David Lungkhurwui Eina Khangakao
Davidwui thangkhamei laa, ana lungkhurli leisai tharan. Seihā kasā.
Davidna lungkhurli seihā sāda, apuk ngasoda leikahai chi hānga: iwui yāpāngli yangda theilu, ili kathei mi akhala maleimana, ngayin khavaipam maleisā, iwui mirinli shivakhame khipākha maleimana. Ana awui Avāli kharingabingwui ramli iwui yarna da hoi, kala phātopwui eina khuishokmi khavai ngachei.
142 1Iwui akhon eina iwui Avāli ina khangakaona; iwui akhon eina ali ina kapona. a a v1 Maskil hi machuk kala tamchithei laa akhana—laa sā khavai maningla, kha machuk khavai laana. 2Awui mangāli iwui makhamayā ina heishoka; awui mangāli iwui kakhanang ina hānga. 3Iwuklungli imanglā vānhaowa tharan, iwui shongfa nana thei. Ina zatkhavai shongfali iwui vang khalen sanghai. 4Iwui yāpangli yangda theilu— ili kathei mi akhala maleimana; iwui vang ngayin khavaipam maleisā; iwui mirinli shivakhame khipākha maleimana. 5O iwui Avā, ina nali khangakaona; ina hānga, "Na iwui ngayin khavaina, kharingabingwui ramli iwui yarna." 6Iwui khavao shāmilu, kaja ina sāngnā ngazanlakhaowa. Ili kharomabingwui eina kanmilu, kaja athum iwui eina yāng kālaka. 7Imanglā phātopwui eina khuishokmilu, chithāda ina namingli ningkashi mira. Khangarongabingna iwui kuimareida rākazipra, kaja nana ili kaphā chiya sāmira.
