ኣዒንተይ ናባኻ ጠሚተን
መዝሙር ዳዊት።
ከም ዕጣን ዝቐርብ ናይ ምሸት ፀሎት። ንኣቦኡ ክሕልወሉ ዝልምኖ፥ ንገዛእ ኣፉን ትምኒቱን እዩ፦ ምስ ዓመፅ ዝገብሩ ከይሳተፍ፥ ካብ ጥዑም ምግቦምውን ከይፈቱ፤ ካብ ፃድቕ ሰብ ዝመፅእ ተግሳፅ ከዓ ከም ዘይቲ ኣብ ርእሱ ይቕበሎ።
141 1ኦ ኣቦይ፥ ናባኻ እፅውዕ ኣለኹ፤ ቀልጢፍካ ናባይ ንዓ። ናባኻ እንተ ኣእዌኹ ቃለይ ስማዕ።
2ፀሎተይ ከም ዕጣን ኣብ ቅድሜኻ ይደይብ፤ ምልዓል ኣእዳወይ ከዓ ከም መስዋእቲ ምሸት ይኹን።
3ኦ ኣቦይ፥ ኣብ ኣፈይ ሓላዊ ኣቐምጥ፤ ኣብ ደገ ከንፈረይ ሓሉ። 4ልበይ ናብ ዝኾነ ክፉእ ነገር ኣይተዘንብሎ፤ ምስቶም ዓመፅ ዝገብሩ ኣብ ክፉእ ግብሪ ንኽሳተፍ፥ ካብ ጥዑም ምግቦምውን ኣይብላዕ።
5እቲ ፃድቕ ይውቕዐኒ፥ እዙይ ሕያዋይነት እዩ፤ ይገስፀኒ፥ እዙይ ንርእሰይ ዘይቲ እዩ፤ ርእሰይ ኣይኣብዮን እዩ። ፀሎተይ ግና ኵልሻዕ ኣብ ልዕሊ ግብሪ ሓጢኣተኛታት እዩ።
6ኣሕሉቖም ካብ ጨላቝ ኣኻውሕ ምስ ተደርቢዮም፥ ሽዑ እቲ ህዝቢ ቃላተይ ክሰምዕ እዩ፥ ጥዑማት እዮም እሞ። 7ሓደ ሰብ ንምድሪ ከም ዝሓርሳን ከም ዝሰብራን፥ ከምኡ ኸዓ ኣዕፅምትና ኣብ ኣፍ መቓብር ተበቲኖም።
8ኣዒንተይ ግና ጠሚተን ኣለዋ፥ ናባኻ፥ ኦ ጐይታይ ኣቦይ፤ ኣባኻ እዕቘብ ኣለኹ፤ ረዳኢ ዘይብለይ ኣይትሕደገኒ። 9ካብቲ ዘፃወዱለይ መፈንጠር፥ ካብ መፈንጠሪታት እቶም ዓመፅ ዝገብሩ ሓልወኒ። 10እቶም ሓጢኣተኛታት ናብ መርበቦም ይውደቑ፤ ኣነ በይነይ ግና ብሰላም እሓልፍ።
