2 Chronicles 6 FHB Father's Heart Bible™

6 ¹Tetiya Solomon pora koise, “Amar Pitri he koise Tar to ghono andhera te thakibo.” ²“Kintu Moi Apuni karne ekta mohan ghor bonaise, Apuni hodai thakibole laga ekta jaga ase.”

³Tetiya raja ghuri kene, Israel laga sob sabha khara thaka homoi te, taikhan ke asirbad dise. ⁴Tai koise, “Israel laga Isor, amar Pitri ke stuti koribi, jun pora Tar mukh pora moi laga pitri David ke koi diya kotha Tar hath pora purah korise, Tai eneka koise,”

⁵“‘Jun din Moi laga manuh khan ke Egypt pora bahar ulaise, hei din pora Moi laga nam ta te thakibole ekta ghor bonabole Israel laga sob jati majot pora eku sohor basi luanai, aru Moi laga manuh Israel ke cholaybole kun manuh ke bhi basi luanai.’” ⁶“‘Kintu Moi laga nam ta te thakibole Moi Jerusalem ke basi loise, aru Moi laga manuh Israel ke cholaybole Moi David ke basi loise.’”

⁷“Israel laga Isor, amar Pitri laga nam karne ekta ghor bonabole moi laga pitri David laga mon te itcha thakise.”

⁸“Kintu amar Pitri pora moi laga pitri David ke koise, ‘Moi laga nam karne ekta ghor bonabole tumi laga mon te thaka karne, tumi eitu kori bole bhabona kora to bhal korise.’” ⁹“‘Kintu tumi ghor to nabonabo; tumi laga nijor gaw pora ula tumi laga putro—tai he Moi laga nam karne ghor to bonabo.’”

¹⁰“Etiya amar Pitri he Tai koi diya kotha purah korise: Tai vachan diya nisena, moi laga pitri David laga jaga te moi ahhise aru Israel laga singhason te bohi ase, aru Israel laga Isor, amar Pitri laga nam karne moi ghor to bonaise.” ¹¹“Ta te moi sanduk rakhise, jun bhitor te amar Pitri pora Israel laga manuh khan logot te bona vachan ase.”

Solomon pora prathana te Pitri laga ghor ke samarpan korise

¹²Tetiya Solomon pora Israel laga sob sabha laga age te amar Pitri laga bedi usor te khara hoi kene tar hath khuli dise. ¹³Solomon pora sath-adha feet lamba, sath-adha feet chaura, aru sari-adha feet uncha ekta tama laga manch bonaise, aru eitu ke chowk laga majot te rakhise. Tai eitu uporte khara hoi kene, Israel laga sob sabha age te athukari kene, sorgo phale tar hath khuli dise. ¹⁴Tai koise, He moi laga Pitri, Israel laga Isor, sorgo te nahole prithibi te Apuni nisena kun Pitri bhi nai, kun pora Apuni laga age te pura mon pora bera Apuni laga noukar khan ke vachan rakhi kene aru biswas joug morom dikhai ase. ¹⁵Apuni laga noukar moi laga pitri David ke Apuni diya vachan Apuni rakhise; Apuni laga mukh pora koi diya kotha aji Apuni laga hath pora purah korise.

¹⁶Etiya titia, moi laga Pitri, Israel laga Isor, Apuni laga noukar moi laga pitri David ke Apuni vachan diya kotha rakhibi: “Jodi tumi laga putro khan tumi Moi laga age te bera nisena Moi laga niyom te beribole taikhan laga rasta ke saja, tene hole Israel laga singhason te Moi laga age te tumi karne ekjon manuh kitia bhi komti nahobo.” ¹⁷Aru etiya, moi laga Pitri, Israel laga Isor, Apuni laga noukar David ke Apuni koi diya kotha to sthir hobole dibi.

¹⁸Kintu amar Pitri hosa bhi prithibi te manuh khan logot te thakibo naki? Sorgo aru sob pora uncha sorgo bhi Apuni ke dhori rakhibo napare—tene hole moi bonua eitu ghor to aru kiman kom hobo. ^a a v18 Solomon asurit hoise je amar Pitri prithibi te manuh khan logot te Tar ghor bonabo—eitu itcha tu Putro amikhan majot te thakibole ahhise titia pura hoise, aru hekh te jitia amar Pitri Tar bacha khan logot te hodai thakibo. ¹⁹Hoile bhi, He moi laga Pitri, Apuni laga noukar laga prathana aru tar binti ke huni bi, aru Apuni laga noukar Apuni laga age te kora kanda aru prathana ke huni bi. ²⁰Apuni laga noukar eitu jaga phale kora prathana ke huni bole, Apuni laga nam rakhibo koi diya jaga eitu ghor phale, din aru rati Apuni laga suku khula thakibo dibi. ²¹Apuni laga noukar aru Apuni laga manuh Israel eitu jaga phale prathana kora homoi te taikhan laga binti ke huni bi. Apuni thaka jaga sorgo pora huni bi; aru jitia Apuni hune, maph kori dibi.

²²Jodi ekjon manuh tar ghor-usor manuh birodh te paap kore aru kosom khabole lage, aru tai ahhi kene eitu ghor te Apuni laga bedi age te tar kosom khai, ²³tene hole sorgo pora huni kene kaam koribi. Apuni laga noukar khan laga bisar koribi: dusi manuh ke tar kaam laga saja dibi, aru dharmik manuh ke tar dharmikota hisab te inam di kene nirdusi koribi.

²⁴Jodi Apuni laga manuh Israel Apuni birodh te paap kora karne satru khan pora harai diya pichete, ghurai kene Apuni laga nam ke stuti kore, aru eitu ghor te prathana aru Apuni logot binti kore, ²⁵tene hole sorgo pora huni bi, Apuni laga manuh Israel laga paap maph kori bi, aru taikhan aru taikhan laga purbo-manuh khan ke Apuni diya desh te taikhan ke wapas anibi.

²⁶Jitia taikhan Apuni birodh te paap kora karne akas bondh hoi kene borkhun nahoi, jodi Apuni taikhan ke dukh diya homoi te taikhan eitu jaga phale prathana kore, Apuni laga nam stuti kore, aru taikhan laga paap pora ghuri ahhe, ²⁷tene hole sorgo pora huni bi, Apuni laga noukar khan, Apuni laga manuh Israel laga paap maph kori bi, jitia Apuni taikhan ke berabole bhal rasta sikhai, aru Apuni laga manuh ke adhikar nisena diya Apuni laga desh te borkhun pathai dibi.

²⁸Jodi desh te akal, mohamari, dhan-jolibo bemar, phcol-sukhi bemar, phoring, nahole kira ahhe; jodi satru khan taikhan laga sohor khan te taikhan ke gheri loi—jiman bhi bemar nahole dukh ahhe, ²⁹kun ekjon manuh nahole Apuni laga sob manuh Israel pora jiman bhi prathana nahole binti kore, aru sob manuh nijor laga dukh aru bikha jani kene eitu ghor phale tar hath khuli dile, ³⁰tene hole Apuni thaka jaga sorgo pora huni bi, aru maph kori bi, aru sob manuh ke tar sob rasta hisab te wapas dibi, kilemane Apuni tar mon ke jane—kilemane khali Apuni he sob manuh laga mon jane, ³¹titia hoile taikhan Apuni ke bhoi kori kene amar purbo-manuh khan ke Apuni diya desh te jiman din jinda thake, uman din Apuni laga rasta te beribo.

³²Aru bhi, jitia Apuni laga manuh Israel nahua ekjon bideshi manuh Apuni laga dangor nam, Apuni laga mohan hath, aru Apuni laga lamba kora hath karne dur desh pora ahhe—jitia taikhan ahhi kene eitu ghor phale prathana kore, ³³tene hole Apuni thaka jaga sorgo pora huni bi, aru hei bideshi manuh ki mange sob kori dibi, titia hoile prithibi laga sob manuh Apuni laga manuh Israel nisena Apuni laga nam jani kene Apuni ke bhoi koribo, aru moi bonua eitu ghor te Apuni laga nam ase koi kene janibo.

³⁴Jodi Apuni laga manuh khan Apuni pathua jaga kun te bhi taikhan laga satru khan birodh te lorai kori bole jai, aru Apuni basi luwa eitu sohor aru Apuni laga nam karne moi bonua ghor phale Apuni logot prathana kore, ³⁵tene hole sorgo pora taikhan laga prathana aru taikhan laga binti ke huni bi, aru taikhan laga hok uthai dhuri bi.

³⁶Jodi taikhan Apuni birodh te paap kore—kilemane paap nathaka kun bhi nai—aru Apuni taikhan logot khong uthi kene taikhan ke ekjon satru laga hath te di de, aru hei satru taikhan ke dur nahole usor desh te bondhi kori kene loijai,

³⁷hoile bhi jodi taikhan laga bondhi-desh te taikhan mon te bhabe, aru ghuri kene ta te Apuni logot binti kore, koi kene, “Amikhan paap korise, amikhan biya korise, amikhan dusto kaam korise,” ³⁸jodi taikhan ke loija bondhi-desh te taikhan laga pura mon aru pura atma pora Apuni phale ghuri ahhe, aru Apuni taikhan laga purbo-manuh khan ke diya desh, Apuni basi luwa sohor, aru Apuni laga nam karne moi bonua ghor phale prathana kore, ³⁹tene hole Apuni thaka jaga sorgo pora taikhan laga prathana aru binti ke huni bi, taikhan laga hok uthai dhuri bi, aru Apuni birodh te paap kora Apuni laga manuh khan ke maph kori bi.

⁴⁰Etiya, moi laga Pitri, eitu jaga laga prathana phale Apuni laga suku khula aru Apuni laga kan huni bole taiyar thaki bole dibi.

⁴¹Aru etiya uthibi, moi laga Pitri, aru Apuni laga aram kora jaga te ahhi bi, Apuni aru Apuni laga takot laga sanduk. Apuni laga purohit khan, moi laga Pitri, poritran laga kapra pindhi bole dibi, aru Apuni laga biswasi khan Apuni laga bhal pora anondo koribole dibi. ⁴²Moi laga Pitri, Apuni abhishek kora jon ke pelai nadibi. Apuni laga noukar David karne Apuni laga vachan laga morom ke yaad koribi.