibü thaonyu sembung noksa phau penyi küplepan; 14denshang shuong hoba denshang thüka kibü phauyaang shuong; 15sidang che hoba kho phanga kibü masu pongsu anthüknyi. 16Chak, suokjin, pheyaüjin, hoba khübü chaksiam pendou—habü ho Huram-abiei Solomon Choba shanga, seneibü Bou chem shanga, chinam lanbüei kümbei. 17Chobaei khübü kho Sukkot si Zereda kanglanga, Jordan shumanga shungkung kaoa ka jonan kümbei. 18Solomonei ho peisilei pendou aeibou juong kümbei, khoei chisaknam takbü kho alamen.
19Solomonei seneibü Boueibü chema kibü peisilei pendou kümbei, honei kümbü lemshang hoba Bou thedanga phobü wentek kibü khümsok shuong. 20hon lanbü wanthung denshang shuong, khübü wanthung shuong yoa, Saopoboutham thedanga ngühkhüm tegü jikla shanga; 21honei kümbü chipen shuong, wanthung shuong, hoba wankip shuong; (khübü kho hon lanbü hinseibü kikei.) 22Phauyaang, nyaklak, jenjuok phau, wanui jinbü, hoba chemeibü koukhün—Saopoboutham Shemjang to atbü maangkabou koukap, Lembüchem koukap shuong—khübü chaksiam pendou kho hon lanbü hinseibüei kümbei.
