Iwui Mik Nawuili Horkasang
Davidwui laa.
Ngayāk kasāwui seihā akha, nganamkaphā thāda kāshungmi. Ana awui Avāli ngakarthuimi khavai ngachei chi awui khamor kala awui ningkachāngna — makhayā kasābingli mangarui khavai, athumwui kashakazā kaphāli ringphā makhavai — kala khangarong mi akhana ali mashungkhuiakha chi akuili thao thāda ngarumkhuia.
141 1O Iwui Avā, ina nali khangakaona; iwuili thākta rālu. Ina nali khangakao tharan iwui akhon nganāmilu.
2Iwui seihā kasā pemting thāda nawui mangāli kāshungranu, iwui pāng khangkā chi ngazinwui pha̱kaphayā thāda leiranu.
3Iwui khamortungli khamayon phāsanglu, O Iwui Avā; imorchaiwui khāmong chi yangmilu. 4Makaphā kasābingli ngasoda makaphā otsakli khangarum khavai, iwui ning makaphā katonga chili mangatei ngasakalu; kala athumwui zākaphā ina mazaalu.
5Khangarong mina ili shaoranu— chi lukhamashanna; ana ili mashungkhuiranu—chi iwui akuiwui vang thao mānga; iwui akuina chi makhuisangmara. Chithālala iwui seihā kasā chi makhayā kasābingwui otsak chili atam kachida ngakaikashina.
6Athumwui khamungabing lungkai lungharbingwui eina horsang kahai tharan, chitharan mibingna iwui tui shāra, kaja chi leishiri mānga. 7Mi akhana ngalei sāteka kakai sā thāda, chithāda ithumwui ara̱kui chikhurwui khamorli chaiyānghaira.
8Kha O Iwui Avā Pangshap, iwui mik chi nawuili horkasang lei; ina nali ngayinkhui— ili ngachakyāng eina mahorhaialu. 9Athumna iwui vang sāsang kahai khalen chiwui eina kala khayon kasābingwui khalen chiwui eina ili ngākmilu. 10Makhayā kasābing athum khalattawui khaihlanli pizangranu, kha imāngna ning nganungkhung eina kānthui.
