Mi eng' bukuit

2 Ateptap Peetuusyek 7 FHB Father's Heart Bible™

Kiistoi 15% eng' kiy ne iale korook →
Bukuit

Iyiit Toronatetap Kwandanyo Koot

Ki but maat ak koiit toroornatet koot, ak kogutuny piik kotokyi togoochikwak ng'wony eng' koita. Yeityo kowol Kwandanyo eng' keemeut, kole: ngot koming'i lagokyuk, kosaaei, kocheeng' tainnyu ak koweechigei eng' ne ya, agas anyun, ainyil tengekwak, ak asoobi emenywa.

Ng'alaali Kwandanyo eng' mustarisyek 12–22

Sura 7.

Kingo kagogees Solomon saaet, kobut maat eng' kipsengwet ak kopeel kagoochinet ne kibeelei ak tiseiywek, ak koiit toroornatetap Kwandanyo koot. Ma kimuuch tisiik kochut kootap Kwandanyo, amu koiit toroornatetap Kwandanyo. Kingo keer piigap Israel tugul kobut maat ak toroornatetap Kwandanyo eng' koot, kogutuny kotokyi togoochikwak ng'wony eng' koita, kolas ak koweekyi kongoi Kwandanyo, kole, “Myee; tebyei rireenennyi koigeny.”

Yeityo kogoito laitoryat ak piik tugul tiseiywek eng' taitap Kwandanyo. Koeng'ji Laitoryat Solomon tuuga 22,000 ak keechiir 120,000; kotabaan laitoryat ak piik tugul kootap Kwandanyo. Kitonone tisiik eng' olekwak; kitonone Lawiik kobooto tuguugap tienet che po Kwandanyo che ki yai Laitoryat Daudi si koweekyin kongoi Kwandanyo—“amu tebyei rireenennyi koigeny”—ye ilas Daudi eng' tuguuchooto. Koguut tisiik igondisyek eng' taitap Lawiik, ak kitonone piigap Israel tugul.

Kotabaan Solomon kwenutap seremut, ne mi taitap kootap Kwandanyo, amu kiga kogoito yooto kagoochinoik che kibeelei ak mwanigap kagoochinoigap kaalyeet, amu kaptisisyet ne po sugunwet ne ki yai koma kimuuch kobook kagoochinet ne kibeelei, ak kagoochinet ne po chaamisyek, ak mwanik.

Eng' sait nooto koriipchi Solomon igoorto eng' peetuusyek tisap, ak piigap Israel tugul kobooto—tuiyet ne oo miising'—kobooch Lebo-hamath agoi kererutap Misiri. Eng' peetuut ne po sisiit koyai tuiyetap kaming'inetapkei, amu kiga koriip katabaanetap kaptisisyet eng' peetuusyek tisap ak igoorto eng' peetuusyek tisap. Eng' peetuut ne po tiptem ak somok ne po arawet ne po tisap, komwachi piik koba kaa, koboiboen ak kogasegei eng' muguleldo amu myeeindo ne ki yachi Kwandanyo Daudi, ak Solomon, ak Israel piikyik.

Ng'alaalji Kwandanyo Solomon

Kogees Solomon kootap Kwandanyo ak kootap laitornatet. Tugul che ki inde Solomon muguleldanyi koyai eng' kootap Kwandanyo ak koonnyi, koyai komyee.

Yeityo konyoonji Kwandanyo Solomon kemout ak koleenji, “Kaagas saaeng'ung' ak kaalewen komosta ni koek koonnyu ne po tiseiywek.

“Ngo ager kipsengwet si mata koroobon, anan ang'at chereng'endet koam emet, anan asen miondo eng' kwenutap lagoguk, ngo kaming'inin lagoguk—che name kainenyu—ak kosaa, ak kocheeng' tainnyu, ak koweeksei eng' ortinwekwak che yaacheen, aa agas eng' kipsengwet, ak anyoiywa kaat lelutikwak, ak asoop emennywa. Nguno ingotebee konyekyuk ko ng'eeng'e ak itiikyuk kogas saaet ne kisaaei eng' komosta ni. Nguno kaalewen ak kaatabaan kooni, si kotebee kainenyu yooto koigeny; ko mi konyekyuk ak muguleldanyu yooto kotugul.

Inyee ko, ngo ingwendi eng' tainnyu ko uu ye ki iwendi Daudi kwandang'ung', ak iyai tugul che kang'atiin, ak iriip ng'atuutiguk ak kirwoogutiguk, aa agimiit ng'echereetap laitornateng'ung', ko uu ye ki iyomiskei ak Daudi kwandang'ung', ale, “Mata kobek chiing'ung' ne pou Israel.”

Ago ngo iweeksei, ak ibagaakta ng'atuutiguk ak kaneetisyosyekyuk che kaande taing'ung', ak iwo iboisyechi kanamonik alak ak kolasu icheek, aa atut Israel eng' emennyu ne ki agoochi icheek, ak aiste eng' tainnyu kooni ne ki atabaan eng' kainenyu, ak ayai koek kalewenet ak taunet eng' kwenutap piik tugul. Kooni, ne ki toroor miising', kotun kwong'ee age tugul ne siirtoe, ak komwa kole, “Amu nee koyae Kamuktaindet ne Toroor ko uu ni emoni ak kooni?

Kowolji icheek kole, “Amu ki bagakta Kamuktaindet ne Toroor, Kamuktaindetap kwandaikwak, ne ki imut icheek eng' emetap Misiri, ak konam kanamonik alak ak komeitoochi icheek, kogutung'ji ak koboisyechi icheek—nooto anyun si koyachi icheek yaityoni tugul.””