詩篇 141

141 ¹ 我嘅父啊,我向你呼求;求你快啲嚟 到我身邊。我向你呼喊嘅時候,求你聆聽我嘅聲音。

² 願我嘅禱告好似香咁,升到你面前; 願我舉起雙手好似晚上嘅祭物咁。

³ 我嘅父啊,求你為我把守我把口; 看守我嘴唇嘅門。 ⁴ 唔好等我嘅心偏向任何邪惡,同啲作惡嘅人一齊做 壞事;亦都唔好等我享用佢哋嘅美食。

⁵ 任由義人打 我—呢個係恩慈;任由佢責備我—呢個係抹我頭嘅膏油;我個頭唔會拒絕 。然而,我不斷禱告,對抗惡人嘅所作所為。

⁶ 當佢哋嘅首領由巉巉嘅懸崖被拋落嚟嘅時候, 眾人就會聽我嘅話, 因為我嘅話係甘美嘅。 ⁷ 好似人耕田,翻開泥土咁, 我哋嘅骸骨都咁樣散落喺墳墓口。

⁸ 但係我嘅眼定睛 望住你,我至高無上嘅父;我投靠你— 求你唔好留低我毫無防禦。 ⁹ 求你保守我脫離佢哋為我設下嘅陷阱,脫離啲作惡嘅人嘅網羅。 ¹⁰ 願惡人跌落自己嘅網羅入面, 而我就一個人安然經過。