Amehlo Athe Ntsho Kuwe
Umhobe kaDavide.
Umthandazo wangokuhlwa onikelwa njengesiqhumiso. Into acela uBawo wakhe ukuba ayigcine ngumlomo wakhe nomnqweno wakhe—ukuze angahlanganyeli nabenzi bobubi okanye anandiphe izinto zabo eziyolisayo—yaye wamkela ukohlwaywa lilungisa njengeoli entlokweni yakhe.
141 1Bawo wam, ndikhala kuwe; khawuleza uze kum. Phulaphula ilizwi lam xa ndimemeza kuwe.
2Makunyuke umthandazo wam phambi kwakho njengesiqhumiso, ukuphakama kwezandla zam kube njengomnikelo wangokuhlwa.
3Beka umlindi, Bawo wam, emlonyeni wam; ugcine ucango lwemilebe yomlomo wam. 4Musa ukuyibekela intliziyo yam nakweyiphi na into embi, ndihlanganyele ezintweni ezingendawo kunye nabenzi bobubi; ndingadli izinto zabo eziyolisa.
5Ilungisa malindibethe— yinceba leyo; makandohlwaye—yioli yentloko yam; intloko yam ayiyi kuyilandula. Noko ke umthandazo wam uhlala uchasene nezenzo zabangendawo.
6Xa izikhulu zabo zigityiselwa phantsi ezingxondorheni, baya kuweva ke abantu amazwi am, kuba mnandi. 7Njengokuba umntu elima eqhekeza umhlaba, ngokunjalo amathambo ethu aphangalalisiwe emlonyeni welabafileyo.
8Kodwa amehlo am akhangele kuwe, Nkosi yam Bawo; kuwe ndizimela— musa ukundishiya ndingenamkhuseli. 9Ndigcine emgibeni abandenzele wona, nasezirhintyelweni zabenza ububi. 10Abangendawo mabawe eminatheni yabo, ndibe mna ndodwa ndidlula ndikhululekile.
