Süngden Tebu kidang aitdir
Süngden ki yangludak nung bener aru aser cherubim tashikang kübok ayu. Jangzü apubatem aser kentenertemi ola kati ka tener—asen Tebu tajung lir, pa temeim yimlibilem teti alir—süngrai ki asüng, aser putirtem idak nung anishitsü atsüka makok.
5 1Solomoni asen Tebu ki asoshi mapa ajak renem. Idangji pai tebu Dawidi meshiteta ayuba oset—taribi, hon, aser oset ajak—bener aru aser asen Tebu ki terizüngdak nung ayu.
2Idangji Solomoni Dawid Yimti, aji Zion ta atembaji nungi, asen Tebu den tezüngzüktepba süngden bener aittsü asoshi, Israel nunger, kin tanishir ajak, aser Israel kinunger tongtipur ajak Yirusalem nung sentepdaktsü. 3Anungji ita tenetbuba nung benjong tatem Israel nisung ajaki chuba jakdang sentep. a a v3 Ita tenetbuba nung benjongji Süki Benjong lir, koba Israel akok tatem tulu benjong ka lir. 4Israel nunger ajak arudang, Levi nungeri süngdenji aben. 5Aser putirtem aser Levi nungeri süngden, sentep süki, aser süki nung aliba temeshi oset ajak bener aru. 6Solomon chuba aser pa madang sentepa aliba Israel nunger ajaki, ashitsü aser züngdangtsü makok san aser nashi pungchi tenla agüja, süngden jakdang noktak. 7Putirtemi asen Tebu den tezüngzüktepba süngdenji idak temeshidak—ki telunglen temeshi taktang, Temeshitiba Taktang—cherubim tashikang kübok bener aru. 8Kechiaser cherubimji süngden idak manung tashikang metsünga, aji aser iba süngra temaleni akhümbanga liasü. 9Süngra kanga talang liasü, aji asünung temeshi daki jakdang aliba süngden nungi süngra tatembangji ngua liasü, saka kimalen nungibo mangu; aser idakji tanü tashi lir. 10Israel chirtem Ijip nungi adokdang asen Tebui parnok den tezüngzüktepba ka yangluba Horeb nung, Mosai enokba lungpak ana saka, süngden nung tanga kecha mali asü.
11Idangji putirtem temeshidak nungi adok. (Yangji aliba putirtem ajaki, parnok tatong züngdanga meli saka, parnok sasa meshitetdakogo, b b v11 Putirtemi tatong ta ajaba telok tatem nung tenzük, parnok telok shiai Tebu ki benjong nung haptaba kaka tenzüktsü lemzüktsüba liasü. 12aser Levi kentenertem ajak—Asaf, Heman, Yeduthun, parnok jabasotem aser kinunger—tezüng sü bena, laya, jemji aser kongki tema, putir noklang ka metsür jangzüji apuyonga, tenladak anüdoklen noktak.). 13Jangzü apurtem aser kentenertem külemi, ola ka agi asen Tebu moaja aser sang—jangzü, laya aser kongkitem den parnoki ola adoka pa sanga ashi, “Pa tajung lir; pa temeim yimlibilem teti alir.” Idangji mepet agi asen Tebu ki sübang, 14anungji putirtemi mepet atema tenzüktsü menoktaktet, kechiaser asen Tebu sentsüwangshi agi asen Tebu ki asüng.