Kaptisisyet ne po Sugunwet ak Nyanjet ne Oo
Ki yai tuguugap kootap Kwandanyo: kaptisisyet ne po sugunwet, nyanjet ne oo ne kitainganat ne tononchi itoonwegap eiik taman ak aeng', litaisyek taman che kiuunse ak keelyegap taisyek taman, taabook, ak tuguugap thahabu che ma koitoksei. Ki boisyee sugunwet ne chaang' kot ko ma ki ngen weigei, ak kobois kiit age tugul kaptisisyet.
4 1Ki yai kaptisisyet ne po sugunwet, ne ki po mitainik somoogik taman koindo, ak mitainik somoogik taman kebeberta, ak mitainik taman ak muut koindap tononennyi. 2Ki yai nyanjet ne kitanyi, ne kitainganat: mitainik taman ak muut kong'etee taban agoi taban, mitainik tisap ak robo koindo, ak mitainik artam ak muut koyiem. 3Ki mi ng'wonyutap mireiywondennyi itoonwegap eiik che kiyiem, che po tisap eng' mitait age tugul koyiem nyanjet; kisoniot ortinwek aeng' kingo kiyai nyanjet, koek kiit agenge. 4Ki tonone nyanjet itoonwegap eiik taman ak aeng', somok kogeerei murot kaataam, somok cherongo, somok murot tai, ak somok kong'asiis; kitonone nyanjet paragunnywa, ak ki keer sugulumwekwak tugul oriit. 5Tebeesindanyi ko ki uu sendimita tisap ak nusu; mireiywondennyi ko kergeit ko uu mireiywotap kigombet, ak kiguure taapteet ne kaiye. Kiyamei peegap litaisyek eliphuusyek taman ak tisap.
6Ki yai taabook taman che kiuunse, muut komostap tai ak muut komostap kaataam, si kiuunse oriit tuguuk che kiboisyee eng' kagoochinoik che kibeelei; ago ki po nyanjet si kiuunse tisiik oriit.
7Ki yai keelyegap taisyek che po thahabu taman ko uu ye ki king'at, muut komostap tai ne po Hekaluut ak muut komostap kaataam. 8Ki yai meset taman, ak koinde Hekaluut, muut komostap tai ak muut komostap kaataam; ak ki yai taabook che po thahabu pogol.
9Ki yai seremutap tisiik, ak seremut ne oo, ak kurgotikyik, ak ki liige kurgotikwak sugunwet. 10Ki inde nyanjet komostap tai, murot tai ne kogeer kong'asiis.
11Ki chop Hiram tereenik, kechigosyek ak taabook. Kou nooto ko kagoiges Hiram poisyet ne ki yae eng' Laitoryat Solomon, eng' kootap Kwandanyo:
12tolochik aeng'; metowek aeng' che uu taabook che mi paragutap tolochik; kariik aeng' che regerotiin che tuch metowechooto aeng'; 13itoonwegap logoek pogol ang'wan che po kariik aeng' che regerotiin, ortinwek aeng' eng' karnet age tugul, kotuch taabook aeng' che po metowek che mi paragutap tolochik; 14ng'echerok ak taabook che mi ng'echerochooto; 15nyanjet agenge ak itoonwegap eiik taman ak aeng' che mi kurereetap nyanjet. 16tereenik, kechigosyek, kariik che sogotiin, ak tuguukyik tugul; ki yachi Hiram-abi tuguuchu tugul Laitoryat Solomon, eng' kootap Kwandanyo, che po sugunonik che sitatiin. 17Ki itaany laitoryat tuguuchu eng' ole mi meneet, eng' atebweetap Jordan, kwenutap Sukoth ak Sereda. 18Ki chaang' miising' tuguuchu tugul che ki yai Solomon, kot ama imuuch chii koweige nyigiisindap sugunwet.
19Ki yai Solomon tuguuk tugul che mi kootap Kwandanyo: kapkorosuut ne po thahabu, ak meset che tebee magatiinik che itabaanatiin; 20keelyegap taisyek che po thahabu che tiliil ak taisyekyik, si kokweny eng' taitap koot ne po oriit ko uu ye ki king'at; 21taaptook, taisyek, ak tongoanik che po thahabu; ki po thahabu che tiliil miising'; 22Che po thahabu che tiliil: magasisyek, taabook che mengeechen, dishon, tereenik che ibe maat, ak kereiywegap kurgotigap Hekaluut; kurgotik che po oriit che chutei ole-tiliil miising', ak kurgotigap koot ne oo nooto ko Hekaluut.