Maso Anga Ali pa Imwe
Nyimbo ya Dhavidhi.
Phembero ya madzulo yakuperekwa ninga mafuta akununkhira. Pinaphemba iye kuti Baba wace aonerere ndi kanwa kace na cifuno cace — kuti aleke kuphatana na anthu akuipa ayai kukomerwa na pyakudya pyawo pyakukoma — mbatambira kusandikwa na munthu wakulungama ninga mafuta pamusolo pace.
141 1Baba wanga, ndisakucemerani; bwerani mwakucimbiza kuna ine. Bveserani fala yanga pandalira kuna imwe.
2Phembero yanga mbikwire pamaso panu ninga ubani, kulamusa manja anga ninga ntsembe ya maulo.
3Ikhani nlindi, Baba wanga, pa mulomo wanga; onani mwadidi pa nsuwo wa milomo yanga. 4Lekani ntima wanga utendeukire ku cinthu consene cakuipa, toera kucita macitiro akuipa pabodzi na ale anacita pyakuipa; pontho lekani ndidye pyakudya pyawo pyakukoma.
5Wakulungama mbandimenye—kweneku ndi kukoma ntima; mbandisandike—kweneku ndi mafuta pa nsolo wanga; nsolo wanga nkhabe kukhonda pyenepi. Mbwenye phembero yanga ndi yakutsutsana na macitiro a anyakuipa ndzidzi onsene.
6Atsogoleri awo angaponywa pantsi kubuluka pa miyala mikulu, penepo anthu anadzabva mafala anga, thangwi ndi akukoma. 7Ninga munthu analima mbagwanda mataka, tenepo magogodo athu amwazika pa mulomo wa nthumbi.
8Mbwenye maso anga ali pa imwe, Baba wanga Mambo; mwa imwe ndisathawira—lekani kundisiya mwakusowa citsidzikizo. 9Ndikoyeni ku nsampha udanditeyera iwo, ku misampha ya ale anacita pyakuipa. 10Anyakuipa mbagwere mu maukonde awo ene, mbwenye ine ndekha ndipite mwa ntendere.
