Suku Apuni Uporte Lagai Rakhise
David laga ekta bhajan.
Ekta sanjh laga prathana, dhuna nisina dibo. Tai nijor laga Pitri ke ki rakhibole koi ase, itu tai nijor laga mukh aru loalosa ase — dusto kaam kora manuh logot milibole nohoi aru taikhan laga mitha khana khabole nohoi — aru ekta dharmik manuh pora diya dabi-thabi ke tai matha te tel nisina mani loi.
141 1Moi laga Pitri, moi Apuni ke mati ase; joldi moi logot te ahhibi. Moi Apuni ke kandi mati homoi te, moi laga awaj huni bi.
2Moi laga prathana Apuni age te dhoop nisena uthi jabi, moi laga hath uthua tu saam laga boli nisena hobi.
3Moi laga Pitri, moi laga mukh te ekjon rokhiya rakhi dibi; moi laga oth laga dorja ke rukhi thakibi. 4Moi laga mon ke kun biya phale bhi muribole nadibi, biya kaam kora manuh khan logot te biya kaam te milibole; aru tarkhan laga mitha kha-luwa khan moi ke khabole nadibi.
5Dharmik manuh pora moi ke maribi—eitu morom ase; tai moi ke thik kori dibi—eitu moi laga matha nimite tel ase; moi laga matha pora eitu mana nakoribo. Kintu moi laga prathana tu hodai biya manuh khan laga kaam khan birodh te ase.
6Jitia tarkhan laga raja khan ke pathor pahar pora phelai dibo, titia manuh khan moi laga kotha khan hunibo, kilemane eitu khan bhal ase. 7Kunba pora mati ke hal bai kene phatai diya nisena, tenekoi amar hardi khan kobor laga mukh te sitri jaise.
8Kintu moi laga suku Apuni uporte lagai rakhise, moi laga Prabhu Pitri; Apuni logot te moi suraksha lu ase—moi ke asohai kori nachari dibi. 9Tarkhan pora moi nimite lagai diya phanda pora moi ke rakhibi, biya kaam kora khan laga jaal khan pora. 10Biya manuh khan nijor laga jaal khan te giri jabi, kintu moi ekla hoi kene bhal pora paar hoi jabi.