Saopobü Busen Bou Chem to Lotbü
Saopobü Busen danglusinbü chem to sungbakei hoba kherabim kaakphang phanga phokei. Teklaang metbü shuong si chia laubü shuongei lenkükei che olinjinei — seneibü Bou maibü ki, haoeibü üeisanou ponpen kida — thanei chem shenkei, hoba ungshedbou shuong kho ka saüenla loula athükkei.
5 1Solomonei seneibü Bou chem shanga kümbü kümsilei pendou wankei. Hobaje haoei haobou Dawidei saüenan phobü peisilei—chandinam, hon hoba thung shuong pendou—jungan lotkei. Seneibü Bou chema thanan thanshanga phokei.
2Kheijinei seneibü Bou theyolanyobü Saopobü Busen Dawid sangnyu, kho Zion dogo nyenbü, ka sungbala shanga Solomonei Israelbü jaishou shuong, khuleibü shuong pendou hoba Israel shousi chempen leiyeibü shuong pendou Jerusalema yoshaitikei. 3Kheijinei Israelbü bousu pendou nyetboubü lita Lema Choba thedanga kamshaikei. a a v3 Nyetboubü lita Lem kho Neichem Lem ki, Israelbü sho heshaibü chaloua kümbü yaangbü Lem ki. 4Ladang Israelbü jaishou shuong pendou sühkei, Levibüei Saopobü Busen kho jungkei. 5Ungshedbou shuong hoba Levibüei Saopobü Busen, Kamshang Neichem, hoba kho danga kibü saopobü thung shuong pendou sungbakei. 6Solomon Choba hoba hao thedanga kamshaibü Israel chung pendouei sanlon si masu wesi aweenko lemla kuko, Saopobü Busen thedanga lokei. 7Hobaje ungshedbou shuongei seneibü Bou theyolanyobü Saopobü Busen kho khoeibü shang to, khei chem Saopobü Shemjang, aeibou saopobü shang, kaakyembü kherabim kaakphang phanga sungbakei. 8Aishanga kaakyembü kherabim Saopobü Busen shang thüka haoeneibü kaakphang shaian, thükaenei Saopobü Busen hoba khünei kibü bu pendou ngühlepan kikei. 9Bu kho loubünyu yingsije khoeibü loubünyu Saopobü Shemjang thedanga Saopobü Busen ka hapbo kikei, lausikei napheikaje bu kho ühüp; hoba tat sühko khübü kho khünei kia. 10Israelbü Ijep kaodak ka longjinei seneibü Bouei Israel shousi shuong yoa theyolanyobü kümbei, kheijinei Mosaei Horeba Saopobü Busena jinbü laangdak penyi to liman khünei lubü ai akitei.
11Hobaje ungshedbou shuong Saoposhang ka longkei. (Khünei kibü ungshedbou shuong pendouei, haoeneibü tan weko yingsikei, haoen lolo saüentikei, b b v11 Ungshedbou shuong tan dogo nyenbü yoka sepeiko sepeiko khangenkei, suokla lemshanga jembü bale che khangenla hapbei. 12hoba Levibü chia laubü shuong pendou—Asaf, Heman, Jeduthun, haoeneibü shousi shuong hoba jaisinasi—phembanei neian, kaangbü laa, pithung hoba kongkin metko, lemshang chaang aenei lokei, hoba ungshedbou 120ei teklaang metkei.). 13Teklaang metbü shuong hoba chia laubü shuong che tegü yeian, ngüh che ongei seneibü Bou sangan thangtetkei—teklaang, kaangbü laa hoba kongkin pithung yoa ngüh angan, haoenei hao sangko laukei, “Hao maibü ki; haoeibü üeisanou ponpen kida.” Kheijinei sangmeiei seneibü Bou chem shenkei, 14kheijinei sangmei nyen shanga ungshedbou shuong khangenla lola athükkei, aishanga seneibü Bou soneikangbüei seneibü Bou chem shenkei.
