Nakatutok Kanimo ang Akong mga Mata
Salmo ni David.
Usa ka pag-ampo sa gabii nga gihalad sama sa insenso. Ang iyang gihangyo sa iyang Amahan nga bantayan mao ang iyang kaugalingong baba ug kaibog — nga dili siya makig-uban sa mga mamumuhat sa daotan o malipay sa ilang mga lamiang pagkaon — ug iyang gidawat ang pagbadlong sa usa ka matarong nga tawo sama sa lana sa iyang ulo.
141 1Akong Amahan, nagtawag ako kanimo; dali ngari kanako. Pamatii ang akong tingog sa dihang mosangpit ako kanimo.
2Tugoti nga mosaka ang akong pag-ampo sa imong atubangan sama sa insenso, ang pagbayaw sa akong mga kamot sama sa halad sa kagabhion.
3Pagbutang ug magbalantay, akong Amahan, sa akong baba; bantayi ang pultahan sa akong mga ngabil. 4Ayaw tugoti nga ang akong kasingkasing moliso ngadto sa bisan unsang daotan, sa pag-apil sa daotang mga buhat uban niadtong nagbuhat ug sayop; ug ayaw ako tugoti nga magkombira sa ilang lamiang mga pagkaon.
5Tugoti nga ang matarong mohampak kanako—kini maoy kalolot; tugoti siya nga motul-id kanako—kini maoy lana alang sa akong ulo; ang akong ulo dili modumili niini. Apan ang akong pag-ampo kanunayng batok sa mga buhat sa mga daotan.
6Sa dihang ang ilang mga magmamando ihulog gikan sa batoong mga pangpang, nan madungog sa katawhan ang akong mga pulong, kay kini makapahimuot. 7Maingon nga ang usa nagdaro ug nagbungkag sa yuta, mao usab nga ang atong mga bukog nagkatibulaag sa baba sa lubnganan.
8Apan ang akong mga mata nakatutok kanimo, akong Soberanong Amahan; diha kanimo modangop ako—ayaw ako biyai nga walay panalipod. 9Ilikay ako gikan sa lit-ag nga ilang gibutang alang kanako, gikan sa mga bitik niadtong nagbuhat ug sayop. 10Tugoti nga ang mga daotan mahulog sa ilang kaugalingong mga pukot, samtang ako lamang ang makalabang nga luwas.
