2 Maũndũ ma Matukũ ma Tene 6 FHB Father's Heart Bible™

6 ¹Naake Solomoni akiuga atĩrĩ, “Ithe witũ nĩoigĩte atĩ nĩegũtũũra nduumĩinĩ ĩrĩa ndumanu. ²No niĩ nĩngwakĩire nyũmba ĩtĩĩku mũno, handũ ha gũtũũra nginya tene na tene.”

³Naake mũthamaki akĩhũgũka, akĩrathima kĩũngano kĩu gĩothe kĩa Isiraeli rĩrĩa othe maarũgamĩte. ⁴Akiuga atĩrĩ, “Ithe witũ arogoocwo, Ngai wa Isiraeli, ũrĩa guoko gwake kũhingĩtie ũrĩa kanua gake keerĩire baba Daudi, akiuga atĩrĩ,

⁵‘Kuuma mũthenya ũrĩa ndaarutire andũ akwa bũrũri wa Misiri, ndiigana gũthuura itũũra o na rĩmwe kuuma mĩhĩrĩga-inĩ yothe ya Isiraeli nĩgeetha njakĩrwo nyũmba ya rĩĩtwa rĩakwa kuo, o na kana ngĩthuura mũndũ o na ũmwe atuĩke mwathi wa andũ akwa a Isiraeli. ⁶No ndaathuurire Jerusalemu nĩgeetha rĩĩtwa rĩakwa rĩgĩe kuo, na ngĩthuura Daudi atongorie andũ akwa a Isiraeli.’

⁷Na rĩrĩ, baba Daudi aarĩ na muoroto ngoroinĩ yake wa gwaka nyũmba ya rĩĩtwa rĩa Ithe witũ, Ngai wa Isiraeli.

⁸No Ithe witũ akĩĩra baba Daudi atĩrĩ, ‘Tondũ warĩ na muoroto ngoroinĩ yaku wa gwaka nyũmba ya rĩĩtwa rĩakwa, nĩwĩkire wega gũkorwo na muoroto ũcio. ⁹No ti wee ũkaaka nyũmba ĩyo; nĩ mũrũguo, ũrĩa ũkoima mwĩrĩinĩ waku mwene—nĩ we ũkaaka nyũmba ĩyo ya rĩĩtwa rĩakwa.’

¹⁰Na rĩrĩ, Ithe witũ nĩahingĩtie kiugo kĩrĩa aaririe: nĩndacooka ithenya rĩa baba Daudi, na njikarĩire gĩtĩ kĩa ũthamaki kĩa Isiraeli, o ta ũrĩa eeranĩire, na nĩngwakĩte nyũmba ya rĩĩtwa rĩa Ithe witũ, Ngai wa Isiraeli. ¹¹Na niĩ ngĩiga ithandũkũ kuo, rĩrĩa rĩrĩ na kĩrĩĩkanĩro kĩrĩa Ithe witũ aarĩĩkanĩire na andũ a Isiraeli.”

Solomoni Aamũra Nyũmba ya Ithe witũ na Mahooya

¹²Naake Solomoni akĩrũgama mbere ya kĩgongona kĩa Ithe witũ, mbere ya kĩũngano kĩu gĩothe kĩa Isiraeli, agĩtambũrũkia moko make. ¹³Solomoni nĩathondekete kĩrũgamo gĩa gĩcango kĩa ũraihu wa ta fiti mũgwanja na nuthu, na wariĩ wa fiti mũgwanja na nuthu, na ũraihu wa na igũrũ wa fiti inya na nuthu, agĩkĩiga gatagatĩ ga nja. Akĩrũgama igũrũ rĩakĩo, agĩturia ndu mbere ya kĩũngano kĩu gĩothe kĩa Isiraeli, agĩtambũrũkĩria moko make na igũrũ. ¹⁴Akiuga atĩrĩ, Awa, Ngai wa Isiraeli, gũtirĩ Ithe ũhaana tawe kũu igũrũ kana gũkũ thĩ, wee ũtũũragia kĩrĩĩkanĩro na ũkonania ũtugi kũrĩ ndungata ciaku iria ithiiaga mbere yaku na ngoro ciao ciothe. ¹⁵Nĩwahingĩirie ndungata yaku Daudi baba kĩrĩa wamweranĩire; kĩrĩa waarĩtie na kanua gaku nĩwakĩhingirie na guoko gwaku ũmũthĩ.

¹⁶Na rĩu, Awa, Ngai wa Isiraeli, hingĩria ndungata yaku Daudi baba kĩrĩa wameeranĩire, ũkiuga atĩrĩ, “Ndũkaaga mũndũ wa gũikara mbere yakwa gĩtĩinĩ kĩa ũthamaki kĩa Isiraeli, angĩkorwo o ariũ aku nĩmakũmenyagĩrĩra mĩthiĩre yao nĩguo mathiiage kũringana na watho wakwa, o ta ũrĩa wee wathiĩte mbere yakwa.” ¹⁷Na rĩu, Awa, Ngai wa Isiraeli, kiugo kĩrĩa waarĩire ndungata yaku Daudi kĩrohingio.

¹⁸No kaĩ Ithe witũ no atũũranie na andũ gũkũ thĩ kũna? Igũrũ, o na igũrũ rĩrĩa rĩkĩrĩte igũrũ guothe, itingĩkũiganĩra—githĩ nyũmba ĩno njakĩte ndĩngĩrema o makĩria! ^a a v18 Solomoni nĩagegire nĩ ũndũ wa atĩ Ithe witũ no atũũranie na andũ gũkũ thĩ—wendi ũcio wahingirio biũ rĩrĩa Mũũriũ ookire gũtũũra gatagatĩ gaitũ, na mũthia-inĩ rĩrĩa Ithe witũ agaatũũrania na ciana ciake nginya tene na tene. ¹⁹No rĩrĩ, igua ihooya rĩa ndungata yaku o na gũthaithana gwayo, Awa, na ũigue kĩrĩro na ihooya rĩrĩa ndungata yaku ĩrahooya mbere yaku. ²⁰Maitho maku marotũũra mahingũkĩte makĩrorete nyũmba ĩno mũthenya na ũtukũ, kũrĩ handũ hau woigire nĩũkũiga rĩĩtwa rĩaku, nĩguo ũiguage ihooya rĩrĩa ndungata yaku ĩrahooya ĩrorete handũ haha. ²¹Igua mathaithana ma ndungata yaku na ma andũ aku a Isiraeli rĩrĩa mekũhooya marorete handũ haha. Igua ũrĩ kũu igũrũ, gĩikaro gĩaku; na rĩrĩa ũkũigua, ũrekanĩre.

²²Mũndũ angĩĩhĩria mũndũ wa itũũra rĩake, agĩathwo ehĩte mwĩhĩtwa, nake oke ehĩte mwĩhĩtwa ũcio mbere ya kĩgongona gĩaku thĩinĩ wa nyũmba ĩno, ²³hĩndĩ ĩyo ũigue ũrĩ kũu igũrũ, wĩke ũndũ. Ũtuĩre ndungata ciaku ciira: mũndũ ũrĩa mũhĩtia ũmũrĩhe kũringana na ciĩko ciake, nake mũthingu ũmũtue ndehĩtie, ũmũrĩhe kũringana na ũthingu wake.

²⁴Andũ aku a Isiraeli mangĩtoorio nĩ thũ nĩ ũndũ wa gũkwĩhĩria, nao macooke kũgooca rĩĩtwa rĩaku, mahooye na magũthaithe thĩinĩ wa nyũmba ĩno, ²⁵hĩndĩ ĩyo ũigue ũrĩ kũu igũrũ, ũohere andũ aku a Isiraeli mehia mao, na ũmacookie bũrũri ũrĩa waaheire o na maithe mao ma tene.

²⁶Rĩrĩa igũrũ rĩngĩhingwo gũkaaga mbura nĩ ũndũ nĩmakwĩhĩirie, mangĩhooya marorete handũ haha, magooce rĩĩtwa rĩaku, na matigane na mehia mao rĩrĩa ũkũmanyamaria, ²⁷hĩndĩ ĩyo ũigue ũrĩ kũu igũrũ, ũohere ndungata ciaku mehia mao, andũ aku a Isiraeli, rĩrĩa ũkũmaruta njĩra ĩrĩa njega ya gũthiiagĩra, na ũoirie mbura bũrũriinĩ waku, ũrĩa waaheire andũ aku ũtuĩke igai rĩao.

²⁸Kũngĩgĩa ng'aragu bũrũriinĩ, kana mũthiro, kana irio ikĩũma, kana gĩkoo, kana ngigĩ, kana igunyũ; thũ ciao ingĩmarigiicĩria matũũrainĩ mao—mũthiro o wothe kana mũrimũ o wothe ũngĩũka, ²⁹ihooya o rĩothe kana gũthaithana o kũrĩkũ mũndũ o wothe kana andũ aku a Isiraeli othe mangĩhooya, o mũndũ akĩĩmenyagĩra thĩĩna wake mwene na ruo rwake, agĩtambũrũkia moko make erekeire nyũmba ĩno, ³⁰hĩndĩ ĩyo ũigue ũrĩ kũu igũrũ, gĩikaro gĩaku, ũrekanĩre, na ũrĩhe o mũndũ kũringana na mĩthiĩre yake yothe, tondũ nĩũũĩ ngoro yake—nĩgũkorwo nĩwe wiki ũũĩ ngoro cia andũ othe, ³¹nĩguo magwĩtigagĩre na mathiiage na njĩra ciaku matukũ mothe marĩa magaatũũra bũrũriinĩ ũrĩa waaheire maithe maitũ ma tene.

³²Ningĩ-rĩ, rĩrĩa mũndũ wa kũngĩ ũrĩa ũtarĩ wa andũ aku a Isiraeli angĩũka oimĩte bũrũri wa kũraya nĩ ũndũ wa rĩĩtwa rĩaku inene, na guoko gwaku kũrĩ hinya, na gĩcoka gĩaku gĩtambũrũkĩtio—rĩrĩa angĩũka ahooe erekeire nyũmba ĩno, ³³hĩndĩ ĩyo ũigue ũrĩ kũu igũrũ kũrĩa ũtũũraga, wĩke ũrĩa wothe mũndũ ũcio wa kũngĩ egũkũhooya, nĩguo ndũũrĩrĩ ciothe cia thĩ imenye rĩĩtwa rĩaku na igwĩtigĩre, o ta ũrĩa andũ aku a Isiraeli megwĩkĩra, na imenye atĩ nyũmba ĩno njakĩte ĩĩtanĩtio na rĩĩtwa rĩaku.

³⁴Andũ aku mangĩthiĩ mbaarainĩ gũũkĩrĩra thũ ciao kũrĩa guothe ũngĩmatũma, nao makũhooe merekeirie itũũra inene rĩĩrĩ ũthuurĩte na nyũmba ĩno njakĩire rĩĩtwa rĩaku, ³⁵hĩndĩ ĩyo ũigue ũrĩ kũu igũrũ ihooya rĩao na gũthaithana kwao, na ũmarũĩrĩre ciira wao.

³⁶Mangĩkwĩhĩria—nĩgũkorwo gũtirĩ mũndũ ũtarĩ na mehia—nawe ũmarakarĩre, ũmaneane kũrĩ thũ ĩrĩa ĩngĩmataha ĩmatware bũrũri wa kũraya kana wa hakuhĩ,

³⁷no mangĩcooka meciirie ngoroinĩ ciao marĩ bũrũriinĩ ũrĩa maatahĩirwo, nao macooke magũthaithe marĩ kũu, makiuga atĩrĩ, “Nĩtwĩhĩtie, nĩtwĩkĩte ũũru, na nĩtwĩkĩte waganu,” ³⁸mangĩgũcookerera na ngoro ciao ciothe na mĩoyo yao yothe marĩ bũrũriinĩ wa ũtahĩkano wao kũrĩa maatahĩirwo, nao mahooe merekeirie bũrũri wao ũrĩa waaheire maithe mao, na itũũra inene rĩrĩa ũthuurĩte, na nyũmba ĩno njakĩire rĩĩtwa rĩaku, ³⁹hĩndĩ ĩyo ũigue ũrĩ kũu igũrũ, gĩikaro gĩaku, ihooya rĩao na mathaithana mao, ũmarũĩrĩre ciira wao, na ũrekere andũ aku arĩa makwĩhĩirie.

⁴⁰Na rĩu, Awa, maitho maku marotũũra mahingũkĩte na matũ maku macuuthĩrĩrie ihooya rĩa handũ haha.

⁴¹Na rĩu arahũka, Awa, ũũke handũ haku ha kũhurũka, wee na ithandũkũ rĩa hinya waku. Athĩnjĩri Ngai aku, Awa, marohumbwo ũhonokio, na arĩa aku ehokeku marokenera wega waku. ⁴²Awa, ndũkarege ũrĩa waku mũitĩrĩrie maguta. Ririkana ũtugi waku wa kĩrĩĩkanĩro kũrĩ Daudi ndungata yaku.